September, 7, 2014
සිංහලෙන් “ජපනා හපනා“ යනුවෙන් කියමනක් ඇතැයි තමා අසා තිබෙන බවත් එම කියමනේ සඳහන් වන ආකාරයෙන්ම ඉහළ ව්‍යාපාරික ධූත පිරිසක් තමන් ලංකාවට රැගෙන ආ බවත් ජපාන අග්‍රාමාත්‍යවරයා කියයි.
ජපාන අග්‍රාමාත්‍ය ෂින්සෝ අබේ මහතා අද පස්වරුවේදී කොළඹ පැවති ශ්‍රී ලංකා-ජපාන ව්‍යාපාරික සමුළුව අමතමින් මේ බව සඳහන් කළේය.
මෙහිදී, ඔහු පැවසුවේ ජපානයේ ඉහළම සමාගම්වල ප්‍රධානීන්ගෙන් සමන්විත ව්‍යාපාරික ධූත පිරිසක් තමා සමග ලංකාවට පැමිණ තිබෙන බවත් ශ්‍රී ලංකාවේ ආර්ථිකයට ඔවුන්ගෙන් දායකත්වයක් ලැබෙනු ඇතැයි තමා විශ්වාස කරන බවයි. මේ නිසා, ශ්‍රී ලංකාවේ අනාගතය උදෙසා මෙම ව්‍යාපාරික සමුළුවෙන් ප්‍රයෝජන ගන්නා ලෙස ජපාන අග්‍රාමාත්‍යවරයා මෙහිදී ඉල්ලා සිටියේය.
තමා ශ්‍රී ජයවර්ධන පුර කෝට්ටේ නගරය නැරඹීමට ගිය බව පැවසූ ජපාන අග්‍රාමාත්‍යවරයා ජේ.ආර්. ජයවර්ධන මහතා 1951 දී පැවති සැන්ෆ්‍රැන්සිස්කෝ සාම සන්ධාන සමුළුවේදී ජපානය අන්තර් ජාතික ප්‍රජාවගේ සමාජිකයෙකු ලෙස සලකන ලෙස ඉල්ලමින් ජපානය වෙනුවෙන් අදහස් දක්වා එරටට පිහිටවූ ආකාරයද සිහිපත් කළේය.
ජපාන ආධාර වලින් ගොඩනැගූ ජෙෆ්රි බාවා නැමැති උසස් ගෘහ නිර්මාණ ශිල්පියා විසින් ගොඩනැගූ ශ්‍රී ලංකා පාර්ලිමේන්තුව නැරඹීමට තමන් ගිය බව ෂින්සෝ අබේ මහතා මෙහිදී කීය.
Video Story
