රුපියල රැක ගන්න මහ බැංකුවෙන් දැඩි තීරණයක්. ස්වෛරී බැඳුම්කර මිල දී ගැනීම මෙරට බැංකුවලට තහනම් කරයි

    December, 28, 2020

    මෙම වසරේ මේ දක්වා කාලය තුළ දී බලපත්‍රලාභී බැංකු විසින් තරමක විශාල ආයෝජනයක් ශ්‍රී ලංකා ජාත්‍යන්තර ස්වෛරී බැඳුම්කර මිල දී ගැනීමේ දී ආයෝජනය කර ඇති බව නිරීක්ෂණය වී ඇතැයි ශ්‍රී ලංකා මහ බැංකුව පවසයි. එමෙන්ම බලපත්‍රලාභී බැංකු විසින් තවදුරටත් ගෙවුම් ශේෂයේ ජංගම ගිණුම වෙත ලැබෙන ගලාඒම් භාවිත කරමින් ශ්‍රී ලංකා ජාත්‍යන්තර ස්වෛරී බැඳුම්කර මිල දී ගැනීමට යොමුවන ආකාරයක් නිරීක්ෂණය වන බව ද මහ බැංකුව වැඩිදුරටත් කියා සිටී.

    ශ්‍රී ලංකා මහ බැංකුවේ මතය වී ඇත්තේ මෙය දේශීය විදේශ විනිමය වෙළෙඳපොළ වෙත අනවශ්‍ය පීඩනයක් ඇති කිරීමට හේතු වී ඇති බවයි.

    මෙම සංවර්ධනයන් සැලකිල්ලට ගනිමින් වහාම ක්‍රියාත්මක වන පරිදි මාස 03 ක කාලයක් සඳහා බලපත්‍රලාභී වාණිජ බැංකු සහ ජාතික ඉතිරිකිරීමේ බැංකුව විසින් ශ්‍රී ලංකා ජාත්‍යන්තර ස්වෛරී බැඳුම්කර මිල දී ගැනීම අත්හිටුවීමට ශ්‍රී ලංකා මහ බැංකුව නියෝග කර තිබේ.

    පසුගිය සතියේ දී එක්සත් ජනපද ඩොලරය විකුණුම් මිල රු. 194 සීමාව ඉක්මවා ගිය අතර එහිදී විනිමය අනුපාතිකයේ උච්චාවචනය මෑත දී වැඩිවීම අනවශ්‍ය හා පිළිගත නොහැකි බව ශ්‍රී ලංකා මහ බැංකුව කියා සිටියේය.

    ඒ අනුව, වෙනත් ක්‍රියාමාර්ග අනුගමනය කරන අතරම, මෙතැන් සිට ශ්‍රී ලංකා මහ බැංකුව දේශීය විදේශ විනිමය වෙළඳපොළෙහි මෙම උච්චාවචනය පාලනය කිරීමට සුදුසු ක්‍රියාමාර්ග ගනු ඇති බව නිවේදනයක් නිකුත් කරමින් මහ බැංකුව අවධාරණය කරන ලදී.