April, 25, 2023
දුම්රිය, ‘දෙපාර්තමේන්තුවක්‘ ලෙස පැවතීම වානිජ කටයුතු පවත්වා ගෙන යාමේ දී බරපතළ ගැටළු මතුකරනු ලබන බවත්, අවශ්‍ය තීරණ ගැනීම වඩාත් පහසු කෙරෙන අයුරින් එය ව්‍යවස්ථාපිත මණ්ඩලයක් බවට පත් කළ යුතු බවත් ප්‍රවාහන අමත්‍ය බන්දුල ගුණවධර්න මහතා පවසයි. ඒ අනුව දුම්රිය, ‘අධිකාරියක්‘ බවට පත් කිරීම සඳහා අදාළ පාර්ශව සමඟ මේ වන විට සාකච්ඡා පවත්ගෙන යන බව අමාත්‍ය බන්දුල ගුණවර්ධන මහතා අද (25) දින පාර්ලිමේන්තුවේ දී අනාවරණය කර සිටියේය.
මෙහිදී වැඩිදුරටත් කරුණු දැක්වූ ප්‍රවාහන අමාත්‍ය බන්දුල ගුණවර්ධන මහතා,
“දුර ධාවන ගමන් සඳහා අත්‍යාවශ්‍ය තෙල් ප්‍රවාහන කටයුත්ත කරන්න අවශ්‍ය නිසා සමහර කෙටි ධාවන වාර අවලංගු කරලා තිබෙනවා. මේ රියැදුරු හිඟය සඳහා ක්ෂණික විසඳුමක් දෙන්න බැහැ. දැනට රියැදුරු නියාමකයන් ලෙස සිටින අය ඒ තත්ත්වයට උසස් කිරීම සඳහා අනෙක් රාජ්‍ය පරිපාලන ක්‍රමවේදයන් අනුව අවුරුදු 10ක් ගතවෙනවා.“
“ඒක නිසා මේ ‘දෙපාර්තමේන්තු‘ ක්‍රමය අනුව මේ වානිජ කටයුත්ත පවත්වා ගෙන යාමේ දී බරපතළ ගැටළු මතුවෙන නිසා අපි යෝජනා කරලා තියෙනවා, මේ අවශ්‍ය තීරණ ගැනීම වඩා පහසු වෙන්නත්, අවශ්‍යතා අනුව තීරණ ගන්නත් පුළුවන් වෙන ලෙස ‘දුම්රිය අධිකාරියක්‘ බවට, ව්‍යවස්ථාපිත මණ්ඩලයක් බවට පත්කරන පනත් කෙටුම්පත පිළිබඳ රියැදුරන්ගේ සංගම් සහ දුම්රිය ස්ථානාධිපතිවරුන්ගේ සංගම් සහ නියාමකවරුන්ගේ සංගම් අතර මේ දිනවල මම සාකච්ඡාවක් පවත්වාගෙන යනවා.“
“එහෙම නැත්නම් මේ තිබෙන සම්ප්‍රදායික දෙපාර්තමේන්තු ක්‍රමවේදය අනුව තීන්දු තීරණ අරන් කඩිනමින් අවශ්‍ය වෙනස්කම් කරන්න බැහැ. එය ව්‍යූහගත ගැටළුවක්. ඒ ගැටළුවට විසඳුමක් ලෙස අපි ‘දුම්රිය අධිකාරියක්‘ බවට පත්කර ගැනීම සඳහා එකතුවෙලා කටයුතු කරන්න, එහි අහිතකර යම්කිසි වගන්තියක් තියෙනවා නම් ඒක ඉවත් කරලා ඉවර වෙලා කලින් තිබුණු ‘දුම්රිය අධිකාරිය පනත‘ නැවත ඉදිරිපත් කරන්න පුළුවන්.“
Video Story
