ඇඟලුම් අපනයන අංශයේ ඉදිරි අපේක්ෂාවන් කෙරෙහි සුවිශල් අවධානයක් යොමු කරමින් බ්‍රවුන්ස් සමූහය විසින් ශ්‍රී ලංකාවේ නවීනතම සහ විශාලතම රෙදිපිළි කර්මාන්ත ශාලාව පිහිටුවීම සඳහා ශ්‍රී ලංකා ආයෝජන මණ්ඩලය සමඟ ගිවිසුම් අත්සන් කර තිබේ.

Brown and Company PLC සමූහ ප්‍රධාන විධායක නිලධාරී ටී. සනකන් සහ BOI අධ්‍යක්ෂ ජනරාල් රේණුකා වීරකෝන් අතර මේ සඳහා වන ආයෝජන මණ්ඩල (BOI) ගිවිසුම පසුගියදා අත්සන් කරන ලදී.

මෙය රු. බිලියන 15.3 ක ආයෝජනයකි.

වර්තමානයේ ශ්‍රී ලංකාවේ ඇඟලුම් හා රෙදිපිළි කර්මාන්තය ඩොලර් බිලියන 5 ක විදේශ විනිමය උපයන ප්‍රමුඛතම ආදායම් උත්පාදකයා වන අතර එයින් වාර්ෂිකව ඩොලර් බිලියන 3 කට ආසන්න ප්‍රමාණයක් අමුද්‍රව්‍ය ආනයනය සඳහා වැය වේ.

එබැවින් මෙම කර්මාන්ත ශාලාව හරහා ඇඟලුම් නිෂ්පාදන කර්මාන්තයට අවශ්‍ය රෙදිපිළි ආනයනය වෙනුවෙන් වැයවන විදේශ විනිමය විශාල වශයෙන් ඉතිරි කර ගැනීමට හැකියාව ලැබෙනු ඇති බව ආයෝජකයින්ගේ විශ්වාසයයි.

කුරුණෑගල දිස්ත්‍රික්කයේ පන්නල, මහකඳුර ප්‍රදේශයේ දී ආරම්භ කෙරෙන මෙම ව්‍යාපෘතිය මගින් නව රැකියා අවස්ථා 800 ක් පමණ නිර්මාණය වීමට නියමිත බව බ‍්‍රවුන් සහ සමාගම පවසයි.

ඡායාරූපය - Brown and Company PLC සමූහ ප්‍රධාන විධායක නිලධාරී ටී. සනකන් සහ BOI අධ්‍යක්ෂ ජනරාල් රේණුකා වීරකෝන් අදාළ ආයෝජන ගිවිසුම සමඟින්