ශ්‍රී ලංකා අපනයන සංවර්ධන මණ්ඩලය (EDB), ජාත්‍යන්තර මූල්‍ය සංස්ථාව (IFC) සමඟ එක්ව සහ යුරෝපා සංගමයේ (EU) සහාය ඇතිව 'දකුණු ආසියාවේ දේශගුණික හිතකාමී සහ ඇතුළත් යටිතල පහසුකම් වේගවත් කිරීමේ' (ACSIIS) වැඩසටහන යටතේ ExpoScaleUp හි තෙවන අදියර ආරම්භ කර තිබේ. මෙම ප්‍රමුඛතම වැඩසටහන සැලසුම් කර ඇත්තේ ශ්‍රී ලාංකික සුළු හා මධ්‍ය පරිමාණ ව්‍යවසායකයින්ට (SMEs) ජාත්‍යන්තර වෙළඳපල තුළ තරඟ කිරීමට සහ වර්ධනය වීමට අවශ්‍ය මගපෙන්වීම ලබා දීම සඳහා ය.

දින හතරක තීව්‍ර පුහුණු වැඩසටහනක් ලෙස ක්‍රියාත්මක වූ මෙයට දිවයින පුරා විසිරී සිටින ඉහළ විභවයක් සහිත සුළු හා මධ්‍ය පරිමාණ ව්‍යවසායකයින් 25 දෙනෙකු සහභාගී වූහ. ප්‍රායෝගික හා වෙළඳපල ඉලක්ක කරගත් අපනයන අලෙවිකරණ සැලසුම් (Export Marketing Plans) සකස් කිරීම මගින් ඔවුන්ගේ අපනයන සූදානම ශක්තිමත් කිරීම මෙහි ප්‍රධාන අරමුණ විය. සහභාගිවන්නන් හට නෙදර්ලන්තයේ ජාත්‍යන්තරව පිළිගත් අපනයන අලෙවිකරණ විශේෂඥයෙකුගෙන් සහ EDB පුහුණු කණ්ඩායමෙන් විශේෂඥ මගපෙන්වීම් හිමි විය. ExpoScaleUp යනු EDB, IFC සහ EU විසින් ඒකාබද්ධව ක්‍රියාත්මක කරනු ලබන 'ශ්‍රී ලංකා අපනයන විශිෂ්ටතා මුලපිරීමේ' (SLEEI) ප්‍රධාන අංගයකි. මෙම මුලපිරීමේ සමස්ත අරමුණ වන්නේ ව්‍යවසායකයින්ගේ අපනයන සූදානම, වෙළඳපල ප්‍රවේශය සහ දිගුකාලීන තිරසාරභාවය ඉහළ නැංවීම මගින් ඔවුන්ගේ තරඟකාරිත්වය ශක්තිමත් කිරීමයි.

2025 ජනවාරි මාසයේ ආරම්භ කළ දින සිට ExpoScaleUp වැඩසටහන මගින් මේ වන විට කණ්ඩායම් දෙකක් අවසන් කර ඇති අතර, එමගින් ව්‍යවසායන් 50 කට සහාය ලබා දී ඇත. මෙම වැඩසටහන හරහා දැනටමත් සමාගම් පහක් ඔවුන්ගේ ප්‍රථම අපනයන ඇණවුම් ලබාගෙන ඇති අතර, තවත් සමාගම් 38 කට ජාත්‍යන්තරව පිළිගත් සහතික ලබා ගැනීමට සහ විදේශීය වෙළඳපල නිරාවරණ කටයුතුවලට සහභාගී වීමට සහාය ලබා දී ඇත. රාජ්‍ය අංශය සහ ජාත්‍යන්තර සංවර්ධන හවුල්කරුවන් අතර ඇති ශක්තිමත් සහයෝගීතාවය තුළින් ධාරිතා වර්ධනය සහ ඉලක්කගත වෙළඳපල ප්‍රවේශය ලබා දීමේ වැදගත්කම මෙම ප්‍රතිඵල මගින් මනාව පිළිබිඹු වේ.

සමාරම්භක උත්සවයේදී අදහස් දැක්වූ ශ්‍රී ලංකා අපනයන සංවර්ධන මණ්ඩලයේ සභාපති මංගල විජේසිංහ මහතා පැවසුවේ, ව්‍යවසායකයින්ට අපනයන විභවයේ සිට අපනයන සාර්ථකත්වය දක්වා ගමන් කිරීමට ExpoScaleUp වැනි වැඩසටහන් අත්‍යවශ්‍ය වන බවයි. ජාත්‍යන්තර වෙළඳපල තුළ තිරසාර ලෙස වර්ධනය විය හැකි තරඟකාරී අපනයනකරුවන් පිරිසක් බිහිකිරීම සඳහා ප්‍රායෝගික පුහුණුව සහ අවධානය යොමු කළ ව්‍යාපාරික සැලසුම් අත්‍යවශ්‍ය බව ඔහු වැඩිදුරටත් සඳහන් කළේය.

තෙවන අදියරේ සහභාගිවන්නන්ට ඔවුන්ගේ නිෂ්පාදන සහ ව්‍යාපාරික අරමුණු වලට ගැලපෙන අපනයන අලෙවිකරණ සැලසුම් සකස් කිරීම සඳහා සෘජු සහාය ලැබෙනු ඇත. වැඩසටහන සාර්ථකව නිම කරන සමාගම්වලට 'ExpoConnect' හරහා ගෝලීය හවුල්කරුවන් සමඟ සම්බන්ධ වීමට ද අවස්ථාව හිමි වේ.

මෙම අඛණ්ඩ සහයෝගීතාවය හරහා EDB, IFC සහ යුරෝපා සංගමය අපේක්ෂා කරන්නේ 2030 වසර වන විට අපනයන ආදායම ඩොලර් බිලියන 36 දක්වා ළඟා කර ගැනීමේ ශ්‍රී ලංකාවේ ජාතික ඉලක්කයට දායක විය හැකි අපනයන සූදානම් ව්‍යවසායකයින් පිරිසක් බිහිකිරීමයි.