අඛණ්ඩව 18 වන වරටත් සංවිධානය කෙරුණු SLIM Kantar ජනතා සම්මාන උළෙල 2024 මාර්තු 19 වන දින මොනාක් ඉම්පීරියල් හෝටලයේ දී අති උත්කර්ෂවත් අයුරින් පැවැත්විණි.  ශ්‍රී ලංකාවේ අලෙවිකරණ ක්ෂේත්‍රය ආශ්‍රිත වෘත්තිකයින්ගේ විශිෂ්ටත්වය ඇගයීම වෙනුවෙන් සංවිධානය කෙරුණු මෙම සුවිශේෂී සම්මාන උළෙලට මෙරට ප්‍රමුඛ පෙළේ ආයතනික ප්‍රධානීන්, මාධ්‍යවේදීන් ඇතුළු සම්භාවනීය අමුත්තන් 600 කට අධික පිරිසක් සහභාගි වූහ.

මෙවර සම්මාන ප්‍රදානෝත්සවයේ  ප්‍රධාන ආරාධිතයා ලෙස ජෙනරාල් ශවේන්ද්‍ර සිල්වා මහතා සහභාගි වූ අතර, මෙවර ගෞරවනීය ආරාධිතයා වූයේ SLIM හිටපු සභාපති දීපාල් සූරියආරච්චි මහතා යි.  මෙරට අලෙවිකරණ ක්ෂේත්‍රය ආශ්‍රිත ප්‍රමුඛතම සම්මාන උළෙල වන SLIM Kantar හි ජයග්‍රාහකයින් තෝරා ගනු ලබන්නේ ප්‍රමුඛතම සමීක්ෂණ ආයතනයක් වන Kantar විසින් සිදු කරනු ලබන දීපව්‍යප්ත සමීක්ෂණයක් මත පදනම් ව වන අතර, එහි දී ජනතාවගේ කැමැත්තට පමණක් ම අවධානය යොමු කිරීම විශේෂත්වයකි.

මේ පිළිබඳ ව අදහස් දක්වමින් SLIM සභාපති චින්තක පෙරේරා මහතා ප්‍රකාශ කළේ, “ SLIM Kantar ජනතා සම්මාන උළෙලේ ප්‍රමිතිය  හා විශ්වසනීයත්වය  ඉහළ නංවමින් සෑම වසරක ම එහි ගුණාත්මක භාවය වර්ධනය කිරීමට අපි කටයුතු කරනවා. ශ්‍රී ලංකාවේ අලෙවිකරණ ක්ෂේත්‍රයේ වර්ධනයට සහයෝගය ලබා දෙමින්, මෙරට අලෙවිකරණ විශිෂ්ටත්වයේ මිණුම් ලකුණ ලෙස මෙම සම්මාන උළෙල  ලබා ඇති කීර්තිය වැඩි දියුණු  කිරීමට අපගේ එම ක්‍රියා මාර්ග මහත් ශක්තියක් බව පැවසුවොත් එය නිවැරදියි. ඒ වගේ ම මෙවර සම්මාන උලෙළේ ප්‍රතිඵල පිළිබඳ ව අපි ඉතා සතුටට පත් වෙනවා." යනුවෙනි.

මෙහි දී අදහස් දැක්වූ SLIM  උප සභාපති ගයාන් පෙරේරා මහතා පැවසුවේ, “ මෙවර ජයග්‍රාහකයින් සියලු ම දෙනාට සුබ පැතීමට මම මෙය අවස්ථාවක් කර ගන්නවා. ආයතනවල අලෙවිකරණය හා සම්බන්ධ තීරණ ගැනීමේ දී මේ රටේ ජනතාවගේ රුචි අරුචිකම් පිළිබඳ අන්තර්ගත වන අපගේ මෙම පුළුල් මහජන සමීක්ෂණයේ තොරතුරු ඉතා ප්‍රයෝජනවත් වන බව අවධාරණය කිරීමට කැමතියි. ඒ වගේ ම ආයතනික භාවිතය සඳහා මෙම සමීක්ෂණ වාර්තාව SLIM වෙතින් මිල දී ගැනීමට හැකි බවත් සිහිපත් කළ යුතු ම යි." යනුවෙනි.

Kantar සමීක්ෂණ ආයතනයේ අධ්‍යක්ෂිකා හිමාලි මධුරසිංහ මහත්මිය අදහස් දක්වමින් මෙම සමීක්ෂණය සඳහා උපයෝගී කරගත් පර්යේෂණ ක්‍රමවේද පිළිබඳ ව ප්‍රකාශ කළාය.  මේ පිළිබඳ ව ගැඹුරින් අධ්‍යනය කිරීමට කැමැත්තක් දක්වන අයට 'People’s Awards' Facebook පිටුවේ webinar වීඩියෝව නැරඹීමෙන් වැඩි අවබෝධයක් ලබා ගත හැකි බව ප්‍රකාශ කළ මධුරසිංහ මහත්මිය,  මෙම සමීක්ෂණය මගින් රැස්කර ඇති දත්ත සහ  අනාවරණය කර ගත් ප්‍රවණතා අනාගත අලෙවිකරණ උපායමාර්ග සැකසීම සඳහා ඉතා වැදගත් වනු ඇති බව අවධාරණය කළාය.

2024 වසරේ SLIM Kantar ජනතා සම්මාන උළෙලේ  ව්‍යාපෘති සභාපතිවරයා ලෙස කටයුතු කළ මන්තික රණසිංහ මහතා මෙසේ අදහස් ප්‍රකාශ කළේය. "මෙම ව්‍යාපෘතිය සාර්ථක කර ගැනීමට අපට නන් අයුරින් සහයෝගය ලබා දුන් අපගේ  අනුග්‍රාහකයින්, සේවා සහකරුවන්, Kantar කණ්ඩායම, SLIM කාර්ය මණ්ඩලය සහ ව්‍යාපෘති කමිටුව ඇතුළු සියලු පාර්ශ්වයන්ට මගේ ස්තුතිය ප්‍රකාශ කිරීමට මෙය අවස්ථාව කර ගන්නවා. ඔවුන්ගේ කැප වීම මෙම ව්‍යාපෘතිය සාර්ථක කර ගැනීමට මහත් ශක්තියක් වුණා. "

SLIM  ප්‍රධාන විධායක නිලධාරී සනත් සේනානායක මහතා මෙවර ජයග්‍රාහකයින්ට සුබ පැතුම් එක් කරමින් ප්‍රකාශ කළේ, “SLIM Kantar ජනතා සම්මාන දිනූ ජයග්‍රාහකයින්ට වගේ ම මෙවර සම්මාන සඳහා තරඟ කළ සියලු දෙනාට සුබ පැතුම් එක් කිරීමට කැමතියි. මෙම සම්මාන මගින් ඔබගේ කැප වීම, විශිෂ්ටත්වය  සහ ඔබගේ නවෝත්පාදනයන්ගේ සාර්ථකත්වය වගේ ම ඒ සඳහා ලැබී ඇති ජනතා ආකර්ෂණය පිළිබිඹු වෙනවා." යනුවෙනි.

ජයග්‍රාහී ලෙස නිමාවට පත් වූ 2024 SLIM Kantar ජනතා සම්මාන උළෙල ශ්‍රී ලාංකිකයන්ගේ ආකර්ෂණය දිනූ සන්නාම සහ පුද්ගල පෞරුෂයන් ඇගයීමට ලක් කෙරිණි.