ලෝකයේ ලොකුම පොත් ප්‍රදර්ශනය “බිග් බෑඩ් වුල්ෆ්” ශ්‍රී ලංකාවේ දී

September, 9, 2019

ලෝකයේ විශාලතම පොත් සල්පිල වශයෙන් ප්‍රකට ‍බිග් බෑඩ් වුල්ෆ් පොත් ප්‍රදර්ශනය තෙවැනි වරටත් මෙරටදී පැවැත්වීම කටයුතු සංවිධානය කර තිබේ. ඔක්තෝම්බර් මස 18 වැනිදා සිට 27 වැනිදා දක්වා දින 10ක් කොළඹ ලේක්හවුස් ඉදිරිපිට ප්‍රදර්ශන හා සම්මේලන මධ්‍යස්ථානයේදී (SLECC) ආරම්භ වීමට නියමිත මෙම ප්‍රදර්ශනය සඳුදා සිට බ්‍රහස්පතින්දා දක්වා උදෑසන 10 සිට රාත්‍රී 10 දක්වාත්, සිකුරාදා සිට ඉරිදා දක්වා අඛණ්ඩව පැය 24 ක් පාඨකයන් වෙනුවෙන් විවෘතව පවතී.

මෙම ප්‍රදර්ශනයේ විශේෂත්වය වන්නේ,50%- 90% ක් දක්වා ඉහළම වට්ටම් සහිතව ලෝකයේ තිබෙන ඉහළම වටිනාකමින් යුත් පොතපත බිග් බෑඩ් වුල්ෆ් සල්පිලෙන් මිලදී ගත හැකි වීමයි. ශ්‍රී ලාංකික පාඨකයින් ඇලුම් කරන, ඉතා දුර්ලභ පොතපත මෙන්ම, සීමිත පිටපත් සංඛ්‍යාවෙන් යුතු විශිෂ්ට ගණයේ ඉංග්‍රීසි පොතපතද බිග් බෑග් වුල්ෆ් ප්‍රදර්ශනයෙන් මිලදී ගැනීමේ පහසුකම පාඨකයින්හට අත්විඳීමට එහිදී අවස්ථාව සැලසේ.

බිග් බෑඩ් වුල්ෆ් විසින් සාහිත්‍ය, කලාව, ඉතිහාසය, ව්‍යපාරික, ආගම, ක්‍රීඩා, විද්‍යාව හා තාක්ෂණය, ඉවුම් පිහුම් ආදී ක්ෂේත්‍ර ගණනාවක් නියෝජනය කරන ලක්ෂ පහළොවකට අධික පොත්පත් මෙවර පාඨකයින් වෙනුවෙන් වෙන් කර ඇත.