ශ්‍රී ලංකාවේ ආකර්ෂණීය දකුණු වෙරළ තීරයේ පිහිටි Shangri-La Hambantota වෙත ‘Golf World Top 100 - World Resorts’ ශ්‍රේණිගත කිරීම්වල 70 වන ස්ථානය හිමි වී තිබේ. මේ හරහා එය ලොව වඩාත්ම ගෞරවනීය ගොල්ෆ් සහ විවේකී නවාතැන් ගමනාන්තයන් අතරට එක් වීම සාඩම්බර කරුණකි.

මෙම 'Golf World Top 100' ශ්‍රේණිගත කිරීම ගොල්ෆ් ක්‍රීඩාවේ විශිෂ්ටත්වයට පමණක් සීමා නොවන අතර ඒ ඔස්සේ ක්‍රීඩාව සහ නවාතැන් ගැනීම යන අංග දෙකෙහිම පිරිපුන් අත්දැකීමක් ලබාදෙන නිකේතන ඇගයීමට ලක් කරනු ලබයි. එහිදී ගෝලීය මට්ටමේ ගොල්ෆ් පිටියක් තිබීම, සුවපහසු සත්කාරකත්වය ලබාදීම, ප්‍රදේශයට ආවේණික හැඟීම ලබාදීම සහ ක්‍රීඩාවෙන් පසුව ද මතකයේ රැඳෙන අත්දැකීම් පිරිනැමීම යන සියළු සාධකයන් සලකා බලනු ලැබේ. මෙම සාධක මාලාවම ආවරණය කරමින් Shangri-La Hambantota විසින් මෙම ඇගයීම හරහා තම ස්ථානය තහවුරු කර ගැනීම සැබවින්ම සුවිශේෂී කරුණකි.

ප්‍රකට ගෘහ නිර්මාණ ශිල්පී රොඩ්නි රයිට් විසින් නිර්මාණය කරන ලද සිදුරු 18කින් යුත් මෙම ශූරතා ගොල්ෆ් පිටිය, එහි ස්වාභාවික වටපිටාව සමඟ ගැඹුරින් සම්බන්ධ වේ. උස් වූ පොල් ගස්, වැව්, නිල්වන් අහස සහ ඈතින් පෙනෙන ඉන්දීය සාගරයෙන් වට වූ මෙම පිටිය මිනිසා නිර්මාණය කළ ස්ථානයක් නොව පරිසරයේම කොටසක් ලෙස හැඟෙන අත්දැකීමක් ලබා දෙයි. එය සංචාරකයන්ගේ සිත් දිනා ගනිමින් තවදුරටත් ආකර්ෂණීය අත්දැකීමක් තිළිණ කරයි.

"එය ඉතා සුන්දර ස්වභාවික පරිසරයක පිහිටා ඇති අතර වන ජීවීන්ගෙන් වට වී ඇති බව, Golf World Top 100 සංස්කාරක වන ක්‍රිස් බර්ට්‍රම් මහතා විසින් මේ පිළිබඳ අදහස් එකතු කරමින් සඳහන් කර ඇත. ක්‍රීඩා පිටිය සහ පරිසරය අතර ඇති මෙම සහජීවනය නිකේතනයේ ආකර්ෂණයට බෙහෙවින් හේතු වී තිබේ. ගොල්ෆ් පිටියෙන් ඔබ්බට ගිය පසු හෙක්ටයාර 58ක විසිරී ඇති Shangri-La Hambantota හෝටලය යනු තනිවම ගොඩනැගුණු සම්පූර්ණ ගමනාන්තයකි. ඒ අනුව යුවළක්, පවුලක් හෝ පරම්පරා කිහිපයක සංචාරකයින් සඳහා වුව ද මනා වූ සුවපහසුව ලබා දෙන අයුරින් මෙම හෝටල් පරිශ්‍රය නිර්මාණය කර ඇත.

ක්‍රිස් බර්ට්‍රම් මහතා ඔහුගේ විචාරයේ තවදුරටත් මෙම ගමනාන්තය පිළිබඳව මෙසේ සඳහන් කර ඇත. "ඔබට කිසිවිටකත් නිකේතනයෙන් පිටතට යාමට අවශ්‍ය නොවේ. ආයුර්වේදය මුල් කරගත් සම්බාහන (Spa) සත්කාර ලබා ගැනීම, එළිමහන් පිහිනුම් තටාක තුනෙන් එකක විවේකීව කාලය ගත කිරීම හෝ වෙරළේ ලැගුම් ගැනීම වැනි ඕනෑම වයසක අයෙකුට කළ හැකි බොහෝ දේ මෙහි තිබෙනවා."

ඒ අනුව, CHI, The Spa හි පිරිනමන ආයුර්වේද සත්කාරවල සිට විශාල පිහිනුම් තටාක, වෙරළබඩ විවේකී ස්ථාන, ක්‍රීඩාව සහ නිදහස් මනසින් විවේකීව කාලය ගත කිරීම දක්වා වූ විවිධ ක්‍රියාකාරකම් හරහා Shangri-La Hambantota ලංකාවේ ප්‍රධාන පෙළේ නිකේතනයක් ලෙස ඔවුන්ගේ ප්‍රතිරූපය මනාව පිළිඹිබු කරනු ලබයි.

තවද, මෙම ශ්‍රේණිගත කිරීමෙහි තීරණාත්මක අංගයක් වන්නේ ආහාරවල ඇති විශිෂ්ටත්වයයි. Shangri-La Hambantota හිදී, ප්‍රදේශයට ආවේණික දේශීය රසයන් මෙන්ම ජාත්‍යන්තර මට්ටමේ ආහාර වේලක රස ද අත්විඳීමේ හැකියාව ලබා දී ඇත. "ආහාර මෙහි ඇති වඩාත් වැදගත් අංගයයි. ඔබ 'බෝජුන්හල' හිදී ශ්‍රී ලාංකීය හෝ ජාත්‍යන්තර උදේ ආහාරය ලබා ගත්ත ද, නැතහොත් දවල් ආහාරය සඳහා පැමිණිය ද, ඔබට ඉතා රසවත් ආහාර වේලක් රසවිඳිය හැකියි." යනුවෙන් ක්‍රිස් බර්ට්‍රම් මහතා සඳහන් කර තිබේ.

ඒ අනුව Shangri-La Hambantota වෙත මෙම ජාත්‍යන්තර ඇගයීම ලැබීම උදෙසා ගෝලීය මට්ටමේ ගොල්ෆ් පිටිය, ස්වභාවික පරිසරය, උසස් ගණයේ සත්කාරකත්වය සහ පිරිපුන් නිකේතන අත්දැකීම යන සියළුම සාධකයන් හේතු වී තිබේ.

Shangri-La Hambantota සාමාන්‍යාධිකාරී රෙෆාන් රාසීන් මහතා මේ පිළිබඳව සිය අදහස් මෙසේ පැවසුවේය. "Golf World Top 100 වෙතින් ලැබුණු මෙම ඇගයීම අපගේ සගයන්ගේ කැපවීම සහ අප නිර්මාණය කරන සුවිශේෂී අත්දැකීම්වල ප්‍රතිඵලයක්. ගොල්ෆ් පිටිය සොබාදහම සමඟ පවත්වන සමබරතාවයේ සිට අපගේ උණුසුම් සත්කාරකත්වය දක්වා වූ සෑම දෙයක්ම පහසුව සහ සම්බන්ධතාවය ලබා දීමට හැඩගස්වා තිබෙනවා. විවේකීව සැබෑ ශ්‍රී ලාංකීය Shangri-La අත්දැකීම විඳගැනීමට අපි අමුත්තන්ට ආරාධනා කර සිටිනවා."