April, 20, 2022
ජාත්‍යන්තර ණය ශ්‍රේණිගත කිරීමේ ආයතනයක් වන Moody's Investors Service විසින් ශ්‍රී ලංකාවේ ණය ශ්‍රේණිය Ca දක්වා පහත හෙළීමට පසුගිය (18) දා කටයුතු කළේය. මීට පෙර පසුගිය අප්‍රේල් 13 දින තවත් ගෝලීය ණය ශ්‍රේණිගත කිරීමේ ආයතන දෙකක් වන S&P Global Ratings විසින් CC දක්වාත්, Fitch Ratings විසින් C දක්වාත් ශ්‍රී ලංකාව ණය ශ්‍රේණිගත කිරීම්වලින් පහළ දැමීමට පියවර ගත්තෝය.
කලින් වතාවක Moody's ආයතනය 2021 ඔක්තෝබර් 28 දින ශ්‍රී ලංකාවේ ණය ශ්‍රේණිය Caa2 දක්වා පහත දැමූ අතර 2021 දෙසැම්බර් 17 වන දා Fitch Ratings කියා සිටියේ ශ්‍රී ලංකාවේ ණය ශ්‍රේණිය CC දක්වා අඩුකරනු ලබන බවයි.
කෙසේවෙතත් එම අවස්ථාවේ දී ෆිච් ණය ශ්‍රේණිගත කිරීමේ ආයතනය මගින් ශ්‍රී ලංකා ශ්‍රේණිගත කිරීම හදිසි ලෙස පහත හෙළීමේ ක්‍රියාවට රජය තරයේ විරෝධය පළ කරනු ලබන බව ශ්‍රී ලංකා මහ බැංකුව විසින් නිවේදනයක් නිකුත් කරමින් කියා සිටියේය. එම ප්‍රකාශයේ වැඩිදුරටත් සඳහන් වූයේ අනවශ්‍ය හදිසි පියවරක් ලෙස ෆිච් ණය ශ්‍රේණිගත කිරීමේ ආයතනය (ෆිච් රේටින්ස්) ශ්‍රී ලංකාවේ ජාත්‍යන්තර ස්වෛරීත්ව ණය ශ්‍රේණිගත කිරීම පහත හෙළා ඇති බවයි. එසේම මෙම ක්‍රියාව 2022 වර්ෂය සඳහා වන අයවැය වාර්තාව ප්‍රකාශයට පත් කිරීමට දින කිහිපයකට පෙර, මූඩීස් ආයෝජන සේවාව විසින් සිදු කරන ලද සාධාරණ නොවන ණය ශ්‍රේණිගත කිරීම් පහත හෙළීම හා සමාන බව ද එම ප්‍රකාශයේ සඳහන් වුණි.
මෙම ආයතන විසින් ණය ශ්‍රේණි වාර්තාවන් සකස් කරන්නේ ශ්‍රී ලංකාවට පමණක් නොවේ. එසේම ඔවුන්ට ශ්‍රී ලංකාව සමඟ පුද්ගලික කෝන්තරයක් පිරිමසා ගැනීමට තිබෙනවා යැයි ද සිතිය නොහැකිය. තාක්ෂණික නිර්නායක මත පදනම්ව ජාත්‍යන්තර ප්‍රමිතීන්ට අනුකූලව සකස් කෙරෙන මෙකී වාර්තා විවේචනයට ලක්කරමින් දේශපාලන ප්‍රතිචාර දැක්වීම හැර ආණ්ඩුව හෝ මහ බැංකුව ඊට සාධනීය අයුරින් ප්‍රතිචාර දැක්වීමට සමත් වුණි නම් නැවත වරක් එකී ආයතනවල අඩු ලංසුව ශ්‍රී ලංකාවට නොලැබෙන්නට ඉඩ තිබුණි.
2005 වසරේ සිට මේ දක්වා කාලය තුළ දී Moody's Investors Service, S&P Global Ratings හා Fitch Ratings යන ගෝලීය ණය ශ්‍රේණිගත කිරීමේ ආයතන විසින් ශ්‍රී ලංකාව සම්බන්ධයෙන් නිකුත් කර තිබෙන ණය ශ්‍රේණීන්වලින් පහළම තැනට වැටී ඇත්තේ මෙවරය.
මෙය එක රැයකින් සිදුවූවක් නොවේ. 2005 වසර වන විට මෙම ආයතන තුනෙහිම වර්ගීකරණයන්ට අනුව B කාණ්ඩයට ඉහළින් සිටි ශ්‍රී ලංකාවට C කාණ්ඩයට වැටීමට සිදුවන්නේ 2020 වසරේ සිටය.
පසුගිය 2021 වසර අගභාගයේ දී මෙකී ශ්‍රේණිගත කිරීමේ ආයතන ශ්‍රී ලංකාව පහළට දමන විට රජය කියා සිටියේ, ඉදිරි මාසවල දී ණය ගෙවීම් පැහැර හැරීමට ඇති සම්භාවිතාව ඉහළ ගොස් ඇතැයි සිදු කරන ලද පදනම් විරහිත ප්‍රකාශවලට පටහැනිව, රජය සහ මහ බැංකුව විසින් මිත්‍ර ජාතීන්ගෙන් අරමුදල් සපයා ගැනීම සඳහා සහාය ලබා ගැනීමට ගනු ලබන ක්‍රියාමාර්ග ඵලදායි වෙමින් පවතින අතර, එමගින් ඉදිරි කාලය තුළ දී ගෙවුම් ශේෂය මත පීඩනය සමනය කිරීමට හැකිවනු ඇති බවත්ය. නමුත් පසුගිය කාර්තුව තුළ දී එවැනි දෙයක් සිදුවූයේ නැත.
සාර්ව ආර්ථික සහ මූල්‍ය පද්ධති ස්ථායිතාව සහතික කිරීම සඳහා ඉදිරිපත් කළ සය මාසික පෙර දැක්ම මගින් 2021 වසරේ දෙසැම්බර් මස වන විට සහ 2022 වසරේ මාර්තු මස වන විට අපේක්ෂිත මුදල් ප්‍රවාහ ගලා ඒම් පිළිබඳව පැහැදිලිව ප්‍රකාශයට පත් කර ඇති අතර, මෙම ගලා ඒම් නියත වශයෙන් ලැබෙනු ඇති බවටත් 2021 වසර අවසානය වන විට දළ නිල සංචිත මට්ටම එක්සත් ජනපද ඩොලර් බිලියන 3කට වඩා ඉහළින් පවතිනු ඇති බවටත් නිසැකව විශ්වාස කරන බව රජය සහ මහ බැංකුව ඒ අවස්ථාවේ දී කැට තබා පැවසීය.
නමුත් මාස 06කට පෙර මෙම ශ්‍රේණිගත කිරීමේ ආයතන කළ අනතුරු ඇඟවීම නිසි අයුරින් පිළිගෙන කළ යුතු දේ සිදුකළා නම් අද මෙයාකාර ඉරණමක් අත්විඳීමට ශ්‍රී ලංකාවට සිදුනොවනු ඇත.
2005 වසරේ සිට මේ දක්වා Moody's Investors Service, S&P Global Ratings හා Fitch Ratings යන ආයතන ශ්‍රී ලංකාව සම්බන්ධයෙන් ලබාදුන් ණය ශ්‍රේණිගත කිරීම් අනුපිළිවෙලින් පහත දැක්වේ.
Video Story
