ජනාධිපතිතුමා ඉදිරිපත් කරන ලද යෝජනාවක් අනුව පාරිභෝගිකයින්, වැඩ කරන ජනතාව, ව්‍යවසායකයන් සහ බදු ගෙවන ප්‍රජාව ඇතුළත් ආර්ථිකයේ සියලුම පාර්ශ්වකරුවන්ට සරිලන අයුරින් සරල, විනිවිදභාවයෙන් යුත් සහ කාර්යක්ෂම බදු ක්‍රමවේදයක් හඳුන්වා දීම පිණිස 2019 නොවැම්බර් මස 27 දින පැවති අමාත්‍ය මණ්ඩල රැස්වීමේදී අනුමැතිය ලබා දෙන ලදී. එසේම, නිෂ්පාදන කටයුතු සහ සේවා නියුක්තිය කෙරෙහි කොවිඩ් - 19 වසංග‍තය හේතුවෙන් ඇති වී ඇති අහිතකර ප්‍රතිවිපාක අවම කිරීම සඳහා අඩු ආදායම්ලාභීන්, ව්‍යවසායකයින්, ක්ෂුද්‍ර, කුඩා හා මධ්‍ය පරිමාණ ව්‍යවසායකයින්, සංචාරක ක්ෂේ‍ත්‍රයේ නියැලෙන්නන් සහ ගොවීන් ඇතුළු ආර්ථිකයේ සියලුම පාර්ශ්වයන්ට රාජ්‍ය මූල්‍ය හා මුදල් උත්ප්‍රේරණයන් ලබා දීමට ද රජය විසින් පියවර ගෙන ඇත. ව්‍යවසායකයින් මත පැටවී ඇති මූල්‍ය බර ලිහිල් කිරීමේ අරමුණින් ශ්‍රී ලංකා මහ බැංකුව විසින් මූල්‍ය වෙළඳපොළේ ද්‍රවශීලතාව ඉහළ නැංවීමට ද පියවර ගෙන ඇත.

මෙකී ක්‍රියාමාර්ග හේතුවෙන් 2020 වර්ෂයේ දෙවන භාගයේදී ආර්ථිකය යළි යථා තත්ත්වයට පත් වනු ඇතැයි අපේක්ෂා කරන අතර, ඊට අනුගතව පහත සඳහන් පනත් සංශෝධනය කිරීම පිණිස නීති කෙටුම්පත් සම්පාදක විසින් පිළියෙල කර ඇති පනත් කෙටුම්පත් රජයේ ගැසට් පත්‍රයේ පළ කර පාර්ලිමේන්තුවට ඉදිරිපත් කිරීම පිණිස මුදල් අමාත්‍යතුමා ඉදිරිපත් කරන ලද යෝජනාව අමාත්‍ය මණ්ඩලය විසින් අනුමත කරන ලදී.

i 2009 අංක 9 දරන ජාතිය ගොඩනැඟීමේ බදු පනත.

ii 2006 අංක 13 දරන ආර්ථික සේවා ගාස්තු පනත.

iii 2011 අංක 18 දරන වරාය හා ගුවන්තොටුපොළ සංවර්ධන බදු පනත.

iv 2018 අංක 35 දරන මුදල් පනත.

තවද, පහත සඳහන් පනත් සංශෝධනය කිරීම සඳහා අවශ්‍ය කෙටුම්පත් සකස් කරන ලෙසට නීති කෙටුම්පත් සම්පාදකට උපදෙස් දීම පිණිස ඉදිරිපත් කරන ලද යෝජනාවට ද අමාත්‍ය මණ්ඩලය විසින් අනුමැතිය ලබා දෙන ලදී.

i 2017 අංක 24 දරන දේශීය ආදායම් පනත.

ii 2002 අංක 14 දරන එකතු කළ අගය මත බදු පනත.