කොළඹ කොටස් හුවමාරුව (CSE) සහ ජාත්‍යන්තර සංවර්ධනය සඳහා වූ එක්සත් ජනපද නියෝජිතායතනය (USAID) ශ්‍රී ලංකා මෘදුකාංග සහ සේවා සමාගම් සංගමය (SLASSCOM) සහ ශ්‍රී ලංකා තොරතුරු තාක්ෂණ කර්මාන්ත සම්මේලනය (FITIS) සමඟ එක්ව ‘වෙළඳපොළ හරහා වත්කම් අගය ඉහළදැමීමේ සහ අරමුදල් සපයා ගැනීමේ අවස්ථා’ යන මාතෘකාව යටතේ මෑතකදී සංසදයක් පවත්වන ලදී. විකල්ප අරමුදල් ප්‍රභවයන් ගවේෂණය කිරීම සහ වර්තමාන ගතික වෙළඳපල පරිසරය තුළ පොදු සමාගමක් බවට පත්වීමේ ක්‍රියාවලිය පිළිබඳව දැනුවත් කිරීම මගින් තොරතුරු හා සන්නිවේදන තාක්ෂණ අංශයේ සමාගම් සවිබල ගැන්වීම මෙම සංසදයේ අරමුණයි.

USAID CATALYZE පුද්ගලික අංශ සංවර්ධන වැඩසටහන මගින් අනුග්‍රහය දක්වන ලද මෙම අවස්ථාව හරහා ආයෝජකයින්ගේ දැනුවත්භාවය ඉහළ නැංවීම අරමුණු කරගත් මාතෘකා රාශියක් ආවරණය කරන ලදී. ප්‍රාග්ධන වෙළෙඳපොළ පිළිබඳ හැඳින්වීමක් සහ තොරතුරු තාක්ෂණ ආයතන සඳහා විකල්ප අරමුදල් අවස්ථා, ආයෝජකයන්ගේ අපේක්ෂාවන් පිළිබඳ අවබෝධයන් සහ කොළඹ කොටස් හුවමාරුවේ ලැයිස්තුගත වීමේ ප්‍රතිලාභ යනාදිය විශේෂ අංග අතරට අයත් විය. නියාමන පරිසරය, පොදු සමාගමක් බවට පත්වීම සඳහා වන අනුකූලතා අවශ්‍යතා සහ කර්මාන්තයේ ප්‍රමුඛයන් විසින් බෙදාගත් සාර්ථකත්වයට පත්වීමේ අත්දැකීම් පිළිබඳ වටිනා දැනුමක් ද සහභාගිවන්නන් විසින් ලබා ගන්නා ලදී.

එච්සෙනිඩ් සමූහ ව්‍යාපාරයේ නිර්මාතෘ සහ සභාපති දිනේෂ් සපරමාදු මහතා සහ කොටස් හුවමාරු ලයිස්තුගත කිරීම හරහා මෑතකදී රුපියල් බිලියන 1.6ක් රැස්කරගත් ඩිජිටල් මොබිලිටි සොලුයුෂන්ස් ලංකා පුද්ගලික සමාගමේ (පික්මී) නිර්මාතෘ සහ ප්‍රධාන විධායක නිලධාරී ජිෆ්රි සුල්ෆර් මහතා ලැයිස්තුගත කිරීමේ ක්‍රියාවලිය සම්බන්ධයෙන් ඔවුන්ගේ අදහස් ප්‍රකාශ කළහ. පික්මී සමාගමේ සාර්ථක ලැයිස්තුගත කිරීම හරහා ශ්‍රී ලංකාවේ තොරතුරු හා සන්නිවේදන තාක්ෂණ අංශයේ වර්ධනය සහ ආයෝජනය සඳහා වන සුවිශේෂී අවස්ථා අවධාරණය කෙරේ.

CSE වෙනුවෙන් අදහස් දක්වමින් එහි සභාපති ඩිල්ෂාන් වීරසේකර මහතා මෙලෙස ප්‍රකාශ කළේය. “වෙළඳපොළ ප්‍රාග්ධනීකරණය අනුව ගෝලීය වශයෙන් ඉතා ඉහළ මට්ටමේ පසුවන සමාගම් පහ තොරතුරු තාක්ෂණය කේන්ද්‍රගත කොටගෙන පවතින අතර, මෙම අංශයේ ඇති සුවිශේෂී හැකියාවන් ඒ හරහා ඉස්මතු වේ. ශ්‍රී ලංකාව තුළ, තොරතුරු තාක්ෂණ කර්මාන්ත ක්ෂේත්‍රය, තුන්වන විශාලතම අපනයන දායකයා ලෙස ශ්‍රේණිගත වී ඇති අතර, 2023 වර්ෂයේදී ඩොලර් බිලියන 1.5ක් උපයමින් හැකියාවෙන් යුතු වෘත්තිකයන් 150,000කට අධික සංඛ්‍යාවක් සේවයේ යොදවා ඇත. පසුගිය දශකය තුළ 300%කට වඩා වර්ධනය වී ඇති අතර, එය ආර්ථික ප්‍රගතියේ සහ ඩිජිටල් පරිවර්තනයේ ප්‍රධාන ධාවකයකි. ප්‍රාග්ධන වෙළඳපොළට පිවිසීමෙන්, තොරතුරු තාක්ෂණ සමාගම්වලට අත්‍යවශ්‍ය ආයෝජන අත්පත් කරගත හැකි අතර, එමඟින් තවදුරටත් එම සමාගම්වල වර්ධනයට සහය වන අතර රටේ සමෘද්ධියට ද ඉන් දායකත්වය සැපයේ.”

“ශ්‍රී ලංකාවේ ආර්ථික වර්ධනයට සහ සමෘද්ධියට තොරතුරු හා සන්නිවේදන තාක්ෂණ අංශය කෙතරම් තීරණාත්මකද යන්න USAID හරහා එක්සත් ජනපදය වටහාගෙන ඇත,” යනුවෙන් USAID වැඩබලන දූත මණ්ඩල අධ්‍යක්ෂ ජස්ටින් ඩිවෙනන්සො නිවේදනයක් නිකුත් කරමින් කියා සිටියේය. “ප්‍රාග්ධන වෙලඳපොළ හරහා අරමුදල් වෙත ප්‍රවේශය ලබා ගැනීමට මෙම අංශයට උපකාර කිරීමට USAID, CSE සමඟ කටයුතු කරන්නේ එබැවිනි. මෙම අංශය නවෝත්පාදනය සහ රැකියා උත්පාදනය පමණක් නොව කාන්තාවන්ට ද රැකියා අවස්ථා රාශියක් ලබා දෙන බව අපි දනිමු.”

මෙම අවස්ථාවේදී, සීටී සීඑල්එස්ඒ ආයෝජන බැංකු සහකාර උප සභාපති වෙන්කදේෂ් රාම්රාජ් මහතා විසින් “ප්‍රාග්ධන වෙළෙඳපොළ අවබෝධ කර ගැනීම, තොරතුරු තාක්ෂණ/තොරතුරු හා සන්නිවේදන තාක්ෂණ සමාගම් සඳහා අරමුදල් විකල්ප සහ CSEහි ලැයිස්තුගත වීමේ ප්‍රතිලාභ” යන මැයෙන් සවිස්තරාත්මක ඉදිරිපත් කිරීමක් සිදු කරන ලදී.

සාකච්ඡාවකින් සහ ප්‍රශ්නෝත්තර සැසියකින් මෙම සංසදයේ අවසානය සනිටුහන් විය. දිනේෂ් සපරමාදු මහතා; ජිෆ්රි සුල්ෆර් මහතා; වෙන්කදේෂ් රාම්රාජ් මහතා; සහ ඩිල්ෂාන් විරසේකර මහතා යන අය එකී මණ්ඩලයට අයත් විය. CSE වාණිජ අංශයේ ජ්‍යෙෂ්ඨ උප සභාපති පුණ්‍යමලී සපරමාදු මහත්මිය විසින් මෙහෙයවන ලද මෙම සැසිය හරහා සහභාගිවන්නන්ට පැහැදිලි කිරීම් ලබා ගැනීමට සහ ප්‍රවීණයන් සමඟ සෘජුව සම්බන්ධ වීමට අවස්ථාවන් හිමි විය.

ඡායාරූප විස්තරය - පුණ්‍යමලී සපරමාදු මහත්මිය, වෙන්කදේෂ් රාම්රාජ් මහතා, ඩිල්ෂාන් විරසේකර මහතා, දිනේෂ් සපරමාදු මහතා, සහ ජිෆ්රි සුල්ෆර් මහතා.