අද (22) දිනයේ කොළඹ කොටස් වෙළෙඳපොළ ගනුදෙනු ආරම්භ වී සුළු මොහොතකින් දෛනික පිරිවැටුම රු. බිලියනයේ සීමාව ඉක්මවා යනු ලැබීය.

ඒ කැපිටල් එලායන්ස් පීඑල්සී සමාගමේ සිදුවූ දැවැන්ත කොටස් හුවමාරුවක් හේතුවෙනි.

එහිදී කැපිටල් එලායන්ස් සමාගමේ දෙවැනියට විශාලතම කොටස් හිමියා වූ සමාගමේ විධායක අධ්‍යක්ෂ/ ප්‍රධාන විධායක නිලධාරී අජිත් ප්‍රනාන්දු මහතා තමන් සතුව පැවති කොටස් මිලියන 21.69 ක් අලෙවි කර තිබේ. ඒ එක් කොටසක් රු. 60.10 බැගිනි. ඒ අනුව මෙම ගනුදෙනුවේ සම්පුර්ණ වටිනාකම රු. බිලියන 1.3 ක් වේ.

මෙය සමාගමේ අභ්‍යන්තර කොටස් හුවමාරුවක් ලෙසින් වාර්තා වන අතර එහිදී ගැනුම්කරුවා වී ඇත්තේ කැපිටල් එලායන්ස් පීඑල්සී හි බහුතර කොටස් හිමියා වන කැපිටල් එලායන්ස් හෝල්ඩිංග්ස් ලිමිටඩ් සමාගමයි.

මෙම ගනුදෙනුවට පෙර කැපිටල් එලායන්ස් පීඑල්සී හි 79.41% ක කොටස් හිමිකාරීත්වය කැපිටල් එලායන්ස් හෝල්ඩිංග්ස් ලිමිටඩ් සතුව පැවති අතර අද සිදුකෙරුණූ මෙම ගනුදෙනුවෙන් පසු එම කොටස් හිමිකාරීත්වය 86% ක් දක්වා ඉහළ යනු ඇත.