සෙලාන් බැංකුවේ චන්ද්‍රිකා ද සිල්වා ලෝක ජ්‍යෙෂ්ඨ බැඞ්මින්ටන් තරගාවලියේදී රිදී සහ ලෝකඩ පදක්කම් දිනයි

August, 28, 2019

දශකයකට අධික කාලයක් තිස්සේ මෙරට කාන්තා බැඞ්මින්ටන් ශූරිය ලෙස ඇගයීමට ලක්වූ සෙලාන් බැංකුවේ චන්ද්‍රිකා ද සිල්වා පසුගියදා පැවති ලෝක ජ්‍යෙෂ්ඨ බැඞ්මින්ටන් තරගාවලියේදී කාන්තා කේවල අංශයේ රිදී පදක්කමක් සහ කාන්තා යුගල අංශයේ ලෝකඩ පදක්කමක් දිනාගැනීමට සමත් විය. බැඞ්මින්ටන් ක්‍රීඩාවේ වසර 20 කට අධික කාලයක් පුරා විහිදෙන අත්දැකීම් සම්භාරයක් හිමි ඇය 11 වරක් ශ්‍රී ලංකාවේ ජාතික කේවල බැඞ්මින්ටන් ශූරතාව දිනා ඇති අතර 12 වරක් යුගල ශූරතාව දිනා තිබේ.

මේ පිළිබඳව අදහස් දක්වමින් චන්ද්‍රිකා ද සිල්වා මෙසේ පැවසුවා ය. “මේ ජයග්‍රහණය මට විශාල සතුටක්. වයස 40 ට වැඩි කාණ්ඩය යටතේ රටවල් 29 ක තරගකාරියන් සමග තරග වැදී ශ්‍රී ලංකාවට කීර්තියක් අත්කර දීමට මට හැකියාව ලැබුණා. මේ තරගාවලියට සහභාගී වීම සඳහා මට අවස්ථාව ලබාදීම සහ මගේ ක්‍රීඩා ජීවිතය තුළ නිරන්තරයෙන් මා දිරිමත් කිරීම සම්බන්ධයෙන් මා සෙලාන් බැංකුවට ස්තූතිවන්ත වෙනවා.”