එස්ටෝනියාව සහ ශ්‍රී ලංකාව අතර පළමු වරට සෘජු ගුවන් ගමන් ආරම්භ කරමින් SkyUp ගුවන් සේවයට අයත් U5-9394 දරන ගුවන් යානය ඊයේ රාත්‍රී 11.50 ට පමණ මත්තල රාජපක්ෂ ජාත්‍යන්තර ගුවන් තොටුපළට ළඟාවිය.

මෙම ගුවන් යානයෙන් සංචාරකයින් 117 දෙනෙකු පැමිණි අතර ඔවුන් ඉතා උත්සවාකාරයෙන් මත්තල රාජපක්ෂ ජාත්‍යන්තර ගුවන් තොටුපළේ දී පිළිගනු ලැබීය. එම අවස්ථාවට රුසියාවේ හිටපු ශ්‍රී ලංකා තානාපති උදයංග වීරතුංග මහතා ද එක් වී සිටියේය.

“අපි බලාපොරොත්තු වෙනවා සතියකට ගුවන් යානා 6ක් සංචාරකයෝ 16,500 ක් පමණ ගේන්න තමයි සැලසුම් කරලා තියෙන්නේ. ඒ හරහා ලංකාවට ඩොලර් මිලියන 25 ක ආදායමක් ලැබෙයි කියලා අපි බලාපොරොත්තු වෙනවා“, යැයි මෙම අවස්ථාවට එක් වූ රුසියාවේ හිටපු ශ්‍රී ලංකා තානාපති උදයංග වීරතුංග මහතා පැවසීය.

මෙම ගුවන් සේවය හරහා සතියකට ගුවන් වාර 6ක් ක්‍රියාත්මක කිරීමට නියමිත අතර එහිදී එස්ටෝනියාව, ලිතුවේනියාව, ලැට්වියාව, පෝලන්තය හා මෝල්ඩෝවා යන රටවල සිට සෘජු ගුවන් ගමන් ක්‍රියාත්මක කිරීමට නියමිතය.