මෙරට ව්‍යාපාරික ක්ෂේත්‍රය වෙත නව වෙනසක් එක් කරමින් නැඟී සිටීමට වෙර දරන  ව්‍යවසායකයින් හඳුනාගෙන ඔවුන් බලගැන්වීමට කටයුතු කරන, ශක්තිමත් ශ්‍රී ලාංකේය මූලයන් සහිත ඇමරිකා එක්සත් ජනපදය කේන්ද්‍ර කර ගනිමින් ක්‍රියාත්මක වන සමාගමක් වන Ekva LLC විසින්, ශ්‍රී ලාංකේය ආරම්භක ව්‍යවසායකයින් වෙත විප්ලවීය නවෝත්පාදනයන් එළිදැක්වීමේ  හැකියාව ලබා දීමේ පළමු පියවර  නව ව්‍යවසායකයින් 15 දෙනෙකු වෙත පහසුකම් සලසමින් මාර්තු 22 වන දින  ආරම්භ කෙරිණි. මෙහි දී ජිත්මි නදුෂිකාගේ දූරියන් ගම්මාන සංකල්පය, තාරකා අදිකාරිගේ කුඩා පරිමාණ භාණ්ඩ අපනයන ව්‍යාපාරය සහ ජයිරාමාණන් විජයාලයන්ගේ  Smile Plus වැනි සුවිශේෂී ව්‍යාපාරික සංකල්ප රැසක්  Ekva ek’celerator වැඩසටහනේ දී ඉදිරිපත් විය.

දක්ෂ ව්‍යවසායකයින් ප්‍රවර්ධනය කිරීමේ සහ සවි බල ගැන්වීමේ අරමුණින් 2022 වසරේ දී පිහිටුවන ලද ek'celerator අරමුදල ඕනෑ ම ව්‍යාපාරික අදහසක්, සංස්ථාපිත හෝ සංස්ථාපිත නොවන අරම්භක මට්ටමේ ව්‍යාපාරයක්, සාර්ථකත්වය ඔප්පු කළ හැකි ව්‍යාපාරික සංකල්පයක් (PoC) හෝ අවම ශක්‍ය නිෂ්පාදනයක් (MVP) හිමි ඕනෑ ම ව්‍යවසායකයෙකු වෙත සහයෝගය ලබා දෙයි.

මෙම උත්සවයේ ප්‍රධාන ආරාධිතයා ලෙස සහභාගි වූ  ඇමරිකානු තානාපතිනිය වන ජුලී චුන්ග් මහත්මිය පැවසුවේ, "ශ්‍රී ලංකාව ගැන කතා කරන විට පසුගිය කාලයේ ප්‍රධාන මාතෘකාවක් වූයේ ආර්ථික අර්බුදයයි. නමුත් දැන් ශ්‍රී ලංකාව තුළ නිර්මාණය වන නව අවස්ථා ගැන කතා කිරීමට කාලය එළඹිලා තිබෙනවා. මම මෙවැනි ව්‍යාපෘතිවලට වැඩි කැමැත්තක් දක්වනවා. ඇමරිකා එක්සත් ජනපදයට නවෝත්පාදන පිළිබඳ සාඩම්බර සම්ප්‍රදායක් තිබෙන බව සිහිපත් කළ යුතුමයි.  ශ්‍රී ලංකාවේ මා ගත කළ වසරකට වැඩි කාලය තුළ, ආර්ථික අර්බුදය මධ්‍යයේ පවා මෙහි නවෝත්පාදනවල පිබිදීම මා දුටුවා. එය මගේ උපන් ප්‍රාන්තය වන කැලිෆෝනියාවේ හෝ ඇමරිකා එක්සත් ජනපදයේ ජීවත් වෙනවා වැනි හැඟීමක් මට ලබා දෙනවා." යනුවෙනි.

වත්මන් අභියෝග මධ්‍යයේ වුව ද බොහෝ දෙනා ශ්‍රී ලංකාවේ රැඳී සිටිමින් තම මව් රට ගොඩනැගීමට සහයෝගය දැක්වීම ප්‍රශංසනීය බව ඇය පැවසුවාය.  “ ඔවුන් කිසිවෙක් අභියෝග මධ්‍යයේ තම සිහිනය අත්හැරියේ නැහැ. මෙම ආත්ම විශ්වාසයට සහ සුබවාදී ආකල්පයන්ට සහයෝගය ලබා දීම පිළිබඳව  මම Ekva ආයතනයට කෘතඥ වෙනවා.  අමිත් මහතා සමඟ කතා කරන විට අපගේ අදහස් සහ ආකල්ප සමාන බව දැනුණා. පොඩි කාලෙ ම ඇමරිකාවට ගොස් කැලිෆෝනියාවේ හැදී වැඩුණු අප දෙදෙනා ම Hip - Hop රසිකයෝ.  අමිත් සහ ඔහුගේ දක්ෂ කණ්ඩායම ක්‍රියාත්මක කරන මෙම වැඩසටහන්වලින් ඔවුන් ව්‍යවසායකත්වය හා නවෝත්පාදන කෙරෙහි දක්වන සැලකිල්ල සහ ඒ සඳහා ලබා දෙන වටිනාකම පිළිබිඹු වෙනවා." යනුවෙන් චුන්ග් මහත්මිය වැඩිදුරටත් පැවසුවාය.

ඔනෙලි පලිපනේ, නුවරඑළිය ප්‍රදේශයේ SAHAETA (South Asian High Altitude Equine Training Academy) නමින් අශ්ව පුහුණු හා පුනරුත්ථාපන ආයතනයක් පවත්වාගෙන යන අතර, ඇය Ekva ek’celerator වැඩසටහනේ සහයෝගය ලැබූ  බව එහි දී පැවසුවාය.

දූරියන් අපනයන සඳහා පූර්ණ සැපයුම් දාමයක් නිර්මාණය කිරීමට අරමුණු කරන ජිත්මි නදුෂිකා මහත්මිය, එම වැඩසටහන ක්‍ර්මවත් හා කාර්‍යක්ෂම කිරීම වෙනුවෙන් යෝජනා කළ 'දූරියන් ගම්මානය' පිළිබඳ සංකල්පය ඉදිරිපත් කළ අතර, Ekva  ek'celerator වැඩසටහනේ විනිශ්චය මණ්ඩලය ලබා දුන්  සහයෝගය සහ කාන්තා ව්‍යවසායිකාවක් ලෙස ඇය ලැබූ සුවිශේෂී අභිප්‍රේරණය පිළිබඳව අදහස් දැක්වුවාය.

Codio නමින් මාර්ගගත (Online) කේත ඉගෙනුම් ක්‍රමවේදයක් ඉදිරිපත් කර ඇති ප්‍රනවන් ජගදීස්වරන් කියා සිටියේ Ekva ek’celerator වැඩසටහන නිසා තමාට සමාන අදහස් ඇති ව්‍යවසායකයින් හමුවීමට හැකියාව ලැබුණු බවයි. එමෙන් ම මාස 4 ක අර්ධකාලීන වැඩසටහන ඔහු වැනි නව ව්‍යවසායකයින් දිරි ගන්වන බව ද ජගදීස්වරන් පැවසුවේය.

“අපි එක්ව ශ්‍රී ලංකාවට නැවතත් ගෝලීය ගෞරවය සහ පිළිගැනීම ලබා දීම වෙනුවෙන් නව ව්‍යවසායකයින් දිරිමත් කිරීමට කටයුතු කරනවා. එමගින් ශ්‍රී ලංකාව නැවතත් පෙර මෙන් ගොඩනැංවීමට දායක වීම අපගේ අරමුණයි. " Ekva ප්‍රධාන විධායක නිලධාරී අමිත් බොතේජු මහතා පැවසුවේ ය.  ඉදිරි දශකය තුළ සිය සමාගම් කළඹ සමඟ යුනිකෝන් සමාජයට සම්බන්ධ වීම සමාගමේ දිගුකාලීන අරමුණ වන බවත්, ආරම්භක ව්‍යවසායකයින්ගේ  මූල්‍ය සාක්ෂරතාව, කළමනාකරණය, සබඳතා ගොඩනැගීම, භාෂා හැකියාව, ඉදිරිපත් කිරීමේ කුසලතා, වෙළෙඳපොළ වෙත ප්‍රවිශ්ඨ වීමේ උපාය මාර්ග, අර්බුද කළමනාකරණය සහ අරමුදල් ඒකරාශීකරණය  වැනි කුසලතා වැඩිදියුණු කිරීම වෙනුවෙන් විශේෂ අධ්‍යාපනික වැඩසටහන් දියත් කිරීමට  Ek'celerator අරමුණු කරන බවත් වැඩිදුරටත් අදහස් දක්වමින් ඒ මහතා ප්‍රකාශ කළේ ය.