නැකතට කලින් කොටස් වෙළෙඳපොළට අවුරුදු ආ හැටි

කොළඹ කොටස් වෙළෙඳපොළ දෛනික කොටස් ගනුදෙනු පසුගිය අප්‍රේල් 12 වන බදාදා නිමාවට පත්වූයේ දීර්ඝ සතිඅන්තයක එළඹීමත් සමඟිනි. එදින ගනුදෙනු අවසානයේ දී සියලු කොටස් මිල දර්ශකය ඒකක 6,402.99 ක් ලෙසින් වාර්තා වූ අතර 2017 වසරේ දී තනි දිනක් තුළ සියලු කොටස් මිල දර්ශකයේ වාර්තා වූ උපරිම වර්ධනය ද මෙදින වාර්තා විය. ඒ ඒකක 97.45 ක් හෙවත් සියයට 1.55 ක කොටස් වෙළෙඳපොළ ඉහළ යාමක් සනිටුහන් කරමිනි. වසර දෙකක කාලයක් තුළ දී තනි දිනක දී කොටස් වෙළෙඳපොළ ඉහළ ගිය වැඩිම ඒකක ප්‍රමාණය ලෙසින් ද මෙය සටහන් වේ.

S&P SL20 දර්ශකය ද මෙදින අවසානයේ දී ඒකක 3,647.82 ක් දක්වා ඒකක 58.93 ක වර්ධනයක් සටහන් කළේය. මෙය පෙර දිනය හා සැසඳීමේ දී සියයට 1.64 ක ඉහළ යාමකි.

සියලු කොටස් මිල දර්ශකය අඛණ්ඩව ඉහළ ගිය 11 වන දිනය ලෙසින් 2017 අප්‍රේල් 12 වන දින සටහන් වන අතර 2016 නොවැම්බර් 15 වන දිනෙන් පසු වාර්තා වූ ඉහළම සියලු කොටස් මිල දර්ශක අගය ලෙසත්, 2015 පෙබරවාරි 06 වන දිනෙන් පසු තනි දිනක් තුළ වාර්තා වූ ඉහළම ප්‍රතිශතාත්මක වර්ධනය ලෙසත් මෙම ඉහළ යාම වාර්තා වේ.

විදෙස් ආයෝජන ඉහළට

පසුගිය බදාදා වන විට අඛණ්ඩව ගනුදෙනු දින 16 ක් පුරාවට ශුද්ධ විදේශීය ආයෝජනවල ගලා ඒමක් වාර්තා වී තිබිණි. මෙම වකවානුව තුළ දී රුපියල් බිලියන 5.22 ක ශුද්ධ මිල දී ගැනීමක් විදෙස් ආයෝජකයින් විසින් සිදු කර තිබේ. 2017 වසර ආරම්භයේ සිට අප්‍රේල් 12 වන දින දක්වා කාලය අතරතුර දී රුපියල් බිලයන 7.71 ක ශුද්ධ විදේශීය ආයෝජන ගලා ඒමක් වාර්තා වී ඇත.

මෙහිදී කොටස් වෙළෙඳපොළ විශ්ලේෂකයින් කියා සිටින්නේ ජෝන් කීල්ස් හෝල්ඩිංග්ස් හා ලංකා දුම්කොළ සමාගමේ කොටස් ආයෝජනය වෙනුවෙන් විදේශිකයින් වැඩි වශයෙන් යොමුව ඇති බවයි.

ජෝන් කීල්ස් කොටස් වෙළෙඳපොළට ජීවය දෙයි

අඛණ්ඩව දින 11 ක් පුරාවට කොටස් වෙළෙඳපොළ ඉහළ නගිද්දී තවත් එක් සුවිශේෂී තත්වයක් නිරීක්ෂණය කළ හැකිය. එනම් අවසාන ගනුදෙනු දින 10 පුරාවට ජෝන් කීල්ස් හෝල්ඩිංග්ස් කොටස් මිල කැපී පෙනෙන ලෙස අඛණ්ඩව වර්ධනය වී තිබීමයි.

2017 මාර්තු 28 දින රුපියල් 134.90 ක් ලෙසින් වාර්තා වූ ජෝන් කීල්ස් හෝල්ඩිංග්ස් කොටසක මිල අප්‍රේල් 12 දින ගනුදෙනු අවසානයේ දී රු. 17.10 කින් ඉහළ ගොස් රු. 152.00 ක් ලෙසින් සටහන් විය. මෙය සියයට 12.68 ක වර්ධනයකි.

එසේම මෙම වකවානුව තුළ දී ලංකා දුම්කොළ සමාගමේ කොටසක මිල රු. 865.00 සිට රු. 999.20 දක්වා රු. 134.20 කින් (15.51%) , සිලෝන් කෝල්ඩ් ස්ටෝර්ස් කොටසක මිල රු. 811.00 සිට රු. 937.70 දක්වා රු. 126.70 කින් (15.62%) සහ කොමර්ෂල් බැංකු කොටසක මිල රු. 129.00 සිට රු. 139.00 දක්වා රු. 10.00 කින් (7.75%) වර්ධනය වී ඇත.

Safety first

කෙසේ වෙතත් කොටස් වෙළෙඳපොළ විශ්ලේෂකයින් වැඩිදුරටත් මෙහිදී කියා සිටින්නේ ආයෝජකයින් වඩාත් කල්පනාකාරී විය යුතු මට්ටමකට කොටස් වෙළෙඳපොළ මේ වන විට පැමිණ ඇති බවයි. ඊට හේතූන් කිහිපයක් ඔවුන් විසින් සඳහන් කර සිටී.

තාක්ෂණික විශ්ලේෂණ (Technical analysis) ක්‍රමවලට අනුව කොටස් වෙළෙඳපොළ ඇගයීමේ දී මේ වන විට සියලු කොටස් මිල දර්ශකයේ RSI වටිනාකම 83.82 ක් ලෙසින් වාර්තා වේ. මාර්තු 27 දිනයේ දී මෙම අගය දැක්වුණේ 26.88 ක් පරිද්දෙනි.

RSI (Relative Strength Index)අගය යනු අවසාන ගනුදෙනු දින 14 ක කාලපරිච්ඡේදයක් තුළ කොටස් මිල උච්ඡාවචනය වීමේ සාපේක්ෂ ඇගයීම් ක්‍රමයකි. මෙය 0 හා 100 අතර අගයයක් ගනු ඇත. සාමාන්‍යයෙන් RSI අගය 30 ට වඩා අඩුවන අවස්ථාවක දී එම වෙළෙඳපොළ අධි විකුණුම් (Oversold) වෙළෙඳපොළක් ලෙසින් හඳුන්වන අතර ආයෝජකයින් හට ඉතා ආකර්ෂණීය මිල ගණන්වලට කොටස් මිල දී ගැනීමට අවස්ථාව හිමිවන බව කියැවේ. එබැවින් වෙළෙඳපොළේ ඇති සමාගම් කොටස් ඉතා අඩු මිල ගණන්වලට හෙවත් ‘කුණු කොල්ලයට‘ මිල දී ගැනීමට අවශ්‍ය නම් RSI අගය 30 ට වඩා අඩුවෙන් පවතින අවධියේ දී ආයෝජකයින් විසින් කොටස් මිල දී ගැනීම ආරම්භ කළ යුතු බව මෙම සිද්ධාන්තයේ සරල අදහසයි.

එසේම මෙම අගය 70 ඉක්මවන අවස්ථාව යනු අධි ගැනුම් (Overbought) තත්ත්වයක් නිර්මාණය වී තිබෙන අවස්ථාවකි. එනම් සමාගම් කොටස් සඳහා නෛසර්ගික වටිනාකමට වඩා වැඩි මිලක් නියම වී ඇති තත්ත්වයකි. ඇතැම් විට මෙය වෙළෙඳපොළ තුළ කෘතිමව මිල නියම වූ අවස්ථාවක් ද විය හැකියි. එබැවින් ආයෝජකයෝ මෙම අවධියේ දී බෙහෙවින් කල්පනාකාරී විය යුතුවේ. RSI අගය පහළ මට්ටමක පැවති අවස්ථාවක දී මිල දී ගනු ලැබූ කොටස් විකුණු දැමීමට සුදුසුම කාලපරිච්ඡේදය ලෙසින් මෙම වකවානුව හඳුන්වයි. අප්‍රේල් 12 වන දින වන සියලු කොටස් මිල දර්ශකයට අනුව වෙළෙඳපොළ RSI අගය 80 මට්ටම ද ඉක්මවා ගොස් තිබෙන අතර එයින් කියැවෙන්නේ වෙළෙඳපොළ තුළ අධි ගැනුම් තත්ත්වයක් වී ඇති බවකි.

බාහිර සාධක ගැන සීරුවෙන්

කෙසේ වෙතත් RSI යනු හුදු ගණිතමය ඇගයීමක් පමණි. එහිදී බාහිර සාධක පිළිබඳ අවධානයක් යොමු නොවේ. 2017 මාර්තු 31 යනු 2016/17 මූල්‍ය වර්ෂයේ අවසාන දිනයයි. ඉදිරි දින කිහිපයේ දී මෙම මූල්‍ය වර්ෂයට අදාළ කාර්තුමය හා වාර්ෂිකමය මූල්‍ය වාර්තා එළි දැකීමට නියමිතය. එහිදී ඉහළ කාර්ය සාධනයක් වාර්තා කර ඇති සමාගම් දෙස අවධානය යොමු කිරීමේ දී RSI වැනි ගණිතමය ඇගයීම් ක්‍රම පිළිබඳ එතරම් සැලකිල්ලක් යොමු කළ යුතු නොවේ. මක් නිසාද යත් සමාගම්වල ආදායම්, ලාභදායීත්වය වැනි කරුණු මත තවදුරටත් කොටස් මිල ගණන්වල වර්ධනයක් බලාපොරොත්තු විය හැකි බැවිනි.

එසේම ශ්‍රී ලංකා මහ බැංකුව විසින් පසුගිය මාසයේ දී ගනු ලැබූ ප්‍රතිපත්ති පොළී අනුපාතික ඉහළ දැමීමේ තීරණයත් සමඟම වෙළෙඳපාළ පොළී අනුපාතික තවදුරටත් ඉහළ යන තත්ත්වයක් නිර්මාණය විය හැකිය. මේ හේතුව මත ආයෝජකයෝ කොටස් වෙළෙඳපොළ වැනි අවදානම් සහිත ආයෝජන මාර්ගවලින් බැහැරව ඉහළ ස්ථාවර ප්‍රතිලාභයක් හිමිවන රජයේ සුරැකුම්පත් වැනි ආයෝජන ක්‍රම වෙත විතැන් වීමට වැඩි හැකියාවක් පවතී. එමෙන්ම ඉදිරියේ දී විදෙස් ආයෝජනවල තවදුරටත් වර්ධනයන් දැකිය හැකි වන්නේ නම් එය කොටස් වෙළෙඳපොළ කෙරෙහි වඩාත් හිතකර තත්ත්වයක් නිර්මාණය කරනු නිසැකය.