2024 අංක 24 දරන බැංකු (සංශෝධන) පනතේ විධිවිධාන 2024.06.15 දින සිට ක්‍රියාත්මක වන බව ශ්‍රී ලංකා මහ බැංකුව දන්වා සිටී. ශ්‍රී ලංකාවේ බැංකු අංශයේ ඔරොත්තු දීමේ හැකියාව වැඩි දියුණු කිරීම උදෙසා බලපත්‍රලාභී වාණිජ බැංකු සහ බලපත්‍රලාභී විශේෂිත බැංකු (බලපත්‍රලාභී බැංකු) සඳහා අදාළ වන නීතිමය සහ නියාමන රාමුව තවදුරටත් ශක්තිමත් කිරීමේ අරමුණින් මෙම සංශෝධන සකස් කරන ලදී.

බැංකු ව්‍යාපාරයෙහි නියුතු පුද්ගලයන්ට බලපත්‍ර ලබාදීමේ ක්‍රියාපටිපාටියක් හඳුන්වාදීම සහ ක්‍රියාත්මක කිරීමත්, බැංකු ව්‍යාපාරයට අදාළ කරුණු නියාමනය කිරීම සහ පාලනය කිරීමත් සලසනු ලබන බැංකු පනත අවසන් වරට සංශෝධනය කරනු ලැබුවේ 2006 වසරේ දීය. එබැවින්, වත්මන් නියාමන රාමුවෙහි වර්ධනයන්, ආර්ථික සහ වෙළඳපල වර්ධනයන්, විචක්ෂණ අවශ්‍යතාවන් පිළිබඳ යහභාවිතයන් සහ ජාත්‍යන්තර ප්‍රමිතීන්, දේශීය බැංකු අංශය සඳහා උචිත පරිදි සැලකිල්ලට ගනිමින් මෙම මෑත කාලීන සංශෝධන සකස් කරන ලදී. ඊට අමතරව, බැංකු පනතට සංශෝධන කෙටුම්පත් කිරීමේදී, අදාළ පාර්ශවකරුවන්ගේ, එනම් බැංකු අංශය, බැංකුවල විගණන සිදුකරනු ලබන විගණන ආයතන, අනෙකුත් නියාමන ආයතන සහ බලධාරීන්ගේ නිරීක්ෂණ සහ අදහස් ද සුදුසු පරිදි සලකා බලන ලදී.