HUTCH සමාගම, Evoke Digital Australia ආයතනය සමඟ අත්වැල් බැඳගනිමින් ශ්‍රී ලාංකේය සිනමා රසිකයින් බොහෝ සේ කැමැත්තක් දක්වන දේශීය සිනමා නිර්මාණ ඇතුළු තවත් අත්දැකීම් රැසක් එකම වේදිකාවක් හරහා ලබා දීමේ අරමුණින්, ‘රූප හල’ දියත් කර ඇත. ඕනෑම තැනක සිට ඉහළම ගුණාත්මකභාවයෙන් යුත් දේශීය නිර්මාණ නැරඹීමට මෙහිදී අවස්ථාව හිමි වේ. සිංහල චිත්‍රපට, ටෙලි නාට්‍ය සහ ප්‍රමුඛ පෙළේ නිර්මාණ රැසක් අන්තර්ගත මෙම යෙදුම තුළින් ප්‍රේක්ෂකයන්ට බාධාවකින් තොර සුවිශේෂී අත්දැකීමක් ලබාදීමට සැලසුම් කර ඇත. මෙම සේවාව මෙරට තුළ පමණක් නොව ගෝලීය වශයෙන් ද විවෘත බැවින් ලොව පුරා වෙසෙන රසිකයින්ට ශ්‍රී ලාංකේය සහ කලාපීය නිර්මාණ පහසුවෙන් නැරඹීමේ හැකියාව පවතී.

'රූප හල' තුළ පැය 1000කට අධික විවිධාංගීකරණය වූ සිනමා අන්තර්ගතයන් ඇතුළත් වන අතර සිංහල චිත්‍රපට 500කට අධික ප්‍රමාණයක් ද, සම්භාව්‍ය සිනමා නිර්මාණ, නව සිනමා නිර්මාණ, ටෙලි නාට්‍ය මෙන්ම වෙබ් කතා මාලාවන් සහ විශේෂිත චිත්‍රපට ප්‍රදර්ශනයන් රැසක් දේශීය හා විදේශීය ප්‍රේක්ෂකයින් උදෙසාම මෙහි ඇතුළත් කර ඇත.

ශ්‍රී ලාංකේය අනන්‍යතාවය සහ ප්‍රේක්ෂක කැමැත්ත කෙරෙහි විශේෂ අවධානයක් යොමු කරමින් මෙම  වේදිකාව නිර්මාණය කර ඇත. දේශීය සිනමාව හරහා සිය සංස්කෘතික බැඳීම පවත්වා ගැනීමට අපේක්ෂා කරන මෙරට ජීවත්වන මෙන්ම විදේශගත ශ්‍රී ලාංකිකයින් ද  මෙමඟින් ඉලක්ක කර ගනී. නත්තල් සමයේ සිට ක්‍රියාත්මක වන පරිදි, මෙරට වෙසෙන හෝ විදේශ ගතව සිටින ඕනෑම HUTCH පාරිභෝගිකයෙකුට App Store හෝ Google Play හරහා 'රූප හල' ජංගම යෙදුම බාගත කිරීමෙන් හෝ https://roopahala.com.au/ වෙබ් අඩවියට පිවිසීමෙන් මෙම සේවාව ලබා ගැනීමට හැකියාව ලැබෙනු ඇත. එමෙන්ම සියලුම Smart TV සඳහාම වෙන්වූ Roopa Hala Smart TV App එක මගින් ඉතා පහසුවෙන් රූපවාහිනිය ඔස්සේ ද මෙම නිර්මාණ නැරඹීමට හැකියාව පවතී.

Evoke Digital Australia ආයතනය සමඟ එක්ව HUTCH සමාගම දියත් කළ මෙම ව්‍යාපෘතිය, ඩිජිටල් සේවාවන් ඔස්සේ ශ්‍රී ලාංකික ප්‍රජාවගේ ජීවන තත්ත්වය ඉහළ නැංවීමට HUTCH සමාගම ගෙන යන අඛණ්ඩ ගමනේ තවත් එක් සුවිශේෂී සන්ධිස්ථානයකි.