පොළී අනුපාතික ඉහළ නංවන්න මුදල් මණ්ඩලය තීරණය කරයි

අද දින ප්‍රකාශයට පත්කරන ලද මුදල් ප්‍රතිපත්ති විවරණයට අනුව ශ්‍රී ලංකා මහ බැංකුවේ ප්‍රතිපත්ති පොළී අනුපාතික පදනම් අංක 25 බැගින් ඉහළ දැමීමට මුදල් මණ්ඩලය තීරණය කර තිබේ.

මේ අනුව නිත්‍ය තැන්පතු පහසුකම් අනුපාතිකය(SDFR) 7% සිට 7.25% දක්වා ද, නිත්‍ය ණය පහසුකම් අනුපාතිකය (SLFR) 8.5% සිට 8.75% දක්වා ද ඉහළ දමා ඇත.

ව්‍යවස්ථාපිත සංචිත අනුපාතිකය (SRR) 7.5% මට්ටමේ නොවනස්ව පවතී.

2017 මාස තුනක් යන්නත් කලින් කොළඹ කොටස් සියයට 4 කින් වැටිලා

කොළඹ කොටස් වෙළෙඳපොළ අද දින ගනුදෙනු අවසානයේ දී සියලු කොටස් මිල දර්ශක අගය ඒකක 5,979.85 ක් ලෙසින් සටහන් විය. මෙය පෙර දිනය හා සැසඳීමේ දී ඒකක 16.80 ක හෙවත් සියයට 0.28 ක පහළ යාමකි.

2016 මාර්තු 15 දිනෙන් පසු වාර්තා වූ අවම සියලු කොටස් මිල දර්ශක අගය ලෙස මෙය වාර්තා වේ.

දිනය අවසානයේ දී S&P SL20 දර්ශකය ද ඒකක 11.73 ක පහළ යාමක් වාර්තා කළ අතර එහි අගය දැක්වුණේ ඒකක 3,411.96 ක් ලෙසිනි.

රුපියල් මිලියන 616.39 ක පිරිවැටුමක් අද දින ගනුදෙනුවලින් වාර්තා විය. මෙය 2017 වසරේ සාමාන්‍ය පිරිවැටුම් අගය වන රුපියල් මිලියන 671 ට වඩා පහළ අගයයකි.

2017 වසරේ මේ දක්වා කාලය තුළ සියලු කොටස් මිල දර්ශක අගය සියයට 3.99 කින් පහළ ගොස් තිබේ. S&P SL20 දර්ශකයට අනුව සියයට 2.42 කින් කොටස් වෙළෙඳපොළ කඩා වැටී ඇත.

සියලූම නිවාසවලට සුර්ය බල පද්ධති – රජයෙන් සහණ ණය වැඩපිළිවෙලක්

මාසික විදුලි බිල රුපියල් 2,000/-කට වඩා වැඩි නිවාසවල බලශක්ති අවශ්‍යතාව සූර්ය බලශක්තිය මඟින් සපුරාගැනීම දිරිමත් කිරීම සඳහා වන සහන ණය යෝජනා ක්‍රමයක් හඳුන්වා දීමට 2017 අයවැය මඟින් යෝජනා කෙරිණි.

එහෙත් මෙරට විදුලි පාරිභෝගිකයින්ගෙන් 40%කගේ පමණ මාසික විදුලි බිල රුපියල් 300/-ට වඩා අඩු බැවින්, එම වැඩසටහන වඩා සාර්ථකව ක්‍රියාත්මක කිරීම සඳහා, අදාළ ණය පොලී සහනය මුලින් සැලසුම් කළ පරිදි මාසික විදුලි බිල රුපියල් 2,000/-කට වඩා වැඩි ගෘහස්ත පාරිභෝගිකයන් සඳහා පමණක් සීමා නොකොට සියලුම ගෘහස්ත පාරිභෝගිකයින් සඳහා අදාළ කිරීමට රජය තීරණය කර ඇත.

මේ සඳහා රජයේ හෝ ඕනෑම පෞද්ගලික බැංකුවකින් ලබා ගන්නා ණය සඳහා ණය පොලී සහනය ලබා දීමටත්, ණය පොලී සහනය ලබා දීමට යෝජිත ණය මුදලේ සීමාව රුපියල් 150,000/- සිට රුපියල් 350,000/- දක්වා වැඩි කිරීමටත් විදුලිබල හා පුනර්ජනනීය බලශක්ති අමාත්‍ය රංජිත් සියඹලාපිටිය මහතා ඉදිරිපත් කළ යෝජනා අමාත්‍ය මණ්ඩලය විසින් අනුමත කර තිබේ.

ලංකාවේ වාහන ණය ප්‍රතිපත්තියෙන් ඉන්දියාවට දැඩි බලපෑම්

ශ්‍රී ලංකාවේ වාහන වෙ‍ළෙඳපොළ වෙත හඳුන්වා දී ඇති නව ප්‍රතිපත්ති හේතුවෙන් ඉන්දියාවේ ප්‍රමුඛතම වාහන නිෂ්පාදකයින් ගණනාවක්ම අසීරුතාවයට පත්ව ඇතැයි බිස්නස් ස්ටෑන්ඩර්ඩ් ප්‍රවෘත්ති සේවය වාර්තා කරයි.

මරුති සුසුකි, රෙනෝල්ට්, නිසාන් සහ බජාජ් වාහන නිෂ්පාදකයින්ගේ මෝටර් රථ අලෙවිය මේ හේතුවෙන් පහළ ගොස් ඇති බව එහි වැඩිදුරටත් වාර්තා වේ.

මීට පෙර මෝටර් රථ සඳහා එහි වටිනාකමෙන් සියයට 70 ක් දක්වා බැංකුවලින් මූල්‍ය පහසුකම් ලබා ගැනීමට හැකියාව තිබුණද අද වන විට එය මෝටර් රථ සඳහා සියයට 50 ක් දක්වාත් ත්‍රීරෝද රථ සඳහා සියයට 25 ක් දක්වා ත් සීමා කර තිබේ.

මෙම තත්ත්වය ඉන්දියානු මෝටර් රථ නිෂ්පාදකයින් හට සුවිශාල බලපෑමක් එල්ල කර ඇතැයි මෙහි වැඩිදුරටත් සඳහන් වේ.

ලංකා වෝල්ටයිල්ස්, ලංකා සෙරමික් මුල් පුටු ධම්මිකට

ලංකා සෙරමික් පීඑල්සී හා ලංකා වෝල්ටයිල්ස් පීඑල්සී හි අධ්‍යක්ෂ මණ්ඩල සාමාජිකයෙකු වන මෙරට ප්‍රමුඛ පෙළේ ව්‍යාපාරික ධම්මික පෙරේරා මහතා එම සමාගම් හි සභාපති ධුර සඳහා පත්කරනු ලැබූ බව අදාළ සමාගම් වෙනුවෙන් එහි සමාගම් ලේකම්වරයා වන පී.ඩබ්. කෝපරේට් සෙක්‍රෙට්රියල් (පුද්) සමාගම දන්වා සිටී.

2017 මාර්තු 15 වන දින සිට අදාල පත්කිරීම බලපැවැත්වෙන බව අදාළ නිවේදනයේ වැඩිදුරටත් සඳහන් වේ.

මේ අතර ලංකා වෝල්ටයිල් හා ලංකා සෙරමික් සමාගම් වල නියෝජ්‍ය සභාපතිවරයා වශයෙන් ඒ.එම්. වීරසිංහ මහතා පත්කර ඇත. තවද ස්විස්ටෙක් සිලෝන් සමාගමේ සභාපතිවරයා වශයෙන් ද ඒ මහතා පත්කර තිබේ.

මුදල් ප්‍රතිපත්තිය දැඩි වන ලකුණු. පොළී අනුපාත ඉහළට?

2017 වසර සඳහා සිදුකරනු ලබන දෙවන මුදල් ප්‍රතිපත්ති විවරණය හෙට (24) උදෑසන 7.30 ට ප්‍රකාශයට පත්කරනු ලබන බව ශ්‍රී ලංකා මහ බැංකුව නිවේදනය කර සිටී.

මෙවර විවරණය තුළින් මුදල් ප්‍රතිපත්තියේ දැඩිවීමක් අපේක්ෂා කළ හැකි බව මූල්‍ය අංශ ආරංචි මාර්ග සඳහන් කරනු ලබයි. මේ අනුව පොළී අනුපාතිකවල ඉහළ යාමක් අපේක්ෂා කළ හැකි බව ක්ෂේත්‍රයේ ප්‍රවීනයන්ගේ අදහසයි.

මේ අතර ජේවූ ලී මහතාගේ ප්‍රධානත්වයෙන් යුතු ජාත්‍යන්තර මූල්‍ය අරමුදලේ දූත මණ්ඩලය විසින් 2017 පෙබරවාරි 21 සිට මාර්තු 07 දක්වා කාලය තුළ සිදුකළ ශ්‍රී ලංකා සංචාරය නිමා කරමින් කියා සිටියේ, උද්ධමන පීඩන පිළිබඳව ශ්‍රී ලංකා මහ බැංකුව සුපරීක්ෂාකාරීව අධීක්ෂණය කර, උද්ධමනය හෝ ණය වර්ධනය පහළ යෑමක් සිදු නොවන්නේ නම් මුදල් ප්‍රතිපත්තිය දැඩි කිරීම සඳහා ශ්‍රී ලංකා මහ බැංකුව කටයුතු කිරීම කෙරෙහි ජාත්‍යන්තර මූල්‍ය අරමුදලේ දූත පිරිස දිරිමත් කරනු ලබන බවයි.

එබැවින් ජන හා සංඛ්‍යාලේඛන දෙපාර්තමේන්තුව විසින් ප්‍රකාශයට පත්කරනු ලබන ජාතික පාරිභෝගික මිල දර්ශකයට අනුව 2017 පෙබරවාරි මාසයේ උද්ධමනය සියයට 8.2 ක් ලෙසින් ඉහළ අගයක් වාර්තා වීම හරහා උද්ධමන පාලන ක්‍රමවේදයක් ලෙසින් සහ ණය වර්ධනය පාලනය කිරීමේ අරමුණු ඇතිව මුදල් ප්‍රතිපත්තියේ දැඩි වීමක් මෙවර අපේක්ෂා කළ හැකිවේ.

තවද ඊයේ (22) පැවති භාණ්ඩාගාර බිල්පත් වෙන්දේසියේ දීද පොළී අනුපාතිකවල ඉහළ යාමක් වාර්තා වූ අතර එහිදී දින 91 බිල්පත් පොළිය 9.47% සිට 9.57% දක්වාද, දින 182 බිල්පත් පොළිය 10.39% සිට 10.46% දක්වා ද, දින 364 බිල්පත් පොළිය 10.74% සිට 10.82% දක්වා ද ඉහළ යන ලදී.

මෙම වාතාවරණය තුළ වෙළෙඳපොළ ආරංචි මාර්ග සඳහන් කර සිටින්නේ ප්‍රතිපත්ති පොලී අනුපාතික පදනම් අංක 50 බැගින් ඉහළ යාමට හෙට දින මුදල් ප්‍රතිපත්ති විවරණය තුළින් බොහෝ දුරට ඉඩ ඇති බවයි.

නව දේශීය ආදායම් පනතට කැබිනට් අනුමැතිය

2016 වසරේ අයවැය යෝජනා අනුව, දැනට පවතින දේශීය ආදායම් පනත සරල සහ නව්‍යකරණය කිරීමේ අරමුණින් නව දේශීය ආදායම් පනතක් හඳුන්වාදීම සඳහා කටයුතු කෙරෙමින් පවතී.

යෝජිත නව පනත මඟින් පුළුල් බදු සහන ලබා දෙනු වෙනුවට ආදායම් මූලාශ්‍රවලට අදාළ නීති රීති පුළුල් කර බදු පදනම පුළුල් කිරීමටත්; බදු ගෙවන්නාගේ ආරක්ෂාව ඉහළ නංවාලමින් දේශීය ආදායම් දෙපාර්තමේන්තුවේ බදු පරිපාලන කටයුතු කාර්යක්ෂමව පවත්වාගෙන යා හැකි වන පරිදි නව බලතල එකතු කිරීමටත්; බදු පදනම දුර්වලවීම සඳහා පිළියම් යෙදීම සහ බදු ගෙවීම මඟ හැරීමට එරෙහිව ක්‍රියාත්මක වීමටත්; වඩා යහපත් බදු ව්‍යූහයක් ඇති කරමින් සංකීර්ණ නොවන මූලධර්ම මත පදනම්ව බදු පරිපාලනය නව්‍යකරණය කිරීමටත්; ප්‍රාග්ධන බදු ප්‍රතිපත්තිය ක්‍රියාත්මක කිරීමටත් සැලසුම් කරනු ලැබ ඇත.

ඒ අනුව, දැනට සකස් කරනු ලැබ ඇති සංකල්ප පත්‍රිකාව මත පදනම්ව, දේශීය ආදායම් නව පනත කෙටුම්පත් කිරීම සඳහා නීති කෙටුම්පත් සම්පාදක වෙත උපදෙස් දීම පිණිස අමාත්‍ය මණ්ඩලය අනුමැතිය හිමිව තිබේ.

LOLC සභාපති රාජා නානායක්කාර අභාවප්‍රාප්ත වෙයි

ලංකා ඔරික්ස් ලීසිං සමූහයේ (LOLC) සභාපති රාජා නානායක්කාර මහතා පසුගිය අඟහරුවාදා (21) සිංගප්පූරුවේ දී අභාවප්‍රාප්ත වී තිබේ. මියයන විට නානායක්කාර මහතා 77 වැනි වියෙහි පසුවිය.

මෙරට මෝටර් රථ ආනයන කර්මාන්තයේ ප්‍රමුඛ ආයතනයක් වූ ඉෂාර ට්‍රේඩර්ස් හි නිර්මාතෘවරයා වූ ඔහු ශ්‍රී ලංකා මෝටර් රථ ආනයනකරුවන්ගේ සංගමයේ සමාරම්භක සභාපතිවරයා ද විය.

ඉෂාර වැවිලි (පුද්) සමාගම, ඉෂාර ප්‍රොපර්ටි ඩිවලොපර්ස් සමාගම්වල සභාපතිවරයා ද වූ රාජා නානායක්කාර මහතා බ්‍රවුන් ඇන්ඩ් කම්පැනි පීඑල්සී හා බ්‍රවුන්ස් ඉන්වෙස්ට්මන්ට්ස් පීඑල්සී හි අධ්‍යක්ෂ මණ්ඩල සාමාජිකයෙකු වශයෙන් ද කටයුතු කරන ලදී.

අවුරුදු චාරිත‍්‍ර-වාරිත‍්‍ර වෙත ගනුදෙනුකරුවන් ළංකරවන HSBC

පැරණි සම්ප‍්‍රදායයන්ට ආදරය කරන්නට නව ලෝකය හුරු-පුරුදු කිරීම පහසු කාර්යයක් නොවේ. පරම්පරා ගණනාවක් පුරා පැවත එන ‘සම්ප‍්‍රාදයයන්’ වෙනුවෙන් ම ඉලක්ක කරගත් අවුරුදු ප‍්‍රවර්ධන කටයුත්තක් සමඟ ගනුදෙනුකරුවන් සිය සම්ප‍්‍රදායයන් වෙත ළඟා කරන්නට ්‍යීඊක්‍ මෙවර සැලසුම් කර ඇත.

සිංහල සහ දමිළ අලූත් අවුරුද්ද යනු විවිධ, වර්ණවත් හා අර්ථාන්විත සම්ප‍්‍රදායයන්ගෙන් යුතු උත්සවයක් බව HSBC දනියි. එම නිසා, මෙම නැකැත් වේලාවන් සැමරීමේ දී ගනුදෙනුකරුවන්ට අවශ්‍ය සෑමදෙයක් වෙනුවෙන් ම පමණක් නොව, සිංහල සහ දමිළ අලූත් අවුරුද්දේ දී ඉන් අනතුරුව සිදු කෙරෙන බොහෝ චාරිත‍්‍ර-වාරිත‍්‍ර වෙත ඔවුන් ළඟා කරන්නට අවශ්‍ය දේ සඳහා ද විස්මිත ඉතිරිකිරීම් ලබාදීමට HSBC කටයුතු කර ඇත.

නියමිත පැහැයකින් යුතු ඇඳුමෙන් සැරසීම ද අලූත් අවුරුදු චාරිත‍්‍රවලට අයත් විශේෂිත සුන්දර අංගයකි. උත්සව සමයේ හැඩ-වැඩ වෙන්නට HSBC ගනුදෙනුකරුවන්ට අවස්ථාව ලබාදෙන විශේෂ ඉතුරුම් රැසක් රෙදිපිළි වෙළඳ ආයතනයන් විශාල සංඛ්‍යාවක් වෙතින් ලබාගැනීමේ අවස්ථාව සලසා ඇත.

අලූත් අවුරුද්දට තෑගිබෝග බෙදා-හදා ගැනීමේ චාරිත‍්‍රය ද පහසුවන අන්දමේ ඉතුරුම් රැසක් HSBC පිරිනමා ඇත. සුප‍්‍රසිද්ධ වෙළඳ ආයතන 190ක ට වැඩි සංඛ්‍යාවක් සමඟ හවුල්කාරිත්වයෙන් යුතුව විලාසිතා, ආභරණ සහ අත්ඔරලෝසු, රූපලාවන්‍යාගාර, ස්පා සහ ව්‍යායාම් සඳහා වන ස්ථාන, ආහාර-පාන ගැනීම්, ගෘහ උපකරණ, සුපිරි වෙළඳසැල්, රක්ෂණ සහ තවත් බොහෝ දෑ සඳහා 50% දක්වා සුවිශේෂී ඉතුරුම් ගනුදෙනුකරුවන් වෙත ලබාදෙන්නට බැංකුව කටයුතු කර ඇත.

HSBC ශ‍්‍රී ලංකා හි අලෙවිකරණ හා සන්නිවේදන අංශ ප‍්‍රධානී, තරංග ගුණසේකර මහතා කියා සිටියේ, ”මේ වන විට වසර 125ක කාලයක් අප, ශ‍්‍රී ලංකාවේ ගනුදෙනුකරුවන් අතර සිටිනවා. මේ කාලය පුරාවට විවිධ සම්ප‍්‍රදායයන් සහ ඉපැරණි චාරිත‍්‍ර-වාරිත‍්‍ර අවුරුදු සමයේ දී අප විසින් දැක තිබෙනවා. නව ලෝකය වේගයෙන් යන ගමනේදී පැරණි සම්ප‍්‍රදායයන් එහා-මෙහාවීමට ඇති ඉඩකඩ වැඩියි. එකී සම්ප‍්‍රදායයන් අපේ ගනුදෙනුකරුවන් හට සිහිපත් කිරීමට කාලය මේ යැයි අප සිතනවා. ශ‍්‍රී ලාංකේය ගනුදෙනුකරුවන් අතරින් වැඩි පිරිසක් සිංහල දමිළ අලූත් අවුරුද්ද සමරන බැවින් ඔවුන් වෙත ළංවිය හැකි තවත් ආකාරයකි මේ” යනුවෙනි.

එපමණක් නොව නිවාඩු ගතකිරීම සඳහා වසරේ සුදුසුම කාලය ද අපේ‍්‍රල් මාසයයි. අවුරුදු සමරනු නොලබන ගනුදෙනුකරුවන් හට පවුලේ සියලූදෙනා සමඟ නිවාඩු ගතකිරීමට හැකියාව ලබාදෙන විශේෂ ඉතුරුම් සහිත දේශීය හෝටල් ගණනාවකි. පැරණි සම්ප‍්‍රදායයන් මෙන් ම අවුරුදු සමයේ සතුට ගෙනෙන රබන් ගැසීම් හා වෙනත් අවුරුදු ක‍්‍රීඩාවන්ට සහභාගිවී එම සතුට ලබන්නට ඔවුන්ට ද එම නිවාඩු ගතකිරීම්වල දී හැකියාව ලැබෙනු ඇත.

අපගේ සුවිශේෂී සුපිරි වෙළඳසැල් හවුල්කරු වන කීල්ස් සුපිරි වෙළඳසැල් වෙතින් උසස් තත්ත්වයේ භාණ්ඩ මිලදී ගෙන, අවුරුදු මේසය සරසන්නට කැවිලි-පෙවිලි සාදාගන්නට ද ගනුදෙනුකරුවන් හට හැකියාව ඇත. එසේම අලූත් අවුරුදු සමයේ දී නිවස සරසන නව ගෘහ උපකරණ ලබාගන්නට අබාන්ස් වෙත යන්න, විශේෂ ඉතුරුම් රැසක් සමඟ පොලී රහිත වාරික ගෙවීමේ සැලසුම් ද ඔබට එහි දී ලබාගත හැක.

ඉපැරණි අවුරුදු සම්ප‍්‍රදායයන් පිළිබඳ විස්තර සඳහා මෙන්ම සිංහල හා දමිළ අලූත් අවුරුද්ද වෙනුවෙන් සූදානම් කර ඇති ක‍්‍රියාකාරකම් මාලාව ගැන වැඩි විස්තර දැනගන්නටත් ශ‍්‍රී ලංකාවේ Facebook පිටුව බලන්න. නැතිනම්, අවුරුදු සමය වෙනුවෙන් දීමනා හා ඉතිරිකිරීම් සඳහා බැංකුවේ වෙබ් අඩවිය www.hsbc.lk වෙත පිවිසෙන්න.

සියලු කොටස් මිල දර්ශකය හය දහසෙන් පහළට

කොළඹ කොටස් වෙළෙඳපොළ සියලු කොටස් මිල දර්ශකය ඒකක 6,000 සීමාවෙන් මෙපිටට අද දින ගනුදෙනු අතරවාරයේ දී පැමිණියේය.

අද පස්වරු 1.15 ට පමණ මෙලෙස ඒකක හයදහසේ සීමාවෙන් පහළට සියලු කොටස් මිල දර්ශක අගය පැමිණි අතර 2016 මාර්තු 15 දිනෙන් පසු අදාළ මට්ටමට කොටස් වෙළෙඳපොළ ඇද වැටුණු පළමු අවස්ථාව මෙයයි.