UDA නිවාඩු නිකේතන දේශපාලන හිතවත්කම්වලට – මන්ත්‍රිවරු පවසති

June, 13, 2022

නාගරික සංවර්ධන අධිකාරිය යටතේ පවතින නිවාඩු නිකේතන පිළිබඳව පසුගිය (07) දා කෝප් කමිටුවේ දී අවධානය යොමුව තිබේ.

එහිදී පැමිණ සිටි මන්ත්‍රිවරු පවසා ඇත්තේ නාගරික සංවර්ධන අධිකාරිය යටතේ ඇති සෑම දිස්ත්‍රික්කයකම පවතින නිවාඩු නිකේතන පිහිටා තිබෙන්නේ එම දිස්ත්‍රික්කයේ දර්ශනීයම ස්ථානයක බවයි. මේ නිසා ටෙන්ඩර් ලබාදීමේදී රාජ්‍ය ආදායම වැඩි කරගැනීමට කටයුතු කළ යුතු බව ඔවුන් පෙන්වා ඇත.

එසේම මෙම නිවාඩු නිකේතන කුලියට ලබාගන්නා පිරිස් ඇතැම් විට දේශපාලන හිතවත්කම් මත ලබාගැනීම සිදුවන බවත් මෙහිදී පැමිණ සිටි මන්ත්‍රීවරු පෙන්වා දී ඇති අතර මෙම නිවාඩු නිකේතන නිසියාකාරව නඩත්තු නොකිරීම නිසා අබලන් තත්ත්වයකට පත් වී ඇති බවද සඳහන්වී තිබේ.

තවද 2011 වර්ෂයේ පිහිටවූ රෙස්ට් හවුස් සමාගමට අදාළ මෙම නිවාඩු නිකේතනවලට ක්‍රියාකාරීත්වය පිළිබඳවද මෙහිදී සාකච්ඡා විය.

මේ අනුව කෝප් සභාපතිවරයා නිර්දේශ කළේ මෙම නිවාඩු නිකේතන අලුත්වැඩියා කිරීම පිළිබඳවද සැලසුමක් ඇතුළත්කොට මේ පිළිබඳ මාසයක් ඇතුළත වාර්තාවක් ලබා දෙන ලෙසයි.