October, 12, 2021
යම් සමාජයක් තුළ දිගු කාලින ධනාත්මක වෙනස්කම් ඇති කළ හැකි ප්‍රබලතම සාධකයක් ලෙස අධ්‍යාපනය හැඳින්විය හැකිය. එබැවින් සෑම දරුවෙකුටම අධ්‍යාපනය ලැබීමට එක හා සමාන අවස්ථාවක් උදාකර දීම අත්‍යාවශ්‍ය කරුණකි. තිරසාර සංවර්ධනය පිළිබඳ ඉදිරිපත් වී ඇති කරුණු මාලාව තුළ ද "සැමදෙනාටම එක හා සමානව ප්‍රවේශ විය හැකි ගුණාත්මක අධ්‍යාපනය" යනුවෙන් සඳහන් කර ඇත්තේ, රටක සංවර්ධන සහ අනාගත අභිවෘද්ධිය කෙරෙහි ගුණාත්මක අධ්‍යාපනයෙන් ලැබෙන පිටිවහල සහ වටිනාකම තවදුරටත් අවධාරණය කොට දක්වමිනි. එබැවින් සෑම දෙනාටම පහසුවෙන් සම්බන්ධ විය හැකි, සාධාරණ සහ ගුණාත්මක අධ්‍යාපන ක්‍රමවේදයක් සකස් කිරීම ඕනෑම රජයක ප්‍රමුඛතම කාර්යයක් වන අතර, ඒ සඳහා රටේ සෑම පාර්ශවයකගේම සහයෝගය ලබාදීම ඉතා වැදගත් වේ.
එසේ වූවද, වර්තමානය තුළ උද්ගතව පවතින කෝවිඩ් 19 වෛරස ව්‍යාප්තියත් සමග රටේ අනෙකුත් ක්ෂේත්‍ර මෙන්ම අධ්‍යාපන ක්ෂේත්‍රය ද විශාල අභියෝගයකට ලක්ව තිබේ. පාසල තුළ සුපුරුදු අධ්‍යාපන ලැබීමේ පරිසරය ඔවුනට අහිමි ව ඇති අතර, එම නිසාම අධ්‍යාපන කටයුතු ඉදිරියට පවත්වාගෙනයාම සඳහා නව තාක්ෂණික ක්‍රමවේදයන්ගේ සහයෝගය ඉවහල් වී ඇත. මාර්ගගත ක්‍රමය (ඔන්ලයින් තාක්ෂණය) හරහා අධ්‍යාපන කාර්යය වෙත නැවත ප්‍රවේශවීමට අවස්ථාව එමගින් දරුවන් වෙත හිමිවිය. එයට අනුව පවතින තත්ත්වය තුළ සෑම දරුවෙකුටම එක හා සමාන ගුණාත්මක අධ්‍යාපනයක් ලබාදීම සඳහා ගත යුතු ප්‍රධාන ක්‍රියාමාර්ගයක් ලෙස, සැමට පහසුවෙන් අන්තර්ජාලය ඔස්සේ සම්බන්ධ විය හැකි පරිසරයක් නිර්මාණය කිරීම අත්‍යවශය කරුණක් බවට පත්ව ඇත.
දිගු කාලපරිච්ඡේදයක් පුරාවට රටේ පාසල් පද්ධතියෙහි මෙන්ම, අනෙකුත් අධ්‍යාපනික කටයුතු සඳහා අවශ්‍ය ඩිජිටල් සම්පත් සම්පාදනය කරමින් සහ එම පහසුකම් පුළුල් කරමින්, වේගයෙන් ඩිජිටල්කරණය වන ලෝකයක් තුළ අවශ්‍ය පුද්ගල නිපුණතා ගොඩනගා ගැනීමට තම දායකත්වය සැපයූ ශ්‍රී ලංකාවේ ප්‍රමුඛතම සන්නිවේදන සම්පාදකයා වන ඩයලොග් ආසිආටා සමාගම, මෙම නූතන අවශ්‍යතාවය ද මැනවින් වටහාගනිමින්, මෙවර ලෝක ළමා දිනය වෙනුවෙන් විශේෂ වැඩසටහනක් දියත් කිරීමට යොමු විය.
එම වැඩසටහන ඔස්සේ රට පුරා විහිදී තිබෙන සියලුම ළමා සංවර්ධන මධ්‍යස්ථාන සඳහා නොමිලේ බ්‍රෝඩ්බෑන්ඩ් පහසුකම් ලබාදීමට කටයුතු කළ අතර, එමගින් සෑම දරුවෙකුටම පහසුවෙන් අධ්‍යාපන කටයුතු සඳහා සම්බන්ධ වීමට අවශ්‍ය පහසුකම් පුළුල් කරන ලදී. ඒ සඳහා කාන්තා හා ළමා සංවර්ධන අමාත්‍යාංශය, පෙර පාසල් සහ ප්‍රාථමික අධ්‍යාපන ආයතනය මෙන්ම පාසල් යටිතල පහසුකම් සහ අධ්‍යාපන සේවා යන අමාත්‍යාංශයන්ගේ නොමද සහයෝගය ද හිමි විය. මෙම වැඩසටහන ඔස්සේ මධ්‍යස්ථාන 379 ක් ආවරණය කරන ලද අතර, ඒ මගින් පාසල් වසා ඇති කාලවකවානුව තුළදී ද අධ්‍යාපන අමාත්‍යාංශයේ "ඊ-තක්සලාව" මාර්ගගත ක්‍රමය(ඔන්ලයින් ක්‍රමය) හරහා පාසල් සිසු සිසුවියන් 10,632 පමණ පිරිසකට සමාන සහ ගුණාත්මක අධ්‍යාපනයක් ලබා ගැනීමට අවශ්‍ය තාක්ෂණික පහසුකම් සපයනු ලැබේ.
"දරුවෙකු ඇති දැඩි කිරීම සඳහා ගම්මානය ඉතා සුදුසු පරිසරයකි. එම පරිසරය තුළ දෙමාපියන්, අධ්‍යාපන ක්ෂේත්‍රයට සම්බන්ධ නිලධාරීන්, පෞද්ගලික සංවිධාන මෙන්ම රජය යන පාර්ශවයන් ඒකරාශී වෙමින් සෑම දරුවෙකුටම එක හා සමාන අධ්‍යාපනයක් ලබාදීම වෙනුවෙන් අවශ්‍ය පරිසරය ගොඩනැගිය යුතුය. නිසි අධ්‍යාපනය ලබාදීම ඔස්සේ දරුවන් සවිබලගැන්වීම තුළින් එම රටේ ජනතාවගේ දියුණුව පමණක් නොව, ඒ හරහා සියලුදෙනාටම යහපත් ලෝකයක් ද නිර්මාණය වනු ඇත." යනුවෙන් ඩයලොග් සමාගම විසින් මෙම වැඩසටහන සඳහා තම සහයෝගය දක්වමින් වැඩිදුරටත් සඳහන් කළේය.
ශ්‍රී ලංකාවේ ප්‍රමුඛතම සන්නිවේදන ආයතනය ලෙස රටේ ජනතාවගේ සන්නිවේදන අවශ්‍යතාවය වෙනුවෙන් නිරන්තරයෙන් තම දායකත්වය සපයන ඩයලොග් ආසිආටා සමාගම විසින් රටේ අනාගත පරපුර වෙනුවෙන් සිදුකරන ලද මෙම උදාර කාර්යභාරය රටේ ජන සමාජයේ ප්‍රසාදයට බඳුන්වන සමාජ සත්කාරයක් වනු නිසැකය.
Video Story
