පසුගියදා කලාපීය වැවිලි සමාගම් (RPCs) විසින් පාලනය කරනු ලබන වතු බලහත්කාරයෙන් සහ නීතිවිරෝධී ලෙස අත්පත් කරගැනීමේ සිදුවීම ලංකා වැවිලිකරුවන්ගේ සංගමය (PA) දැඩි ලෙස හෙළා දකින අතර මේ සම්බන්ධයෙන් නීතිය ක‍්‍රියාත්මක කරන ලෙසත් RPC වතුවල නීතියේ ආධිපත්‍යය තහවුරු කරන ලෙසත් රජයෙන් සහ නීතිය ක‍්‍රියාත්මක කරන නිලධාරීන්ගෙන් ඉල්ලා සිටී.

2021 දෙසැම්බර් 6 වන දින සිදු වූ මෙම සිද්ධියට ප‍්‍රතිචාරයක් ලෙස ලංකා වැවිලිකරුවන්ගේ සංගමය මෙම නිවේදනය නිකුත් කර ඇත. රක්වාන මාදම්පේ හපුගස්තැන්න වැවිලි සමාගමට අයත් හෙක්ටයාර් 8.5 ක පමණ වන ඉඩමක් පුද්ගලයින් 200 දෙනෙකු පමණ මෙසේ බලහත්කාරයෙන් අත්පත් කරගෙන ඇත.

විශේෂයෙන්ම මෙම පිටස්තර පුද්ගලයින් සමඟ වතු කම්කරුවන් හා මෙම වතුයායේ පදිංචිකරුවන් එක්ව ගැටුම්කාරී තත්වයක් ඇතිවීමේ හැකියාව සැලකිල්ලටගත් වතු කළමනාකාරීත්වය අදාල බලධාරීන්ගෙන් මෙයට වහාම මැදිහත්වී මෙම ගැටළුව සාමකාමීව විසඳා ගන්නා ලෙස ඉල්ලා සිටියේය. ඒ අනුව රක්වාන පොලීසිය, ප‍්‍රදේශයේ ග‍්‍රාම නිලධාරීවරයා සහ ගොඩකවෙල ප‍්‍රාදේශීය ලේකම්වරයාට ද මේ පිළිබඳව දැනුවත් කර තිබේ.

කෙසේ වෙතත් එම ස්ථානයට පැමිණි පොලිස් නිලධාරීන්ගේ ඉල්ලීම පවා නොතකා මෙම පිරිස එම ස්ථානයෙන් පිටව යාම ප‍්‍රතික්ෂේප කර තිබුණි. මෙම සිද්ධිය සිදු වූ අවස්ථාවේදී පොලීසිය විසින් කිසිවකු අත්අඩංගුවට නොගත් අතර ඉන් අනතුරුව අදාළ කරුණ රක්වාන අධිකරණයට ඉදිරිපත් කිරීමත් සමඟ මහේස්ත‍්‍රාත්වරයාගේ උපදෙස් මත ඔවුන් අත්අඩංගුවට ගැනීමට කටයුතු කර තිබුණි. මේ වනවිට වතු කම්කරුවන් 85 දෙනෙකු පමණ පැල්මඩුල්ල අධිකරණයට ඉදිරිපත් කර තිබූ අතර පසුව එක් අයෙකුට රුපියල් ලක්ෂයක ශරීර ඇප මත ඔවුන්ව මුදා හරිනු ලැබීය.

අවාසනාවකට මෙම පුද්ගලයින්ට නැවතත් මාදම්පේ වත්තට පැමිණීමට එරෙහිව අධිකරණය අනතුරු ඇඟවීමක් නොකිරීම නිසා 2021 දෙසැම්බර් අග සිට ලබන වසරේ මුල් භාගය දක්වා රබර් නැවත වගා කිරීම සඳහා වෙන්ව තිබූ මෙම ඉඩම වෙත ඔවුන්ගෙන් බොහෝ දෙනෙක් ආපසු ගොස් තිබේ.

බලහත්කාරයෙන් ඇතුළු වූ මෙම පිරිස අදාල ඉඩමේ තාවකාලික නිවාස ඉදිකිරීමට පටන් ගෙන තිබූ අතර ප‍්‍රදේශය එළිපෙහෙළි කිරීමට ගිනි තබා තිබූ නිසා එය විශාල ප‍්‍රදේශයකට පැතිර යාමට හැකිව තිබුණි. මෙම සිද්ධිය සම්බන්ධයෙන් අදාල වැවිලි සමාගම විසින් 119 හදිසි ඇමතුම් අංකයට ද පැමිණිල්ලක් ඉදිරිපත් කර ඇත.

මෙම ගැටළුවට තවමත් විසඳුමක් නොමැතිකම හේතුවෙන් මාදම්පේ වැවිලි සමාගම මේ සම්බන්ධයෙන් මහාධිකරණයට පැමිණිල්ලක් ඉදිරිපත් කිරීමට දැන් සලකා බලමින් සිටී.

විශේෂයෙන්ම මෙම පුද්ගලයින්ගේ ලැජ්ජා සහගත හැසිරීම සහ වැරදි කිරීමට බය නොමැතිකම සැලකිල්ලට ගනිමින් මෙම නීති විරෝධී ක‍්‍රියාව දේශපාලනික බලපෑමක් මත සිදු වූවක් PA දැඩි ලෙස විශ්වාස කරයි. එතැන සිටි RPC නියෝජිතයින්ට සහ පොලීසියට ප‍්‍රදේශවාසීන් නොවන බව පෙනෙන මෙම පිටස්තර පුද්ගලයින් විසින් කරන ලද ප‍්‍රකාශයන්ට අනුව මෙම ඉඩම අත්පත් කර ගැනීමට ගත් තීරණය ප‍්‍රදේශයේ ප‍්‍රසිද්ධ පාර්ලිමේන්තු මන්ත‍්‍රීවරයෙකුගේ බලපෑම මත සිදු කර ඇති බව හෙළිව තිබේ.

මෙවැනි ලැජ්ජා සහගත අපරාධ ක‍්‍රියාකාරකම්වල ප‍්‍රතිඵලයක් ලෙස එයට වැරදි පූර්වාදර්ශයක් සහ බලපෑමක් සපයමින් වතුයායේ ඇතැම් කම්කරුවන් ද මෙම සිදුවීම අනුගමනය කරමින් වත්තේ ඉඩම් ආක‍්‍රමණය කළ ආකාරය දැකගත හැකි වූ අතර එම පුද්ගලයින්ට එරෙහිවද විනය සහ නීතිමය පියවර ගෙන තිබේ.

මේ සම්බන්ධයෙන් අදහස් දක්වමින් හපුගස්තැන්න වැවිලි සමාගමේ ප‍්‍රකාශකයෙකු පැවසුවේ ‘’මෙවැනි භයානක පූර්වාදර්ශයක් මින් මතුවට සිදු නොවීමට වැවිලි සමාගම්වල නීතියේ ආධිපත්‍යය තහවුරු කරන ලෙස අප රජයෙන් ඉල්ලා සිටිනවා. රජය සතු සරුසාර ඉඩම් ආරක්ෂා කර ගැනීමට කටයුතු කරන අතරම රටේ දේශපාලකයින්ගේ පෙළෙඹ වීමෙන් සිදු කරන මෙවැනි අපරාධ ක‍්‍රියා හේතුවෙන් RPCs මෙවැනි ප‍්‍රචණ්ඩකාරී අවදානම්වලට මුහුණ දී සිටීම ඉතාමත් කනගාටුදායකයි. RPCs රජය සතු මෙම වටිනා ඉඩකඩම්වල භාරකරුවන් පමණක් වන නමුත් දිගුකාලීන පදනම මත මෙම ඉඩම්වල වගා කිරීම සඳහා ලබා ගැනීමෙන් සැලකිය යුතු ආයෝජනයක් සිදු කර තිබෙනවා. නීතිය හා සාමය රකින බවට පොරොන්දු වී බලයට පත් වූ රජයක් ලෙස රාජ්‍ය දේපළ සොරකම් කිරීම වැළැක්වීමට වහාම නීතිමය පියවර ගන්නා ලෙස අප රජයෙන් ඉල්ලා සිටිනවා.’’ යනුවෙනි.

මෙම සිද්ධියෙන් වැවිලි සමාගමේ කටයුතුවලට දැඩි බාධා එල්ල වී තිබෙන අතර පෙර සැලසුම් කරගෙන තිබූ පරිදි ප‍්‍රදේශයේ වගා කටයුතු කරගෙන යාමට පාලනාධිකාරියට නොහැකි තත්වයක් මේ වනවිට උද්ගත වී තිබේ. මෙම සිද්ධිය මෑතකාලයේ සිදු වූ මෙවැනි ආකාරයේ ප‍්‍රධානතම සිදුවීම වුවද RPCs බොහෝ විට මෙවැනිම සිදුවීම්වලට මුහුණ දී තිබේ. මෙම වසරේ මුල් භාගයේදී RPC වතුවල සේවකයින්ට එරෙහිව ප‍්‍රචණ්ඩ ක‍්‍රියා කිහිපයක් සිදු විය.

මෙම ගැටළු විසඳීමට හා මෙවැනි සිදුවීම් නැවත සිදු නොවීමට කඩිනම් පියවර ගන්නා ලෙස PA සහ RPCs රජයෙන් සහ අදාල බලධාරීන්ගෙන් කාරුණිකව ඉල්ලා සිටිති.