“බයෝ බබල් (Bio bubble) එක කැලේ. යාල එහෙම යන කොට, ඒ බයෝ බබල් එකේ ඉන්න කට්ටියට පමණයි, මේ කට්ටියට හයර් කරන්න පුළුවන්. වෙන ජීප්වල ගිහිල්ලා තියෙන්නේ. සම්පූර්ණයෙන්ම අර තිබිච්ච ප්ලෑන් එක කුඩුපට්ටම් වෙලා ගිහිල්ලා. දවස් 14ක් ඉන්න ඕනේ හැමෝම, නිරෝධායනේ. හැබැයි මේ කට්ටිය ඉන්නේ දවස් 7යි. එතකොට එක රටක් එක නීතියක් ද? රජය විසින් සම්මත කරලා තියෙන ක්‍රමවේදයට අනුව මේ සංචාරකයෝ ලංකාවට ගේන්න බැරි නම් ගේන්න එපා. තව ෆ්ලයිට් 9ක් එන්න තියෙනවා. කරුණාකරලා ඊළඟ ෆ්ලයිට් 9 වත් ශ්‍රී ලංකා ටුවරිස්ම් එකේ සම්මත කරලා තියෙන ක්‍රමවේදයට ගේනන කියලා අපි රජයට කියනවා“, යනුවෙන් සමගි ජන බලවේගයේ පාර්ලිමේන්තු මන්ත්‍රී හර්ෂ ද සිල්වා මහතා ඊයේ (03) පැවති මාධ්‍ය හමුවක දී කියා සිටියේය. ශ්‍රී ලංකාවට පැමිණි යුක්‍රේන සංචාරකයින් පිරිසක් රැගත් සෆාරි ජීප් රථ කිහිපයක් යාල ජාතික වනෝද්‍යානයේ සංචාරය කිරීමත් සමඟම, එම සංචාරකයින් රැගෙන ගිය සෆාරි ජීප් රියැදුරන් සහ සහායකයින් දින 14 ක කාලයකට නිරෝධායනයට යැවීම සම්බන්ධයෙන් මතුව ඇති තත්ත්වය පිළිබඳ අදහස් දක්වමින් මන්ත්‍රීවරයා මේ බව පැවසීය.

මෙම යුක්‍රේන සංචාරකයින් සම්බන්ධයෙන් අදහස් දක්වමින් වසංගත රෝග අංශයේ ප්‍රධානී විශේෂඥ වෛද්‍ය සුදත් සමරවීර මහතා මෙසේ කියා සිටියේය.

“යුක්‍රේන ජාතික සංචාරකයින් කණ්ඩායම් කිහිපයක්ම මේ රටට පැමිණියා. ඔවුන් මේ රටට ආවේ ඔවුන්ගේ රටේ දී කොවිඩ් 19 පිළිබඳ පීසීආර් පරීක්ෂණ සිදුකර, කොවිඩ් 19 ආසාදනය වී නැහැ කියන සහතිකයත් එක්ක. ඊට පස්සේ මේ රටට පැමිණි වහාම සිදුකළ පීසීආර් පරීක්ෂණයේ දී අපි හඳුනාගත්තා ඔවුන් අතර රෝගීන් ඉන්නවා කියලා.“

මේ අතර ජනතා විමුක්ති පෙරමුණේ මධ්‍යම කාරක සබික වෛද්‍ය නලින්ද ජයතිස්ස මහතා ද මෙම කරුණ සම්බන්ධයෙන් අදහස් දක්වන ලදී.

“මේ රටේ ජනතාවට ප්‍රශ්නයක් ඇතිවෙනවා. අර පොසිටිව් වුණා කියන 6 දෙනා සමඟ කවුරුවත් ආශ්‍රිතයෝ හැටියට හිටියේ නැද්ද? ඒ අයගේ පවුලේ අයට මොකද වෙලා තිබෙන්නේ. එවැනි ආශ්‍රිතයන්ට මොකක්ද අනුගමනය කරන ක්‍රියාමාර්ගය. ඊට පස්සේ තව පීසීආර් කළා ද ඒ අයට? ඒ අයගේ වාර්තා මොනවාද කියන ප්‍රශ්නය පැන නැගිලා තියෙනවා. ඒ නිසා මේ නිරෝධායන නීති සම්බන්ධයෙන් රටේ තිබුණු යම් පිළිගැනීමකුත් මේකෙන් බිඳවැටීමට ලක් කරලා තියෙනවා.“

දිවයිනට පැමිණ සිටින යුක්‍රේන සංචාරකයින් කොවිඩ් සෞඛ්‍ය උපදෙස් නොපිළිපදින බවට චෝදනා එල්ල වී තිබේ. මේ අතර එම සංචාරකයින් පිරිසක් රැගෙන ගිය යාල සෆාරි ජීප් රථ රියැදුරන් 28 දෙනෙකු සෙනසුරාදා (02) රාත්‍රී දින 14 ක නිරෝධානයට යොමු කිරීමට පියවර ගැනුණි. මේ සම්බන්ධයෙන් යාල ස්වාධීන ජීප් රථ සංගමය මේ සම්බන්ධයෙන් පවසන්නේ මෙම සංචාරකයින් කිසිදු සෞඛ්‍ය පිළිවෙතක් අනුගමනය නොකිරීමෙන් තමන් ද ගැටළුවලට මුහුණ දුන් බවයි.