ටෝකියෝ සිමෙන්ති සමූහය සහ ගුණ ජය සතුට පදනම එකමුතුව දඹුල්ලේ ඒ.වයි.එස්. ඥානම් ගැමි හදගැස්ම මධ්‍යස්ථානය විවෘත කරයි

April, 5, 2021

ටෝකියෝ සිමෙන්ති සමූහය විසින් අපගේ රට සහ එහි ජනතාව සවිබල ගැන්වීම උදෙසා දක්වන අඛණ්ඩ කැපවීමේ තවත් වැදගත් සන්ධිස්ථානයක් සනිටුහන් කිරීම සඳහා, ගුණ ජය සතුට පදනම සමග අත්වැල් බැඳගනිමින් දඹුල්ලේ ඒ.වයි.එස්. ඥානම් ගැමි හදගැස්ම මධ්‍යස්ථානය නොබෝදා විවෘත කෙරිණි.  ග්‍රාමීය ජනතාවගේ ජීවන තත්ත්වය නඟා සිටුවීම උදෙසා රටපුරා පැතිරුනු ව්‍යාපෘති රැසක් ක්‍රියාත්මක කරමින් අනූපමේය සේවාවක් ඉටුකරන ගුණ ජය සතුට පදනමේ 12වන ගැමි හදගැස්ම පියසටහන වන මෙම මධ්‍යස්ථානය, ටෝකියෝ සිමෙන්ති සමූහයේ සභාපති, ජනාධිපති නීතීඥ ආචාර්ය හර්ෂ කබ්රාල් මහතා, එහි කළමණාකාර අධ්‍යක්ෂ එස්.ආර්. ඥානම් මහතා සහ ගුණ ජය සතුට පදනමේ නිර්මාතෘ/ප්‍රධාන භාරකාර කුෂිල් ගුණසේකර මහතා අතින් ජනතා අයිතියට පත් කෙරිණි.  මෙම අවස්ථාවට ටෝකියෝ සිමෙන්ති වෙළඳ ජාලයේ දඹුල්ල කලාපයේ ප්‍රධානතම බෙදාහරින්නන් වන, විල්ගමුවේ කන්දෙගෙදර හාර්ඩ්වෙයාර් අධිපති, ධර්මසිරි රාජපක්ෂ මහතා, දඹුල්ලේ පෙරේරා ඩිස්ට්‍රිබියුටර්ස් අධිපති, විජේසිරි පෙරේරා මහතා, සහ බකමූන සම්පත් ට්‍රේඩර්ස් අධිපති, ඩබ්ලිව්.එස්. ප්‍රනාන්දු යන මහත්වරු විශේෂ ආරාධිත අමුත්තන් ලෙස එක්ව සිටියහ.

දඹුල්ලේ සිසිරවත්ත ප්‍රදේශයේ පිහිටි ඒ.වයි.එස්. ඥානම් ගැමි හදගැස්ම මධ්‍යස්ථානයේ දී, ඒ අවට ගම්මාන වල අඩු ආදායම්ලාභී පවුල්වල ප්‍රාථමික සිට 5 ශ්‍රේණිය දක්වා සිසුන්ට විද්‍යාව, ගණිතය, තොරතුරු තාක්ෂණය, ඉංග්‍රීසි, දෙමළ හා නැටුම් වැනි පාසැල් විෂයයන් සඳහා නොමිලේ අධ්‍යාපන පහසුකම් සලසා ඇත.  පාසැල් ළමුන්ට අමතරව, ප්‍රදේශයේ තරුණ තරුණියන්ට වඩා හොඳ රැකියා අවස්ථා උදාකරදීම සඳහා ජීවන කුසලතා සහ සාරධර්ම හැඩගැස්වීම, වෘත්තීය පුහුණුව සහ ක්‍රීඩා යන අංශ ඇතුළත් පාඨමාලා ද මෙහි පැවත්වෙනු ඇත. තරුණ තරුණියන් අතර වැඩි ඉල්ලුමක් ඇති ආගන්තුක සත්කාරය, කෘෂිකර්මාන්තය, බේකරි, විදුලි රැහැන්, සීසීටීවී ස්ථාපනය සහ ජංගම දුරකථන අලුත්වැඩියාව වැනි වෘත්තීය ක්ෂේත්‍රයන් පිළිබඳ පුහුණු පාඨමාලා ඉදිරියේදී මෙම මධ්‍යස්ථානයේදී පැවැත්වෙනු ඇත. කාන්තා සවිබල ගැන්වීම ගැමි හදගැස්ම සංකල්පයේ ප්‍රධාන අරමුණක් වන අතර, ඒ අනුව සැකසුනු ඇඟළුම්, සූපශාස්ත්‍ර ස සහ රූපලාවණ්‍ය වෘත්තීය පාඨමාලා ද මෙහිදී පැවැත්වේ.

ජනාධිපති නීතීඥ ආචාර්ය හර්ෂ කබ්රාල් මහතා අදහස් දක්වමින් පැවසුවේ, ටෝකියෝ සිමෙන්ති සමූහයේ නිර්මාතෘ දිවංගත ඒ.වයි.එස්. ඥානම් මැතිඳුන්ගේ දැක්ම යථාර්ථයක් බවට පත් කරන්නට දැයේ සුවහසක් ජනතාවගේ සිහින සැබෑ කිරීම උදෙසා මෙවැනි සමාජ සත්කාර වැඩසටහන් නිරන්තරයෙන් දියත් කරන බවයි.  වර්තමානයේ ඉහළ ඉල්ලුමක් ඇති වෘත්තීය ක්ෂේත්‍ර රැසක වටිනා කුසලතා අත්කර ගැනීමට මේ ලැබී ඇති අවස්ථාවෙන් උපරිම ප්‍රතිලාභ ලබාගැනීමට දරුවන් උනන්දු විය යුතු බවත්, මෙම මහඟු ත්‍යාගයට උපරිම වටිනාකමක් ලබා දීමට නම් මින් ලැබෙන ඉඩ ප්‍රස්ථාවෙන් සමාජයට පෙරලා ධනාත්මක දායකත්වයක් ලබා දීමට අධිෂ්ඨාන කරගතයුතු බවත් ඔහු පැවසීය.

දිවංගත දේශමාන්‍ය ඒ.වයි.එස්. ඥානම් මැතිඳුන් අනුස්මරණය කිරීම උදෙසා මෙසේ ස්ථාපිත කළ ගැමි හදගැස්ම මධ්‍යස්ථානය හරහා දඹුල්ල රත්මල්ගහඇල, ඇතුපරයාය, පහළවැව, යකුරගල උතුර, යකුරගල දකුණ, විල්හත සහ කණ්ඩලම යන ග්‍රාම නිලධාරී වසම්වල වෙසෙන අඩු ආදායම්ලාභී ගොවි පවුල් 750කට වැඩි ප්‍රමාණයක දුවාදරුවන්ට නොමිලේ අධ්‍යාපන අවස්ථා උදා වනවා.  විවිධ වයස් කාණ්ඩවල ප්‍රතිලාභීන් 800 කට වැඩි පිරිසක් මේ වන විටත් විවිධ කුසලතා සංවර්ධන පාඨමාලා සඳහා මධ්‍යස්ථානයට එක්ව සිටීම, එමගින් ප්‍රදේශයේ ජනතාවට සැලසෙන අනූපමේය සේවයට හොඳම සාක්ෂියයි.

මෙම දූරදර්ශී මෙහෙවරෙහි අරමුණු පැහැදිලි කළ ගුණ ජය සතුට පදනමේ නිර්මාතෘ කුෂිල් ගුණසේකර මහතා පවසා සිටියේ, අධ්‍යාපනය මෙන්ම අද සමාජයට අත්‍යවශ්‍ය යහපත් මානුෂීය ගුණාංග අනාගත පරපුර තුළ රෝපණය කිරීමේ කාලීන අවශ්‍යතාවය ද මෙහි ප්‍රධානතම ඉලක්කයක් බවයි.  ගුණ ජය සතුට පදනම විසින් ක්‍රියාත්මක කරන ගැමි හදගැස්ම ව්‍යාපෘතිය, සම්පත් බෙදීයාමේ විෂමතාවය හා දරිද්‍රතාවය තුරන් කිරීමෙන් ගැමි ජනතාවගේ ජීවන තත්ත්වය ඉහළ නැංවීම සඳහා, තරුණ තරුණියන් ඇතුළු ග්‍රාමීය ශ්‍රමබලකායේ නිපුණතා සහ ආකල්ප සංවර්ධනය පදනම කරගත් අධ්‍යාපන හා වෘත්තීය පුහුණුව නොමිලේ ලබා දෙන්නා වූ අද්විතීය ග්‍රාමීය සංවර්ධන සංකල්පයකි.  මේ වනවිට සීනිගම කේන්ද්‍ර්ස්ථානය කරගත් දිවයින පුරා පිහිටි ගැමි හදගැස්ම මධ්‍යස්ථාන හා බැඳුනු ගම්මාන 500ක ප්‍රතිලාභීන් 35,000කට අධික සංඛ්‍යාවක් මෙම වැඩසටහනේ ප්‍රතිලාභ අත්විඳිමින් සිටිති.

ශ්‍රී ලාංකීය කර්මාන්ත ක්ෂේත්‍රයේ යුග පුරුෂයෙකු මෙන්ම, අතිශ්‍රේෂ්ඨ මානුෂීය ගුණාංග වලින් පිරිපුන් උතුම් මිනිසෙකු ද වූ දිවංගත දේශමාන්‍ය ඒ.වයි.එස්. ඥානම් මැතිතුමන් විසින් මූර්තිමත් කල ජීවන දැක්ම අනුව සිය ව්‍යාපාරික ගමන හැඩ ගස්වාගෙන සිටින ටෝකියෝ සිමෙන්ති සමාගම, ඔහුගේ නාමය අනාගතයේත් බැබලවීමට කැපවී සිටී.  ඒ අනුව යමින්, ක්ෂේත්‍ර කිහිපයක දූරදර්ශී සමාජ සුභසාදන සහ සංරක්ෂණ ව්‍යාපෘතිවලට ටෝකියෝ සිමෙන්ති සමූහය සිය දායකත්වය සපයයි.  සැබෑ ලාංකිකයෙකු ලෙස සමාජයට ඉටුවිය යුතු යුතුකම් හා වගකීම් ඉටුකිරීමට හෘදයාංගමව ඉදිරිපත්ව සිටින ටෝකියෝ සිමෙන්ති සමූහය, ඉදිකිරීම් කර්මාන්තයේ සිය පෙරටුගාමී නායකත්වය ශක්තිමත්ව ගොඩනඟන අතරම, ඉදිරියටත් අපේ රට, අපේ ජනතාව සහ අපේ පරිසරය ස්ථිරසාර අන්දමින් නගාසිටුවීම හා රැකගැනීමට පෙරමුණ ගනු ඇත.