January, 25, 2022
ආචාර්ය රංජිත් මහින්දපාල
ශ්‍රී ලංකාව තුළ ඔයිල් පාම් වගාව තහනම් කිරීම සඳහා රජය ගෙන ඇති තීරණය නැවත සමාලෝචනය කළ යුතු බවත්, එහි දී ඔයිල් පාම් වගාවෙහි යෙදෙන කුඩා වතු හිමියන් සංවර්ධනය කිරීම පිළිබඳව විශේෂ අවධානයක් යොමු කළ යුතු බවත්, පොල් පර්යේෂණ ආයතනයේ (CRI) හිටපු අධ්‍යක්ෂවරයෙකු මෙන් ම ස්වාධීන තක්සේරුකරුවකු සහ පළපුරුදු පර්යේෂක වරයෙකු වන ආචාර්ය රංජිත් මහින්දපාල මහතා ප්‍රකාශ කරයි.
2021 අප්‍රේල් මාසයේ දී රජය, ඔයිල් පාම් වගාව ශ්‍රී ලංකාව තුළ තහනම් කිරීමේ නිවේදනයක් නිකුත් කළ බව සිහිපත් කරන මහින්දපාල මහතා ඊට සමගාමීව පැනවූ නියෝගයන්ට අනුව දැනට පවතින ඔයිල් පාම් පැළ වසරකට 10% බැගින් ඉවත් කළ යුතු බව ද අනාවරණය කළේය. කෙසේ වෙතත් විද්වත් කණ්ඩායම් විසින් ඔයිල් පාම් සම්බන්ධව විවිධ පැතිකඩ ඔස්සේ සිදු කරන ලද පර්යේෂණවලට අනුව, ඔයිල් පාම් භාවිතය පොල්තෙල්වලට වඩා ලාභදායී බව පැවසිය හැකි ය.
ඔයිල් පාම් වගාව සම්බන්ධයෙන් රජය ගනු ලබන ප්‍රතිපත්තිමය තීරණ නිසි පර්යේෂණයන්ගෙන් අනතුරුව ගත යුතු බවත්, ඒ සඳහා ඔයිල් පාම් ක්ෂේත්‍රය ආශ්‍රිත පර්යේෂණ අංශය කෙරෙහි විශේෂ අවධානයක් යොමු කරමින් සංවර්ධනය කළ යුතු බවත්, මහින්දපාල මහතා අවධාරණය කරයි.
"ප්‍රාදේශීය වැවිලි සමාගම් සිදුකරන සියලු ම ඔයිල් පාම් වගාවන්, පොල් පර්යේෂණ ආයතනය විසින් ලබා දී තිබෙන මාර්ගෝපදේශයන්ට සහ යහපත් කෘෂිකාර්මික භාවිතයන්ට අනුකූලව සිදුකරන බව තහවුරු කළ යුතුයි. ඒ වගේ ම ඔයිල් පාම් වගාකිරීමේ දී පස හා පසේ තෙතමනය ආරක්ෂා කිරීම සඳහා අවශ්‍ය පිළිවෙත් අනුගමනය කිරීම සහ අතුරු වගා කළමනාකරණ පද්ධතියක් ක්‍රියාත්මක කිරීම අනිවාර්යයි. ඊට අමතරව ඔයිල් පාම් ක්ෂේත්‍රය සංවර්ධනය කිරීමට නම් එම වගාව මධ්‍යම පරිසර අධිකාරියේ ප්‍රමිතීන්ට අනුකූලව ක්‍රියාත්මක වන බව තහවුරු කිරීමට පිළිගත් පර්යේෂණ ක්‍රියාවලියක් අනුගමනය කිරීම, කර්මාන්තශාලා තුළ අපද්‍රව්‍ය කළමනාකරණය කිරීම සඳහා නව තාක්‍ෂණික ක්‍රමවේදයන් භාවිත කිරීම සහ දැනුවත් කිරීමේ වැඩසටහන් ක්‍රියාත්මක කිරීම අනිවාර්යයෙන් ම කළ යුතුයි." ආචාර්යවරයා තවදුරටත් අදහස් දක්වමින් ප්‍රකාශ කළේ ය.
ඔයිල් පාම් හා බැඳී පවතින මිත්‍යා මත සහ සත්‍ය තොරතුරු ඇතුළත් 'Myths and Truths of Oil Palm' ග්‍රන්ථය 2022 ජනවාරි 19 වන දින එළිදැක්වුණු අතර, එහි අන්තර්ගත කරුණුවලට අනුව ඔයිල් පාම් ඉතා ඉහළ ඵලදායිතාවකින් යුත්, තරගකාරී එළවළු තෙල් නිෂ්පාදනයක් බවත්, වර්තමානයේ පවතින විවිධ මතබේධාත්මක තත්ත්වයන් හේතුවෙන් එම ක්ෂේත්‍රය යම් පසුබෑමකට ලක්වී ඇති බවත් පැවසිය හැකිය.
'Myths and Truths of Oil Palm' ග්‍රන්ථය ඉන්දුනීසියාව, මැලේසියාව, ඉන්දියාව සහ ශ්‍රී ලංකාව යන රටවල පිළිගත් විශ්වවිද්‍යාල සහ පර්යේෂණ ආයතනවල විද්‍යාඥයන් හා විශේෂඥ පර්යේෂකයින් 15කට වැඩි පිරිසක් විසින් ස්වාධීනව සිදු කරන ලද පුළුල් පර්යේෂණයන්ට අනුව සම්පාදනය වී ඇති අතර, ඔයිල් පාම් නිෂ්පාදන ක්ෂේත්‍රය තුළින් නිර්මාණය වන යහපත් සමාජ, ආර්ථික හා පාරිසරික සංවර්ධනයන් පිළිබඳව එම ග්‍රන්ථය මගින් පුළුල් ලෙස කතිකා කරයි.
