නිල ඉදිරිපත් කිරීම් සහකරු බ්‍රැන්ඩික්ස් වෙතින් ජාතික ඔලිම්පික් සංචිතයට පිබිදුණු විසඳුම්

July, 20, 2021

ශ්‍රී ලංකාවේ ඇඟලුම් නිෂ්පාදන කර්මාන්තයේ ප්‍රමුඛයෙකු වන බ්‍රැන්ඩික්ස් ඇපරල් සමාගම 2020 ටෝකියෝ ඔලිම්පික් ක්‍රීඩා උළෙල සඳහා ශ්‍රී ලංකා කණ්ඩායමේ නිල ඉදිරිපත් කිරීම් සහකරුවකු ලෙස ඉදිරිපත් වී ඇත. ඒ සඳහා වන සංකේතීය අනුග්‍රාහකත්ව චෙක්පත බ්‍රැන්ඩික්ස් ඇපරල් සොලියුෂන්ස් සමාගමේ ප්‍රධාන විධායක නිලධාරී රජීව් මලලසේකර මහතා විසින් ශ්‍රී ලංකා ජාතික ඔලිම්පික් කමිටුවේ සභාපති සුරේෂ් සුබ්‍රමනියම් මහතා වෙත පිළිගන්වන ලදී. ටෝකියෝ ඔලිම්පික් උළෙලට සහභාගී වන ක්‍රීඩක ක්‍රීඩිකාවන්ට උපහාරයක් ලෙස හා අනුග්‍රාහක සමාගම් හඳුන්වාදීම සඳහා පැවති විශේෂ උත්සවයකදී මෙම චෙක්පත පිරිනැමීම සිදුවිය.

මෙම අනුග්‍රාහකත්වයේ එක් පියවරක් ලෙස, ශ්‍රී ලංකා ඔලිම්පික් කණ්ඩායම වෙනුවෙන් විශේෂ ටී ෂර්ට් එකතුවක් නිර්මාණය කිරීමට බ්‍රැන්ඩික්ස් සමාගම කටයුතු කළේ ය. බ්‍රැන්ඩික්ස් සමූහ ව්‍යාපාරයේ සමාගමක් වන ටීජේ ලංකා (Teejay Lanka) සමාගමේ නිර්මාණයක් වන මෙම ටී ෂර්ට් එකතුව සඳහා, ප්‍රතිචක්‍රීකරණය කරන ලද ප්ලාස්ටික් පෙට් (PET) බෝතල් වලින් නිපදවන ලද මූලික පොලියෙස්ටර් රෙදි වර්ගයක් භාවිතා වී තිබේ. ශ්‍රී ලංකාවේ වෙරළ තීරයෙන් එක්රැස් කරගන්නා ලද පෙට් බෝතල් භාවිතා කරමින්, ඉකෝ ස්පින්ඩ්ල්ස් (Eco Spindles) සමාගමේද සහයෝගය ඇතිව මෙම රෙදි වර්ගය නිපදවා ඇත. ‘Smart Undyed’ තාක්ෂණය භාවිතයෙන් මෙම රෙදි වර්ගය වැඩිදුර සැකසීම සිදුකරනු ලබන නිසා කෘත්‍රිම ඩයි වර්ග කිසිසේත්ම භාවිතා නොවන අතර, 85% ක් ජලයද, 12% ක බලශක්ති ඉතිරියක්ද එමගින් හිමි වේ. මේ ආකාරයට ප්‍රතිචක්‍රීකරණය කරන ලද අමුද්‍රව්‍ය සහ පිරිමැසුම්දායක බලශක්ති භාවිතය මගින් බෙහෙවින් තිරසාර නිෂ්පාදනයක් බවට පත්වී ඇති මෙම ක්‍රීඩා ඇඟලුම් සඳහා, දියුණු තෙතමන කළමනාකරණ තාක්ෂණයක් සහ බැක්ටීරියා-නාශක තාක්ෂණයක්ද භාවිතා කර ඇත. එම නිසා එම ඇඟලුම් වලට තෙතමනය උරාගෙන වාෂ්පීකරණය කිරීමේ ඉහළ හැකියාවක් ඇති අතර, එමනිසා එමගින් ක්‍රීඩක ක්‍රීඩිකාවන්ගේ සමට කිසිදු බලපෑමක් ද ඇති නොවේ.

“2020 ටෝකියෝ ඔලිම්පික් ක්‍රීඩා උළෙලට සහභාගී වන අපගේ අතිදක්ෂ ක්‍රීඩක ක්‍රීඩිකාවන්ට අත්වැලක් වීම සඳහා, ඉදිරිපත් කිරීම් සහකරුවෙකු ලෙස ජාතික ඔලිම්පික් කමිටුව සමග අත්වැල් බැඳගැනීමට ලැබීම අප ලැබූ ගෞරවයක් ලෙස අප සලකනවා. බ්‍රැන්ඩික්ස් හි අපගේ ඒකායන පරමාර්ථය වන්නේ  'පිබිදුණු මිනිසුන් තුළින් පිබිදුණු විසඳුම් ලබා දීමයි. එබැවින් සිරස් සැපයුම් දාමයක් සහ තිරසාර උත්සාහයක් ඒකාබද්ධ කරමින් ‘අපගේ පිබිදුණු මිනිසුන් වෙතින් ඔබට’ යන චින්තනයෙන් ජාතික ඔලිම්පික් කණ්ඩායම වෙනුවෙන් නවතම ඇඟලුම් පෙළක් හඳුන්වාදීමට අවස්ථාව ලැබීම ගැන අප බෙහෙවින් සතුටු වනවා. පිබිදුණු දැක්ම විශිෂ්ටත්වයේ පදනම බව අප විශ්වාස කරන අතර, අපගේ කණ්ඩායම ශ්‍රී ලංකාවට ගෞරවයක් රැගෙන ඒමට දරන මේ උත්සාහයේදී ඔවුන්ට මෙලෙස අත්වැලක් වීමට ලැබීම, බ්‍රැන්ඩික්ස් පවුලේ අප සියලු දෙනාටම විශාල සතුටක්.” යනුවෙන් බ්‍රැන්ඩික්ස් ඇපරල් සොලියුෂන්ස් සමාගමේ ප්‍රධාන විධායක නිලධාරී රජීව් මලලසේකර මහතා පැවසී ය.

“පසුගිය වසර එකහමාරක පමණ කාලය අප කාටත් අතිශයින් අභියෝගකාරී කාලපරිච්ඡේදයක් වුණා. එවැනි පසුබිමක් තුළ ශ්‍රී ලංකා කණ්ඩායමේ ක්‍රීඩක ක්‍රීඩිකාවන් මෙන්ම මෙම ක්‍රියාවලියට සම්බන්ධ වූ අනෙකුත් සියලුම දෙනා පෙන්නුම් කළ උනන්දුව හා කැපවීම ගැන අප සැබැවින්ම ආඩම්බර වනවා. එමෙන්ම සියලු බාධක ජයගනිමින් ශ්‍රී ලංකා ජාතික ඔලිම්පික් කමිටුව සමග අත්වැල් බැඳගෙන, ශ්‍රී ලංකා ඔලිම්පික් කණ්ඩායමට 2020 ටෝකියෝ ඔලිම්පික් තරගාවලියට සහභාගී වීම සඳහා අත්වැල සැපයූ බ්‍රැන්ඩික්ස් සමාගම ඇතුළු අනුග්‍රාහක භවතුන් සියලුම දෙනා අප වෙත ලබාදුන් සහයෝගයටද අපගේ නොමඳ කෘතඥතාව හිමිවිය යුතුයි.” ශ්‍රී ලංකා ජාතික ඔලිම්පික් කමිටුවේ සභාපති සුරේෂ් සුබ්‍රමනියම් මහතා පැවසී ය.

2020 ටෝකියෝ ඔලිම්පික් ක්‍රීඩා උළෙලට මැටිල්ඩා කාල්සන් (අශ්වාරෝහක), නිලානි රත්නායක සහ යුපුන් අබේකෝන් (ජවන හා පිටිය),  නිලූක කරුණාරත්න (බැඩ්මින්ටන්), මැතිව් අබේසිංහ සහ අනිකා ගෆූර් (පිහිනුම්), මිල්කා ගිහානි ද සිල්වා (ජිම්නාස්ටික්)චාමර ධර්මවර්ධන (ජූඩෝ)සහ ටෙහානි එගොඩවෙල (වෙඩි තැබීම) ඇතුළු ක්‍රීඩක ක්‍රීඩිකාවන් ශ්‍රී ලංකාව නියෝජනය කරමින් සහභාගි වීමට නියමිතය.

 

2018 දී ශ්‍රවණාබාධිතයන් සඳහා වූ අයිසීසී විස්සයි 20 ලෝක කුසලානය දිනාගත් ජාතික ක්‍රිකට් කණ්ඩායමේ සාමාජිකයින් වූ බ්‍රැන්ඩික්ස් කණ්ඩායම් සාමාජිකයින් දෙදෙනෙකු ශ්‍රී ලංකා ඔලිම්පික් කණ්ඩායමේ නිලූක කරුණාරත්න වෙත විශේෂ ටී ෂර්ට් පිරිනැමූහ.

Video Story

Stock Market

Exchange Rates