මෙරට සංවර්ධනය නව මානයකට රැගෙන ඒම වෙනුවෙන් නගර සංවර්ධනය වෙත විශේෂ අවධානයක් යොමු කරවීමට නව රජය විසින් CITY PLAN ව්‍යාපෘතිය, පලමු පියවර ලෙස තෝරාගත් නගර 10 ක් ඉලක්ක කොට නාගරික සංවර්ධන අධිකාරිය හරහා ක්‍රියාත්මක කිරීමට බලාපොරොත්තු වේ .

CITY PLAN නගර සංවර්ධන සැලැස්ම තුල නගරයේ යටිතල පහසුකම්, මාර්ග පද්ධති, මහල් නිවාස, වාණිජ කලාප නිසියාකාරයෙන් හඳුනාගෙන ඒ වෙනුවෙන් ආයෝජනයන් නිසියාකාරයෙන් සිදු කරන්නේ කෙසේ ද යන්න සැලසුම් කෙරේ.

ඒ හරහා නගර සැලසුම් නවීකරණය, රථවාහන තදබදය අවම කිරීම, ජනතාවට අවශ්‍යවන්නා වූ මහජන පහසුකම් පහසුවෙන් සලසා ගැනීම, ආයෝජන සහ සංචාරක ආකර්ශණය වැඩි දියුණු කර ගැනීමට බලාපොරොත්තු වේ.

හැටන් නගරයට අදාලව නගර සැලසුම් සැලසුම් ක්‍රියාත්මක කර ගත හැක්කේ කෙසේද යන්නත් මේ වන විට ව්‍යාපෘතියේ ඉදිරිය පිළිබදවත් අද (13) දින සාකච්ඡාවක් පැවති අතර මේ සාකච්ඡාව සඳහා ප්‍රවාහන මහාමාර්ග සහ නාගරික සංවර්ධන අමාත්‍ය බිමල් රත්නායක අමාත්‍යවරයා, නාගරික සංවර්ධන නියෝජ්‍ය අමාත්‍ය එරංග ගුණසේකර අමාත්‍යවරයා ඇතුළු නාගරික සංවර්ධන අධිකාරියේ නිලධාරීන් පිරිසක් සහභාහී විය.