April, 18, 2022
හේමාස් රෝහල් සමූහය , වෛද්‍ය සහ සුවසේවා ප්‍රජාවගේ දැඩි ඉල්ලීමට කඩිනම් ප්‍රතිචාර දක්වමින් කාසල් වීදියේ මාතෘ සහ කාන්තා රෝහලේ නව උපත් ළදරු ඒකකයේ පරිහරණය සඳහා අත්‍යාවශ්‍යව තිබූ අන්තරාසර්ග නල (Endotracheal ET ) 500ක් පරිත්‍යාග කරන ලදි. කාසල් වීදිය මාතෘ සහ කාන්තා රෝහලේ නව ළදරු ඒකයේ ළමා රෝග විශේෂඥ වෛද්‍ය සමන් කුමාර මහතා විසින් සමාජ මාධ්‍ය නාලිකා වෙත නිකුත් කරනු ලැබූ ආයාචනාත්මක පණිවිඩයට අනුව මෙම රෝහලේ නව ළදරු ඒකකයේ සිටින අලුත උපන් ළදරුවන්ගේ ශ්වසනය සඳහා අන්තරාසර්ග නල (Endotracheal ET ) උපකරණයන්හි දැඩි අවශ්‍යතාවක් පැවති අතර වර්තමානයේ පවතින ආර්ථික අර්බුදය හමුවේ මෙම උපකරණයන්ගේ ශීඝ්‍ර හිඟයක් පවතින බව ඔහු සඳහන් කරන ලදි. මෙම පණිවිඩයට කඩිනමින් ප්‍රතිචාර දක්වමින් හේමාස් රෝහල් සමූහය මෙම පරිග්‍යාගය සිදු කර ඇත.
විශේෂඥ වෛද්‍ය සමන් කුමාර මහතා සඳහන් කරන ආකාරයට මෙම තත්වය දැඩි ජීවිත අවදානමක් ඇති කර තිබෙන අතර කාසල් වීදිය කාන්තා රෝහල සතුව දැනට පවතින අන්තරාසර්ග නල (Endotracheal ET ) උපාංග සහ ශ්වසන උපකරණ, එක් වරකට වඩා වාරගණනක් භාවිතා කිරීමට සිදුවීම වෛද්‍ය විද්‍යාත්මකව කිසිසේත්ම නිර්දේශ කළ නොහැකි බවද ඔහු අවධාරණය කළේය.
මෙම වෛද්‍ය උපාංගයන් කාසල් වීදිය කාන්තා රෝහල වෙත පරිත්‍යාග කරමින් හේමාස් රෝහල් සමූහයේ කළමණාකාර අධ්‍යක්ෂ ආචාර්ය ලකිත් පීරිස් මහතා පැවසුවේ “ වගකීම්සහගත සුවසේවා සම්පාදකයකු ලෙස, උද්ගතවී ඇති හදිසි තත්වය අවබෝධකර ගනිමින්, එම තත්වයට වහා පිළියම් යෙදීම අපගේ ප්‍රමුඛතම වගකීමක් ලෙස සලකා ඉක්මනින් ක්‍රියාත්මක වීමට අපි කටයුතු කළා. කාසල් වීදිය කාන්තා රෝහල සඳහා අත්‍යාවශ්‍ය ව තිබූ මෙම වෛද්‍ය උපකරණයන්ගේ හිඟය පුද්ගලයකුගේ ජීවිතයත් මරණයත් අතර තීරණාත්මක මොහොතක් වූ බැවින් මෙම තත්වය සඳහා මැදිහත් වෙමින් මෙම උපාංගයන් සැපයීමට හේමාස් රෝහල් සමූහය පියවර ගනු ලැබුවා”.
මෙම පරිත්‍යාගය පිළිබඳව සිය හෘදයාංගමය සතුට පළ කරන විශේෂඥ වෛද්‍ය සමන් කුමාර මහතා සඳහන් කළේ “ මෙම මනුසත් ක්‍රියාව මගින් හේමාස් සමූහයේ මානව වාදී ගුණාංග මැනවින් ඉස්මතු වන අතරම ශ්‍රී ලාංකීකයින් ලෙස මේ දුෂ්කර කාලසීමාවේදී මෙරට ජනතාව වෙනුවෙන් ලබා දෙන සහායට අපගේ ගෞරවනීය ස්තුතිය හේමාස් රෝහල් සමූහය වෙත පිරිනමනවා” යනුවෙනි.
ශ්‍රී ලංකාව අත්දකිමින් සිටින ආර්ථික අර්බුදයේ දරුණු ප්‍රතිවිපාතයන්ට අන් සෑම ක්ෂේත්‍රයක් මෙන්ම සුවසේවා ක්ෂේත්‍රයද ගොදුරුව ඇති බැවින් රටපුරාම රෝහල් පද්ධතිය උග්‍ර ඹෟෂධ සහ වෛද්‍ය උපකරණයන්හි හිඟයක් ඇතිව තිබේ.
ශ්‍රී ලංකාවේ ඉදිරියෙන් සිටින රෝහල් සේවා සමූහයක් ලෙස හේමාස් රෝහල් සමූහය රෝගීන්ගේ සුවපත්බවට ප්‍රමුඛතම ස්ථානයක් ලබා දෙමින් මෙම ජාතික හදිසි තත්වය පාලනය කිරීම සඳහා දිය හැකි උපරිම සහාය ලබා දීමට පියවර ගෙන ඇත.
Video Story
