කොළඹ කොටස් වෙළෙඳපොළ මේ දිනවල ඉතා සාර්ථක කාර්යසාධනයක් වාර්තා කරමින් සිටී. මෙහි ඇති තවත් සුවිශේෂී තත්ත්වයක් වන්නේ ඉතා ඉහළ දෛනික පිරිවැටුමක් වාර්තා වීමයි. මෙම වසරේ ආරම්භක ගනුදෙනු දිනය වූ ජනවාරි 04 දින රු. බිලියන 4.96 ක පිරිවැටුමක් වාර්තා වූ අතර ජනවාරි 05 සහ 06 යන දෙදින තුළ පිළිවෙලින් රු. බිලියන 6.18 ක් හා රු. බිලියන 7.15 ක් ලෙස දෛනික පිරිවැටුමේ ක්‍රමික වැඩිවීමක් ද දක්නට ලැබුණි. එසේම ඊයේ (07) දින ගනුදෙනු හරහා වාර්තා වූ පිරිවැටුම රු. බිලියන 9.14 ක් තරම් දැවැන්ත අගයක් විය. එසේම අද (08) දිනය තුළ දී ද රු. බිලියන 6.16 ක පිරිවැටුමක් දෛනික ගනුදෙනු හරහා වාර්තා වී තිබුණි.

මෙයාකාරයෙන් කොටස් වෙළෙඳපොළ දෛනික පිරිවැටුම සීඝ්‍රයෙන් ඉහළ ගියේ කෙසේද? කොටස් වෙළෙඳපොළට අලුතෙන් මුදල් ගලා ඒමක් සිදුවූවා නම් එම මුදල් ගලා ආවේ කොහේ සිටද? යන වග කොළඹ කොටස් වෙළෙඳපොළ ප්‍රධාන විධායක නිලධාරී රජීව බණ්ඩාරනායක මහතාගෙන් අද දෙරණ BIG FOCUS සජීවී සංවාදාත්මක වැඩසටහනේ දී විමසා සිටි අතර ඔහු ඒ සඳහා මෙසේ ප්‍රතිචාර දක්වා සිටියේය.

“කොටස් වෙළෙඳපොළට දැන් ඇවිල්ලා තියෙන මුදල් සම්බන්ධයෙක් කතා කරන කොට ප්‍රධාන වශයෙන් අපිට පෙනෙන්නේ මේ අඩු පොළී අනුපාතිකයක් පවතින වාතාවරණයක, ආයෝජකයන් ස්ථාවර තැන්පතුවල මුදල් යොදවන්නේ නැතුව, මොකද පොළී අනුපාතික ඉතා අඩු මට්ටමක පවතින නිසා ඒ මුදල් කොටස් වෙළෙඳපොළට යෙදවීමේ ප්‍රවණතාවයක් දකින්න ලැබෙනවා. එම නිසා අඩු පොළී අනුපාතික පැවතීම කොටස් වෙළෙඳපොළට මෙලෙස මුදල් ගලා ඒමට එක් හේතුවක් ලෙස දක්වන්න පුළුවන්. තවත් හේතුවක් තමයි මේ කාලයේ දී ආනයන සඳහා විවිධා සීමා පනවලා තියෙනවා, සමහර විට ඒ අනයනවලට යොදවන මුදලුත් කොටස් වෙළෙඳපොළේ යෙදවීමට ඉඩකඩ තිබෙනවා.“