2022 වසරේ අඛණ්ඩව තෙවන දිනයටත් කොළඹ කොටස් වෙළෙඳපොළ සියල කොටස් මිල දර්ශකය ඒකක සියයේ සීමාව ඉක්මවූ අගයයකින් අද (05) දිනයේ දී ඉහළ යන ලදී.

ඒ අනුව අද දිනය තුළ ඒකක 276.37 කින් සියලු කොටස් මිල දර්ශකය ඉහළ ගිය අතර දිනය අවසානයේ දී එහි අගය ඒකක 13,076.91 ක් ලෙසින් සටහන් විය. සියලු කොටස් මිල දර්ශකය ඒකක 13,000 සීමාව ඉක්මවා ගිය ඉතිහාසයේ පළමු අවස්ථාව මෙයයි.

මේ අතර S&P SL20 දර්ශකය ඒකක 76.62 කින් ඉහළ ගොස් ඒකක 4,453.68 ක් ලෙසින් දිනය අවසානයේ දී සටහන් විය.

රු. බිලියන 15.56 ක ගනුදෙනු පිරිවැටුමක් අද දින වර්තා වූණි.

LOLC හෝල්ඩිංග්ස් පීඑල්සී කොටස් මිල රු. 1,400 සීමාව ඉක්මවා අද දින ගනුදෙනු වූ අතර මිල දර්ශකවල වර්ධනයට එය වැඩි වශයෙන් බලපෑවේය.

මීට අමතරව එක්ස්පෝලංකා, බ්‍රවුන්ස් ඉන්වෙස්ට්මන්ට්ස්, බ්‍රවුන් ඇන්ඩ් කම්පැනි, හේලීස් ඇතුළු සමාගම් 123 ක කොටස් මිල ඉහළ යාම් සියලු කොටස් මිල දර්ශකයේ හැසිරීමට ධනාත්මක දායකත්වයක් ලබා දෙන ලදී.