කවුරුන් විසින් ආණ්ඩු කළ ද 2029 වසර වනතුරු විදෙස් ණය ගෙවීමට සිදුවන බව වෙළෙඳ අමාත්‍ය බන්දුල ගුණවර්ධන මහතා පවසයි. අද (10) දින කොළඹ දී මාධ්‍යවේදීන් වෙත අදහස් දක්වමින් අමාත්‍යවරයා මේ බව පැවසීය. විදෙස් සංචිතය පහළ යාම සහ විදෙස් ණය ගෙවීම සම්බන්ධයෙන් මේ වන විට මතුව ඇති ඇතැම් කරුණු කාරණා සම්බන්ධයෙන් කළ විමසීමකට ප්‍රතිචාර දක්වමින් අමාත්‍යවරයා මේ බව කියා සිටියේය.

මාධ්‍යවේදීන්ගේ විමසීම් හමුවේ ප්‍රතිචාර දැක්වූ වෙළෙඳ අමාත්‍ය බන්දුල ගුණවර්ධන මහතා,

“එක්සත් ජාතික පක්ෂය විසින් ලංකා ඉතිහාසයේ කිසිවකුත් නොකළ මහා ජාතික ව්‍යසනයක් කළානේ, අවසාන මාස 08 ජාත්‍යන්තර වෙළෙඳපොළට ගොහිං ස්වෛරීත්ව බැඳුම්කර නිකුත් කරලා ගිනි පොලියට ඇමරිකානු ඩොලර් බිලියන 6.5 ක් අරං තියෙනවා මාස 18 ක් ඇතුළත. එම විදේශ ණය අරගෙන එදිනෙදා කනබොන දේවල් විතරක් ගෙන්න ගැනීම නිසා අපිට කලින් ගත්ත විදේශ ණයත් එක්ක බැලුවාම, සෑම වර්ෂයක දීම රටින් විදේශ විනිමය ගෙවන්න තියෙනවා ඇමරිකානු ඩොලර් බිලියන 4 ක් ණය වාරිකා හා පොලී. මෙය කාගේ ආණ්ඩුවක් තිබුණත් 2029 වෙනකං ගෙවන්නම ඕනේ.“

“එතකොට මේ තත්ත්වය තුළ ඇතිවෙලා තියෙන තත්ත්වයේ කිසි දවසක රජය ණය නොගෙවා පැහැර හැරලා නැහැ. ඒ සඳහා ණය ගෙවීම සම්බන්ධයෙන් බලධාරී ආයතනය තමයි ශ්‍රී ලංකා මහ බැංකුව. මහ බැංකුව රජයේ බැංකුකරු, මූල්‍ය නියෝජිතයා, මූල්‍ය උපදේශකයා වශයෙන් ඒ රාජ්‍ය ණය කළමනාකරණය කරනවා. ඉතිං ඒක නිසා ඒ සංචිත පවත්වා ගෙන යාම හා කළමනාකරණය කිරීම පිළිබඳ අබලමල් රේණුවකවත් අවබෝධයක් නැති අය විවිධ කතා කීවාට, ඒ සඳහා විධිමත් නිශ්චිත ආයතන පද්ධතියක් රටේ තිබෙනවා. මහ බැංකුව ඒ පිළිබඳ වගකීම දරනවා.“