ආචාර්ය ජයන්ත ධර්මදාස සිංගප්පූරුවේ කීර්තිමත් මහජන සේවා තරු සම්මානයෙන් පිදුම් ලබයි

April, 29, 2021

 

සිංගප්පූරුවේ ශ‍්‍රී ලංකා කොන්සල් ජෙනරාල්වරයා ලෙස කටයුතු කරන ආචාර්ය ජයන්ත ධර්මදාස මහතා සිංගප්පූරු ජනතාව වෙත සිදු කළ ධානාත්මක සහ අමිල වූ දායකත්වය වෙනුවෙන් එරට කීර්තිමත් මහජන සේවා තරු සම්මානයෙන් පිදුම් ලැබීය. සිංගප්පූරුවේ ජනාධිපතිනි ගරු හලීමා යාකුබ් මහත්මිය විසින් අපේ‍්‍රල් 4වන දිනට යෙදුනු එරට ජාතික දින සම්මාන උළෙලේදී මෙම සම්මානය ප‍්‍රදානය කරනු ලැබුවාය.

‘‘ ජීවිතකාලයට එක් වරක් පමණක් දිනා ගත හැකි මෙම සම්මානය ලැබීම පිළිබඳව මම නිහතමානිව සතුටු වන අතර සිංගප්පූරු ජනතාව වෙත මගේ සේවය ලබා දීමට හැකි වීම මා ලද භාග්‍යක් කොට සලකනවා. වසර 50 කට අධික කාලයක් පුරා ආර්ථික , සමාජීය සහ සංස්කෘතික වශයෙන් ඉතා සාධනීය මිතු දමක් ශ‍්‍රී ලංකාව සහ සිංගප්පූරුව අතර පවතිනවා. විශේෂයෙන්ම ශ‍්‍රී ලංකාවේ අඳුරු කාලසීමාවන් තුළදී සිංගප්පූරුව දැකවූ දායකත්වය වඩාත් හෘදයාංගම ලෙස සිහිපත් කරන අතරම ඉදිරියේදීත් ශ‍්‍රී ලංකා සිංගප්පූරු මිතුදම වඩාත් ශක්තිමත්ව පවත්වාගෙන යෑමට හැකි වෙතැයි මම විශ්වාස කරනවා.’’ යනුවෙන් සිංගප්පූරුවේ ශ‍්‍රී ලංකා කොන්සල් ජෙනරාල් වරයා සහ නවලෝක රෝහල් සමූහයේ සභාපති ආචාර්ය ජයන්ත ධර්මදාස මහතා පැවසීය.

කීර්තිමත් මහජන සේවා තරු සම්මානය 1963 පළමු වරට පිරිනැමූ අතර එතැන් සිට මේ දක්වා කලාවෙන්, ව්‍යාපාරික ක්ෂේත‍්‍රයෙන්, ක‍්‍රීඩාවෙන්, විද්‍යාවෙන්, කම්කරු ව්‍යාපාරයන්ගෙන්, සිංගප්පූරු ජනතාව වෙත අමිල වූ කාර්යභාරයක් සිදු කරන පුද්ගලයින් මෙම සම්මානයෙන් ඇගයුමට ලක් කරයි.

2019 වසරේ ඇතිවූ පාස්කු බෝම්බ ප‍්‍රහාරයෙන් අනතුරුව සංචාරකයින් ලෙස මෙරට සිටි සිංගප්පූරු ජාතිකයින්ට අවශ්‍ය පහසුකම් තොරතුරු සහ ආරක්ෂාව නොපමාව සලසමින් ඔවුන් යළි සියරට වෙත යැවීම සඳහා දැඩි කැපවීමකින් කටයුතු කිරීමට සිංගප්පූරුවේ ගරු කොන්සල් ජෙනරාල්වරයා ලෙස කටයුතු කරන ආචාර්ය ජයන්ත ධර්මදාස මහතා පියවර ගන්නා ලදි.

නවලෝක රෝහල් සමූහයේ සභාපතිවරයා ලෙස සිය කාර්ය මණ්ඩලය අනෙකුත් රජයේ සහ පුද්ගලික රෝහල් වෙත යොමු කර පාස්කු බෝම්බ ප‍්‍රහාරයෙන් විපතට පත් වූවන් පිළිබඳව පුද්ගලිකව සොයා බැලූ අතර ප‍්‍රධාන අධිකරණ වෛද්‍ය නිලධාරීවරයාගේ සහාය මෙම සංචාරකයින්ට ලබා දීමට ද කටයුතු කළේය. ආචාර්ය ජයන්ත ධර්මදාස මහතා සහ කොන්සල් ජෙරාල් කාර්යමණ්ඩලය මෙහිදී පෙන්නුම් කළ කාර්යශූර බව හේතුවෙන් ඉතා කෙටි කාලයක් තුළ මෙම සිද්ධියට මුහුණ පෑ සියලූ සිංගප්පූරු ජාතිකයින්ගේ තොරතුරු ඔවුන්ගේ පවුල්වල සාමාජිකයින් සමග හුවමාරු කර ගනිමින් ඔවුන් ඉතා ඉක්මනින් සිංගප්පූරුව වෙත යැවීමට කටයුතු කරන ලදි. විශේෂයෙන්ම සිංගප්පූරු ජාතිකයින් පෙරළා සිය රට වෙත යැවීමේදි ගුවන් ප‍්‍රවේශ පත‍්‍ර වෙන් කිරීම, විදේශ කටයුතු අමාත්‍යංශය මගින් නිකුත් කරන මාර්ගෝපදේශයන් පරිදි සිංගප්පූරු ජාතිකයින්ගේ විගමනික කටයුතු පිළියෙළ කර දීම වැනි අත්‍යාවශ්‍ය කටයුතු වේගයෙන් සිදු කිරීමට කොන්සල් ජෙනරාල් කාර්යාලයට හැකි වූ අතර මේ හේතුවෙන් මතු වෙන්නට තිබූ බොහෝ ගැටලූ නිරාකරණය කරගැනීමට කොන්සල් ජෙනරාල් කාර්යාලයට හැකි විය.

මෙරට සිංගප්පූරුවේ කොන්සල් ජෙනරාල්වරයා ලෙස ආචාර්ය ජයන්ත ධර්මදාස මහතා විශාල කාර්යභාරයක් සිදු කළ අතර ශ‍්‍රී ලංකාව සහ සිංගප්පූරුව අතර ද්වීපාර්ෂ්වික රාජ්‍යතාන්ත‍්‍රික සම්බන්ධතා ශක්තිමත්ව පවත්වාගෙන යෑමට ද සමත් විය. ආචාර්ය ජයන්ත ධර්මදාස මහතා සිංගප්පූරු රාජ්‍ය විසින් විවිධ රාජ්‍ය සඳහා පත්කරනු ලැබූ ගරු කොන්සල් ජෙනරාල්වරුන් 33 අතරට අයත් වෙති. මෙරට ව්‍යාපරික ක්ෂේත‍්‍රයේ දැනුම සහ අත්දැකීම් සම්භාරයකින් හෙබි ප‍්‍රමුඛතම චරිතයක් වන ජයන්ත ධර්මදාස මහතා සිංගප්පූරුවේ ව්‍යාපාරික අවස්ථා සඳහා මෙරට ව්‍යාපාරිකයින්ට අවස්ථාව සලසා දුන් අතර සිංගප්පූරු ආයෝජනයන් සඳහා මෙරට තුළ අවශ්‍ය පහසුකම් සලසා දීමට ද කටයුතු කළේය.

වසර 41 ව්‍යාපාරික, විධායක සහ කළමණාකරණ ක්ෂේත‍්‍රයන්හි හසල අත්දැකීම් සහිත ආචාර්ය ජයන්ත ධර්මදාස මහතා වසර 36ක් ශ‍්‍රී ලංකාවේ පුද්ගලික රෝහල් ක්ෂේත‍්‍රයේ උන්නතිය වෙනුවෙන් සිය දායකත්වය ලබා දී ඇත. ඔහුගේ දුරදක්නා නායකත්වය හේතුවෙන් වර්තමානය වන විට නවලෝක රෝහල් සමූහය මෙරට පුද්ගලික රෝහල් ක්ෂේත‍්‍රයේ ඉදිරියෙන්ම සිටින රෝහල බවට පත් වී ඇති අතර නූතන වෛද්‍ය පහසුකම් විශේෂඥ වෛද්‍ය සේවාව මත ආසියානු කලාපයේ ද ප‍්‍රමුඛතම රෝහල් ජාලයක් බවට පත් වී ඇත. මේ හේතුව නිසා ශ‍්‍රී ලංකාවේ පමණක් නොව දකුණු ආසියානු කලාපයේ ද පුද්ගලික රෝහල් ක්ෂේත‍්‍රයේ සන්ධිස්ථානයක් සනිටුහන් කිරීමට නවලෝක රෝහල් සමූහයට හැකි ව ඇත.

ඔස්ටේ‍්‍රලියාවේ කීර්තිමත් ස්වින්බර්න් තාක්ෂණික විශ්වවිද්‍යාලයේ ගෞරව ආචාර්ය උපාධියකින් ආචාර්ය ජයන්ත ධර්මදාස මහතා පිදුම් ලැබිය. මීට අමතරව ශ‍්‍රී ලංකා ටෙලිකොම් ආයනයේ අධ්‍යක්ෂ මණ්ඩල සමාජිකයකු ලෙසත්, ශ‍්‍රී ලංකා ක‍්‍රිකට් සහ ආසියානු ක‍්‍රිකට් සංගමයේ සභාපතිවරයා ලෙසද කටයුතු කරන ලදි. මීට අතිරේකව චිත‍්‍රපට සංස්ථාවේ සභාපති ධූරය හා ශ‍්‍රී ලංකා රූපවාහිනි සංස්ථාවේ අධ්‍යක්ෂ මණ්ඩල සාමාජිකයකු ලෙස කටයුතු කරයි. චිත‍්‍රපට, සංගීත ක්ෂේත‍්‍රයේ නියුතු කලාකරුවන්ගේ සුභසාධනය වෙනුවෙන් පිහිටුවා ගනු ලැබූ සිනේස්ටාර් සහ ඔස්කා පදනමේ සභාපති ධූරයද වර්තමානයේ ශ‍්‍රී ලංකා ක‍්‍රිකට් හි උප සභාපති ධූරයද හොබවයි.