කොළඹ කොටස් වෙළෙඳපොළ මිල දර්ශකවල පහළ යාමක් අද (13) දින වාර්තා විය. මෙහිදී පෙර දිනයට සාපේක්ෂව සියලු කොටස් මිල දර්ශකය ඒකක 38.08 කින් හා S&P SL20 දර්ශකය ඒකක 30.90 කින් පහළ යන ලදී. දිනය අවසානයේ දී සියලු කොටස් මිල දර්ශක අගය ඒකක 5,802.97ක් ලෙසත් S&P SL20 දර්ශකය ඒකක 2,303.81 ක් ලෙසත් සටහන්ව තිබිණි. අද දින සියලු කොටස් මිල දර්ශකයේ පහළ යාමක් වාර්තා වූයේ අඛණ්ඩ දින 4 ක වර්ධනයකින් පසුවය.

මේ අතර අද දින රුපියල් බිලියන 5 ක් ඉක්මවූ වටිනාකමකින් යුතු කොටස් ගනුදෙනු සිදුවීම විශේෂත්වයකි. එහිදී සිදුවී තිබෙන ගනුදෙනු සංඛ්‍යාව 41,688 ක් බව කොටස් වෙළෙඳපොළ දෛනික වාර්තාව පෙන්වා දේ.

Trading activity at CSE continues to improve! 41,688 trades recorded today - the highest figure in over 9 years. #lka pic.twitter.com/nRTTIN5Uq0

— Colombo Stock Exchange (@CSE_Media) October 13, 2020

මෙහිදී වැඩිම ගනුදෙනු ප්‍රමාණයක් වාර්තා කළ සමාගම් කොටස් පහත පරිදි වේ.

EXPOLANKA HOLDINGS PLC - 3,843

R I L PROPERTY PLC - 3,564

PIRAMAL GLASS CEYLON PLC - 2,816

RENUKA AGRI FOODS PLC - 2,553

දෛනික පිරිවැටුමෙන් රු. බිලියන 4.99 ක්ම දේශීය මිල දී ගැනීම්වලින් සමන්විත විය. විදේශීය මිල දී ගැනීම ලෙස සටහන්ව ඇත්තේ රු. මිලියන 43.69 ක් හෙවත් දෛනික පිරිවැටුමෙන් 0.86%ක් තරම් ඉතා පහළ අගයයකි. අද දින දේශීය විකුණුම් රු. බිලියන 4.85 ක් හා විදේශීය විකුණුම් රු. මිලියන 184.48 ක් ලෙසින් වාර්තා වී තිබේ.

දෛනික පිරිවැටුමට ඉහළම දායකත්වය EXPOLANKA HOLDINGS PLC  වෙතින් ලැබුණු අතර එය රු. මිලියන 864.21 කි. මීට අමතරව R I L PROPERTY PLC රු. මිලියන 372.88 ක්, PIRAMAL GLASS CEYLON PLC රු. මිලියන 341.12 ක් ලෙසින් ඉහළ දායකත්වයක් දෛනික පිරිවැටුමට ලබා දුන් සමාගම් කොටස් විය.

අද දින සියලු කොටස් මිල දර්ශකයේ හැසිරීම කෙරෙහි සමාගම් 62 ක කොටස් මිල ඉහළ යාම් ධනාත්මක අයුරින් බලපානු ලැබූ අතර සමාගම් 127 ක මිල පහළ යාම් සෘණාත්මක බලපෑමක් ඇතිකරනු ලැබීය. කාර්සන්, ජෝන් කීල්ස්, සිලෝන් කෝල්ඩ් ස්ටෝර්ස්, HNB හා ශ්‍රී ලංකා ටෙලිකොම් යන සමාගම්වල කොටස් මිල පහළ යාම්, සියලු කොටස් මිල දර්ශකයේ පහළ යාමට වැඩිවශයෙන් හේතුවී තිබේ.

කොළඹ කොටස් වෙළෙඳපොළ ඉතිහාසයේ තනි දිනක් තුළ මෙතෙක් සිදු වී ඇති වැඩිම ගනුදෙනු ප්‍රමාණය වාර්තා වී ඇත්තේ 2011 අගෝස්තු 18 දිනය. එදින වාර්තා වී තිබූ සමස්ත ගනුදෙනු සංඛ්‍යාව 49,921 කි.