කොළඹ කොටස් වෙළෙඳපොළ ලැයිස්තුගත සමාගමක් වන ටෝකියෝ සිමෙන්ට් කම්පැනි (ලංකා) පීඑල්සී හි කොටස් ප්‍රාග්ධනයෙන් ඡන්ද බලය හිමි සහ නිෂ්ඡන්ද යන කොටස් වර්ග දෙකෙන්ම 10% බැගින් වූ කොටස් හිමිකාරීත්වයක් තහවුරු කිරීමට සේවක අර්ථසාධක අරමුදල (EPF) සමත් වී ඇත.

ටෝකියෝ සිමෙන්ති සමාගමේ ලේකම් සමාගම විසින් ඊයේ (03) දින මේ බව කොළඹ කොටස් හුවමාරුව වෙත නිල වශයෙන් දැනුම් දී ඇත. වෙළඳපොළ ගනුදෙනු මාලාවක් හරහා මෙම කොටස් අත්පත් කර ගැනීම සිදු කර තිබේ.

කොළඹ කොටස් හුවමාරුව වෙත ඉදිරිපත් කළ නිවේදනයට අනුව, සේවක අර්ථසාධක අරමුදල විසින් සමාගමේ නිෂ්ඡන්ද කොටස් සහ ඡන්ද හිමි කොටස් අත්පත් කර ගත් ආකාරය පහත පරිදි වේ:

• නිෂ්ඡන්ද කොටස් (Non-voting shares): 2025 දෙසැම්බර් 31 වන විට සේවක අර්ථසාධක අරමුදල සතුව පැවතියේ නිෂ්ඡන්ද  කොටස් 6,207,876ක් පමණක් වන අතර එය සමස්ත නිෂ්ඡන්ද  කොටස්වලින් 4.22%ක ප්‍රමාණයකි. නමුත් 2026 මාර්තු 31 වන විට එම ප්‍රමාණය නිෂ්ඡන්ද  කොටස් 14,701,500 දක්වා ඉහළ ගොස් අතර, එමගින් 10%ක සීමාව සපුරාලීමට අරමුදල සමත් විය.
• ඡන්ද හිමි කොටස් (Voting shares): 2026 මාර්තු 31 වන විට සේවක අර්ථසාධක අරමුදල සතුව ටෝකියෝ සිමෙන්ති සමාගමේ ඡන්ද හිමි කොටස් 22,879,611ක් පැවති අතර එය නිකුත් කළ සමස්ත ඡන්ද හිමි කොටස්වලින් 7.78%කි. පසුව සිදු කළ මිලදී ගැනීම් හරහා 2026 ජූනි 30 වන විට එම ප්‍රමාණය කොටස් 29,403,000 දක්වා වැඩි වූ අතර, එමගින් ඡන්ද හිමි කොටස් හිමිකාරීත්වය ද 10% දක්වා ළඟා විය.

මේ අනුව, සේවක අර්ථසාධක අරමුදල ටෝකියෝ සිමෙන්ට් කම්පැනි (ලංකා) පීඑල්සී සමාගමේ ඡන්ද හිමි සහ නිෂ්ඡන්ද කොටස් යන අංශ දෙකෙන්ම 10% බැගින් වූ කොටස් හිමිකාරීත්වයක් නිල වශයෙන් තහවුරු කරගෙන ඇත.