May, 26, 2022
අපනයන ඉලක්ක කරගත් ආර්ථිකයක් පදනම් කරගනිමින් ප්‍රතිපත්ති තීරණ ගැනීමේ අවශ්‍යතාව අග්‍රාමාත්‍ය රනිල් වික්‍රමසිංහ මහතා පෙන්වා දෙයි. අද (26) පෙරවරුවේ දී අග්‍රාමාත්‍යවරයා බැංකු ප්‍රධානින් හමු වූ අතර රට මුහුණදෙන ආර්ථික අර්බුදය ජය ගත හැක්කේ අපනයන ප්‍රවර්ධනයෙන් පමණක් බව ඔහු මෙහිදී අවධාරණය කළේය.
ඉදිරි කාලය තුළ දේශීය හා විදේශීය වශයෙන් අභියෝග රැසකට මුහුණ දීමට සිදුවන බවත් ඒ සදහා සූදානම් විය යුතු බවත් අග්‍රාමාත්‍යවරයා මෙහිදී පෙන්වා දුන්නේය.
වත්මන් ලෝක අර්බුදය හමුවේ රටවල් හැත්තෑවක් පමණ දුෂ්කරතාවලට මුහුණ දී තිබේ. ශ්‍රී ලංකාව ඉන් පළමු පෙළ සිටින බවද වික්‍රමසිංහ මහතා කීවේය. ජාත්‍යන්තර පොලී අනුපාත ඉහළ යාමේ වැඩි අවදානමක් පවතී. ජාත්‍යන්තර වශයෙන් ආහාර මිල ගණන් ඉහලයාමේ අනතුරක් ද මේ මොහොතේ නිරීක්ෂණය වේ. මෙම තත්වය අවබෝධ කරගෙන කටයුතු කළ යුතු බව අග්‍රාමාත්‍යවරයා මෙහිදී අවධාරණය කළේය. මේ අවස්ථාවේදී නිවැරදි ප්‍රතිපත්ති අනුගමනය කරමින් ඉදිරියට යාමෙන් රටට වන අහිතකර ප්‍රතිවිපාක සීමා කර ගැනීමට අවස්ථාව ඇති බවද අගමැතිවරයා පෙන්වා දුන්නේය.
ජාත්‍යන්තර මූල්‍ය අරමුදල සමග එකඟතාවයකට එළඹෙන තෙක් මෙම ගැටලුවලට නිශ්චිත විසඳුම් ලබාදීම අසීරු බව මහ බැංකුව පෙන්වා දුන්නේය. මේ සඳහා තව කෙටි කාලයක් ගතවේ.
අත්‍යවශ්‍ය ගනුදෙනුකරුවන්ගේ අවශ්‍යතා පදනම් කරගෙන සඳහා ණය ගෙවීම පමා කිරිමේ සහන ලබා දීම පිළිබඳව මෙහිදී අවධානය යොමු විය.
මහ බැංකු අධිපතිවරයා සහ දේශීය විදේශීය බැංකු ප්‍රධානීන් රැසක් අග්‍රාමාත්‍යය රනිල් වික්‍රමසිංහ මහතා සමග පැවති මෙම සාකච්ඡාවට එක්වූහ.
Video Story
