ශ්‍රී ලංකාවේ අංක 1 ස්වාභාවික සෙවිලි සහ ෆ්ලෝ ටයිල් නිෂ්පාදකයා වන සැම්සන් රජරට ටයිල්ස් (පුද්ගලික) සමාගම පසුගියදා ලෙබනනය වෙත ෆ්ලෝ ටයිල් අපනයනය ආරම්භ කරමින් විදේශ වෙළෙඳපොල තුළ සිය නිෂ්පාදන අලෙවිය තව තවත් පුළුල් කිරීමට සමත් විය. එලෙස පසුගිය 15 වන දින ටෙරාකොටා ෆ්ලෝ ටයිල් බහාලුම් දෙකක් ලෙබනනය වෙත අපනයනය කරන ලදී.

මෙම අභියෝගාත්මක කාලපරිච්ඡේදය තුළ තමන් සතුව දැනට පවතින වෙළෙඳපොල තව දුරටත් පුළුල් කරමින් රටට ඩොලර් ගලා ඒම ඉහළ නැංවීමේ ආරම්භයක් ලෙස මෙම මෙහෙයුම සිදු කරන ලදී. සැම්සන් රජරට ටයිල්ස්හි විශාලතම විදෙස් පාරිභෝගිකයා ලෙස එක්සත් රාජධානිය හඳුන්වා දිය හැකිය. ඊට අමතරව ඉන්දියාව, ජර්මනිය, ඕස්ටේ්‍රලියාව එක්සත් අරාබි එමීර් රාජ්‍යය, මාලදිවයින සහ නවතම රට වන ලෙබනනය වෙත ඔවුන් සිය නිෂ්පාදන අපනයන සිදු කරනු ලබයි.

පොදුවේ DSI යන නාමයෙන් වඩාත් ප්‍රචලිත උපාය මාර්ගික ව්‍යාපාරික ඒකක 22ක් සමඟින් ක්ෂේත්‍ර 16ක් පුරා ව්‍යාපාර ක්‍රියාත්මක කර ඇති ශ්‍රී ලංකාවේ විශාලතම සමූහ ව්‍යාපාරයක් වන DSI සැම්සන් සමූහය පූර්ණ හිමිකාරීත්වය දරන අනුබද්ධ ආයතනයක් වන සැම්සන් රජරට ටයිල්ස්, සැම්සන් සමූහයේ ශක්තිය හා ප්‍රෞඩත්වය තුළින් ඉදිරියට ගමන් කරනු ලබයි.
සැම්සන් රජරට ටයිල්ස් විසින් සම්පූර්ණයෙන් දේශීය අමුද්‍රව්‍ය යොදා ගනිමින් අනුරාධපුර ඥානික්කුලම ප්‍රදේශයේ පිහිටුවා ඇති කර්මාන්තශාලාවේදී නිෂ්පාදනය කරනු ලබන ටෙරාකොටා ෆ්ලෝ ටයිල්ස් උණුසුම අවම කිරීමේ සුවිශේෂී හැකියාව හා ඒ වෙතින් සලසන ස්වාභාවික සිසිලස වැනි කරුණු හේතුවෙන් ඉමහත් ප්‍රසිද්ධියට පත්ව ඇත.