අද (05) දින පවත්වන භාණ්ඩාගාර බැඳුම්කර වෙන්දේසියේ දී ඉදිරිපත් කළ ප්‍රමාණය මෙන් දෙගුණයකටත් වඩා ලංසු අනුමත වී තිබේ.

මෙහිදී වෙන්දේසිය සඳහා ඉදිරිපත් කර තිබූ වසර 4 යි මාස 10 ක පරිණත කාලයකින් යුතු රුපියල් මිලියන 2,000 ක වටිනාකමකින් යුතු භාණ්ඩාගාර බැඳුම්කර සඳහා ලැබුණු ලංසු ප්‍රතික්ෂේප වී ඇත.

මේ අතර වසර 14 යි මාස 03 කින් යුතු බැඳුම්කර සඳහා මිලියන 42,865 ක ලංසු ලැබී තිබෙන අතර එයින් මිලියන 10,455 ක ලංසු අනුමත කිරීමට ශ්‍රී ලංකා මහ බැංකුව පියවර ගෙන ඇත. කෙසේ වෙතත් වෙන්දේසිය සඳහා ඉදිරිපත් කර තිබුණේ රුපියල් මිලියන 3,000 ක බැඳුම්කර ප්‍රමාණයක් පමණි.

මීට අමතරව වසර 24 යි මාස 11 ක පරිණත කාලයකින් යුතු රුපියල් මිලියන 10,250 ක භාණ්ඩාගාර බැඳුම්කර ප්‍රමාණයක් සඳහා ලැබුණු ලංසු ද මෙහිදී අනුමත වී තිබේ. මෙම කාණ්ඩයට අදාළව වෙන්දේසිය සඳහා ඉදිරිපත් කර තිබුනේ රුපියල් මිලියන 5,000 ක බැඳුම්කර ප්‍රමාණයකි. ඒ සඳහා රුපියල් මිලියන 48,080 ක ලංසු ඉදිරිපත්ව තිබුණි.

මේ අනුව අද දින වෙන්දේසිය සඳහා මූලික වශයෙන් රුපියල් මිලියන 10,000 ක වටිනා භාණ්ඩාගාර බැඳුම්කර ප්‍රමාණයක් ඉදිරිපත් කර තිබුණ ද වෙන්දේසියේ දී රුපියල් මිලියන 20,705 ක බැඳුම්කර සඳහා ලැබුණු ලංසු භාරගෙන තිබේ.