වාණිජකරණය වූ ක්‍රීඩාව වෙනුවෙන් නව ක්‍රීඩා පනතක් – රාජකාරි අරඹමින් ඇමති නාමල් කියයි

August, 18, 2020

වර්තමානය වන විට ක්‍රීඩාව වාණිජකරණය වී ඇති බවත් ඊට ගැළපෙන අයුරින් මෙරට ක්‍රීඩා පනත සකස් විය යුතු බවත් තරුණ හා ක්‍රීඩා අමාත්‍ය නාමල් රාජපක්ෂ මහතා පවසයි. අද (18) දින සිය ධූරයේ රාජකාරි අරඹමින් ඔහු මේ බව කියා සිටියේය.

මෙහිදී වැඩිදුරටත් අදහස් දැක්වූ තරුණ හා ක්‍රීඩා අමාත්‍ය නාමල් රාජපක්ෂ මහතා,

“මේ රටේ ක්‍රීඩාව හරි මාර්ගයට ගන්න සහ මේ රටේ ක්‍රීඩකයෝ වෘත්තීයමය ක්‍රීඩකයෝ බවට පරිවර්තනය කරන්න විශාල වගකීමක් තිබෙනවා. ඒ වෘත්තීයමය ක්‍රීඩකයෝ බවට අපේ ක්‍රීඩකයෝ පරිවර්තනය කරන්න දිගුකාලීන වැඩපිළිවෙලක් සඳහා යොමුවෙන්න ඕනේ. ඒ සඳහා අවශ්‍ය පසුබිම අපි නිර්මාණය කරන්න ඕනේ. ඒ සඳහා කරුණා කාරණා කිහිපයක් වෙත අපේ අවධානය යොමුවෙලා තියෙනවා.“

“විශේෂයෙන්ම 1973 තමයි ක්‍රීඩා පනත හදලා තියෙන්නේ. ඒ කියන්නේ විවෘත ආර්ථිකයටත් පෙර හදපු ක්‍රීඩා පනතක්. අද ලෝකය ඊට වඩා වෙනස් වෙලා. ක්‍රීඩාව වෙනස් වෙලා. ක්‍රීඩාව කොමර්ෂල් වෙලා. ක්‍රීඩාව අද ආර්ථිකයක් බවට පරිවර්තනය වෙලා. ලෝකයේ දියුණු වෙමින් පවතින රටවල ආර්ථිකයෙන් සියයට දෙකතුනක් එන්නේ ක්‍රීඩාවලින්. අසල්වැසි ඉන්දියාවේ අයි.පී.එල්. සහ ඒ වගේ අනෙකුත් ක්‍රීඩාවන් ගත්තත්, ඒක තමයි යථාර්ථය. ඒ පනත නැවත ප්‍රතිව්‍යූහගත කරන්න, අලුත් පනතක් ගේනවාද, පනත වෙනස් කරනවාද කියන කාරණය ගැන අපි අවධානය යොමු වෙලා තිබෙනවා.“

“මම විශ්වාස කරන්නේ අධිකරණ අමාත්‍යතුමා එක්කත් සාකච්ඡා කරලා අතිගරු ජනාධිපතිතුමාගේත් අගමැතිතුමාගේත් උපදෙස් පරිදි අලුත් ක්‍රීඩා පනතක් අපට ගේන්න පුළුවන් නම්, නූතනයට හරියන විදියට, ක්‍රීඩකයන්ට හරියන විදියට, ඒක තමයි ක්‍රීඩාව ලබන්න පුළුවන් ජයග්‍රහණය. ඒක සතියෙන් දෙකෙන් කරන්න පුළුවන් කාරියක් නෙමෙයි. අවුරුද්දක දෙකක කාලයක් අරගෙන, ජනතා අදහසුත් අරගෙන නව ක්‍රීඩා පනතක් අපි රටේ ගොඩනඟන්න ඕනේ.“