ලෝක බැංකු සමූහයේ සාමාජික ආයතනයක් වන ජාත්‍යන්තර මූල්‍ය සහයෝගීතාව (International Finance Corporation - IFC) විසින් එක්සත් ජනපද ඩොලර් මිලියන 166ක ආයෝජන වැඩසටහනක් අද (25) දින නිවේදනය කළේය. ශ්‍රී ලාංකික ව්‍යාපාරවලට සහාය වීම සහ ආර්ථික ස්ථායිකරණයේ සිට තිරසාර වර්ධනය දක්වා රට පරිවර්තනය වීම වේගවත් කිරීම වෙනුවෙන්, ජාත්‍යන්තර මූල්‍ය සහයෝගීතාව විසින් මෙම ආයෝජනය සිදුකරනු ලැබේ.

මෙය ලෝක බැංකු සමූහය විසින් ශ්‍රී ලංකාවේ පෞද්ගලික අංශය කෙරෙහි ඇති දිගුකාලීන කැපවීම තවදුරටත් ශක්තිමත් කරන ආයෝජනයකි.

කාන්තාවන් සතු ව්‍යාපාර හා කෘෂි ව්‍යාපාර අංශය බලගැන්වීම කෙරෙහි අවධානය යොමු කරමින් කුඩා හා මධ්‍ය පරිමාණ ව්‍යවසායන් (SMEs) සඳහා මූල්‍ය ප්‍රවේශය පුළුල් කිරීම මෙම ආයෝජනයේ අරමුණ වේ.

මෙම ආයෝජනය උපායමාර්ගිකව ශ්‍රී ලංකාවේ ප්‍රමුඛ වාණිජ පෞද්ගලික බැංකු තුනක් වන නේෂන්ස් ට්‍රස්ට් බැංකුව (NTB), කොමර්ෂල් බැංකුව සහ ජාතික සංවර්ධන බැංකුව (NDB) හරහා සිදුකෙරේ. එය ඩොලර් මිලියන 50ක ණයක්, ඩොලර් මිලියන 80ක අවදානම් බෙදාගැනීමේ පහසුකමක් (RSFs) සහ ඩොලර් මිලියන 36ක වෙළඳ මූල්‍ය සහාය යන අංගවලින් සමන්විත වනු ඇත.