January, 15, 2021
වත්මන් රජයේ ප්‍රතිපත්තීන් දියත් කරන ආකාරය බොහෝ දෙනාගේ විශ්වාසය ඉහළ නැංවීමට සමත් වී ඇති බවත්, එය කොටස් වෙළෙඳපොළේ ප්‍රගතිය හරහා මනාව පිළිබිඹු වන බවත් මුදල්, ප්‍රාග්ධන වෙළෙඳපොළ හා රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍ය අජිත් නිවාඩ් කබ්රාල් මහතා පවසයි. වර්තමාන කොටස් වෙළෙඳපොළ ක්‍රියාකාරීත්වය පිළිබඳ අදහස් දක්වමින් රාජ්‍ය අමාත්‍යවරයා මේ බව කියා සිටියේය.
මෙහිදී වැඩිදුරටත් අදහස් දැක්වූ මුදල්, ප්‍රාග්ධන වෙළෙඳපොළ හා රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍ය අජිත් නිවාඩ් කබ්රාල් මහතා,
“නව රජය පත්වූවායින් පසු අප රටේ ආර්ථිකමය විශ්වාසනීයභාවය ක්‍රමක්‍රමයෙන් වැඩිවෙනවා අපි දැක්කා. කොවිඩ් වසංගතය නිසා යම් ආකාරයකින් පසුබට වීමක් සිදුවුණත්, මේ රජයේ ප්‍රතිපත්තීන් දියත් කරන ආකාරය හා කටයුතු කරගෙන යන ආකාරය අනුව බොහෝ දෙනෙක් විශ්වාසනීයභාවය වැඩිකරගෙන තමන්ගේ ආයෝජන කෙරෙහි වැඩි සැලකිල්ලක් දක්වනවා අපි දැකලා තියෙනවා. ඒ නිසා තමයි කොටස් වෙළෙඳපොළේ ප්‍රගතිය ගැන අපි සතුටුදායක වෙන්නට හේතුව. අපේ රටේ තියෙන ආර්ථිකමය විශ්වාසනීයභාවය ඉහළ යෑම තමයි එයින් පිළිබිඹු වෙන්නේ. ඒ ගැන අපි සතුටු වෙනවා.“
“අපි දැක්කා පසුගිය කාලය තුළ දී පිරිවැටුම වැඩිවුණා, ඉතාමත්ම ඉහළ අගයකට ආවා, විදේශිකයන් යම් තැනකදී ඒ අයගේ ආයෝජන විකුණන්නට පෙළඹුණා නම් ඒවා මිල දී ගැනීමට ශ්‍රී ලාංකිකයන් ඉදිරිපත් වුණා. බොහෝ කාලයක් පුරාවට අපේ කොටස් වෙළෙඳපොළට තිබුණු එක විවේචනයක් තමයි අපේ කොටස් වෙළෙඳපොළේ තිබෙන ගැඹුරත්වය අඩුයි කියන එක. බොහෝ දෙනෙක් කිව්වා, මේ කොටස් මිල දී ගන්නට දේශීය ආයෝජකයන් නැහැ යි කියලා. ඒ නිසා අපිට පිටරටවලින් ආවොත් පමණයි මෙය හොඳ තැනකට ගේන්න පුළුවන් කියලා මතයක් තිබුණා. අද ඒ මතය නැතිවෙලා ගිහිල්ලා තිබෙනවා. විදේශිකයන් විකුණනවා නම් ශ්‍රී ලාංකිකයන් ඉන්නවා ගන්න. ශ්‍රී ලාංකිකයන් විකුණනවා නම් තවත් ශ්‍රී ලාංකිකයන් ඉන්නවා කොටස් මිල දී ගන්න. ඒ නිසා අද අපේ ප්‍රාග්ධනය වෙනුවෙන් තිබෙන ඒ වෙළෙඳපොළ ඉහළ මට්ටමකට ඇවිල්ලා තිබෙන බව අපට පෙනී යනවා. මෙය රඳා පවතින්නේ විශ්වාසනීයභාවය මත. අද මෙයින් පෙනී යන්නේ ඒ විශ්වාසනීයභාවය වැඩි වී තිබෙන බව.“
සබැඳි පුවත්,
Video Story
