දකුණු අධිවේගී මාර්ගයට කොට්ටාවේදී සම්බන්ධ වන පිටත වටරවුම් මාර්ගයේ පසුගිය රජය විසින් වැඩ ආරම්භ කළ දෙවන අදියර වන කඩුවෙල සිට කඩවත දක්වා කිලෝ මීටර් 8.9 ක කොටසේ වැඩ නිමකර මේ මැයි මාසය අවසාන වනවිට ජනතා අයිතියට පත්කිරීමට අදහස් කර තිබුණත් එම විවෘත කිරීම ලබන ජුනි මාසය දක්වා කල්ගත වී ඇතැයි අනාවරණය වේ.

මහා මාර්ග සහ ආයෝජන ප්‍රවර්ධන අමාත්‍යංශයේ ප්‍රකාශකයෙකු අප වෙත සඳහන් කළේ මැයි මාසය අවසන් වනවිට වැඩ නිම කිරීමට නොහැකි වූ නිසා මෙම කොටස ලබන ජුනි මැදදී අනිවාර්යෙන්ම විවෘත කරනු ඇති බවයි.

මෙම මාර්ගයේ තෙවන අදියර වන කඩවත සිට කෙරවලපිටිය දක්වා කිලෝ මීටර් 9.32 ක් වන කොටසේ වැඩද ළඟදීම ආරම්භ කිරීමට රජය සැලසුම් කර ඇත.

පිටත වටරවුම් මාර්ගයේ තෙවන අදියර ඉදිකිරීමේ ප්‍රධාන කොන්ත්‍රාත්කාර සමාගම වන Metallurgical Corporation of China Ltd.(MCC) හි, ප්‍රකාශකයෙකු උපුටා දක්වමින් මෙරට චීන තානාපති කාර්යාලය ඊයේ සඳහන් කළේ ව්‍යාපෘතියේ පිරිවැය ඉහළ ගොස් ඇතැයි එල්ලවන චෝදනා අසත්‍ය බවයි.

මෙම මාර්ගයේ තෙවන කොටස සම්පූර්ණ කිරීමෙන් පසුව දකුණු අධිවේගී මාර්ගය ඔස්සේ පැමිණෙන්නෙකුට කෙලින්ම කටුනායක දක්වාම ගමන් කළ හැකියි.

පිටත වටරවුම් මාර්ගයේ සම්පූර්ණ දුර ප්‍රමාණය කිලෝ මීටර් 29.1 කි.