ඉදිකිරීම් ක්ෂේත්‍රයේ අභියෝග මධ්‍යයේ Capitol TwinPeaks‍ ඉදිරියටම

March, 4, 2021

ශ්‍රී ලංකා දේපළ වෙළෙඳාම් කර්මාන්තය තුළ මතුව ඇති අභියෝග මධ්‍යයේ වුව ද, සන්කෙන් සමූහය යටතේ ඉදිවෙමින් පවතින මහල් 50කින් යුත් ද්විත්ව කුළුණු මිශ්‍ර නේවාසික සංවර්ධන ව්‍යාපෘතිය වන Capitol TwinPeaks‍, 2021 වසරේදී නිම කිරීමට නියමිත ය.

අත්‍යවශ්‍ය නොවන භාණ්ඩ ආනයනය සඳහා වර්තමානයේදී පණවා ඇති ආනයන සීමා 2021 වසරේදී යම් දුරකට ලිහිල් වනු ඇති බවට ලංකා වාණිජ මණ්ඩලයේ- ආනයන අංශයේ සභාපති ඩිලානෝ ඩයස් මහතා ප්‍රකාශ කර තිබුණ ද එම බාධාවන් එලෙසම පවතින බව පෙනී ගොස් තිබේ. මේ තත්ත්වය මත ශ්‍රී ලංකාවේ දැවැන්ත දේපළ සංවර්ධන ව්‍යාපෘති බොහෝමයක්, තම ඉදිකිරීම් සඳහා අවශ්‍ය අමුද්‍රව්‍ය හිඟතාව හේතුවෙන් විශාල අර්බුදයකට මුහුණ දී සිටියි.

කෙසේ වුවද මෙම අභියෝගය සාර්ථකව ජයගැනීමට Capitol TwinPeaks ව්‍යාපෘතිය සමත්ව තිබේ. සන්කෙන් සමූහය යනු ජපානයේ මිට්සුයි සමූහයේ ව්‍යාපාර ආභාෂය මත පෝෂණය වූ සමාගම් සමූහයකි. එබැවින් මිට්සුයි ව්‍යාපාර පරිසරය තුළින් උකහාගත් ඉදිකිරීම් මෙහෙයුම්වල දූරදර්ශීභාවය හා කාල කළමනාකරණයේ ප්‍රශස්තභාවය හේතුවෙන් මෙම ව්‍යාපෘතියේ ඉදිකිරීම් කටයුතු ආරම්භයේ පටන්ම ක්‍රමෝපායිකව සැලසුම් කෙරුණි. විශේෂයෙන්ම රට පුරා ක්‍රියාත්මක වූ පළමු ලොක් ඩවුන් කාලසීමාවට පෙර Capitol TwinPeaks හි ඉදිකිරීම් කටයුතුවලින් සැළකිය යුතු ප්‍රමාණයක් නියමිත කාලයට ද ප්‍රථම නිමකිරීමට හැකි විය. තව ද අවශ්‍ය වන මොහොතට පෙර අමුද්‍රව්‍ය කල්තබා ඇණවුම් කිරීමට සන්කෙන් සමූහය පියවර ගෙන තිබීමත් Capitol TwinPeaks ව්‍යාපෘතිය සාර්ථකව සිදුකරගෙන යාමට හේතුවී තිබේ.

“කලට වේලාවට ඉදිකිරීම් සිදුකිරීමත්, ජාත්‍යන්තර මට්ටමේ උසස් ඉදිකිරීම් ප්‍රමිතියක් පවත්වාගැනීමත් සම්බන්ධයෙන් සන්කෙන් නාමය ඉතාමත් ප්‍රසිද්ධයි. අපගේ අනාගතවාදී ක්‍රමෝපායික චින්තනයත්, විධිමත් සැලසුම්කරණයත් නිසා  Capitol TwinPeaks ව්‍යාපෘතිය ඉදිරියටම ගමන් කරනවා. 2021 ජුනි මස අවසානයේදී මෙම ව්‍යාපෘතියේ නිවාස ඒකක හිමිකරුවන්ට ලබාදීමට අපි බලාපොරොත්තු වෙනවා“, යනුවෙන් කැපිටල් ඩිවලොපර්ස් හි අනුබද්ධ ආයතනයක් වන කැපිටල් ටවර්ස්හි කළමනාකාර අධ්‍යක්ෂ රෝහණ වන්නිගම මහතා ප්‍රකාශ කළේය.

මෙම ව්‍යාපෘතියේ ඉදිකිරීම් (සන්කෙන් කන්ස්ට්‍රක්ෂන්) සහ සංවර්ධනය (කැපිටල් ඩිවලොපර්ස්) යන අංශ දෙකම ශ්‍රී ලංකාවේ ඉදිකිරීම් අංශයේ දැවැන්තයෙකු වන සන්කෙන් සමූහය යටතේ සිදුවන අතර, එහි ගෘහ නිර්මාණ ශිල්පීය දායකත්වය හිමිවන්නේ සිංගප්පූරුවේ P&T සමාගමෙනි. මෙම සුසංයෝගයෙන් නිමවන Capitol TwinPeaks සංකීර්ණය කොළඹ සුවිසල් ගොඩනැඟිලි අතර වඩාත් සුවිශේෂී ඉදිකිරීමක් වනු නිසැක ය.

“මෙම ව්‍යාපෘතිය හරහා ජාත්‍යන්තර මට්ටමේ අධි සුඛෝපභෝගී ජීවන රටාවක් කොළඹ 2 ප්‍රදේශයේදී අත්විඳීමේ හැකියාව උදා වෙනවා. අසීරු කාලපරිච්ඡේදයකදී වුණත්, මෙහි ඉදිකිරීම් සඳහා ගතවන කාලයත්, ආයෝජන ප්‍රතිලාභ ලබාගැනීමට එය බලපාන ආකාරයත් පිළිබඳව අපි ඉතාමත් සංවේදීයි. එම අවශ්‍යතාව වෙනුවෙන් අපි ඉතිරි ඉදිකිරීම් කටයුතුත් වේගවත්ව සිදුකිරීමට අපේක්ෂා කරනවා“, යැයි වන්නිගම මහතා වැඩිදුරටත් පැවසීය.

වර්ග අඩි 40,000ක් පුරා පැතිරුණු විවිධ පහසුකම් සහ සේවාවන් හිමිකරදෙන මෙම ව්‍යාපෘතිය සන්කෙන් සමූහය දේපළ සංවර්ධන ක්ෂේත්‍රය තුළ ලද විශිෂ්ටත්වය සෑම අයුරකින්ම අන්තර්ගත කළ සුපිරි නිමැවුමකි. ජාත්‍යන්තර මට්ටමේ ගෘහ නිර්මාණ ශිල්පීය සමාගමක දායකත්වයෙන් ඉහළට නැඟෙන Capitol TwinPeaks, සන්කෙන් සමූහයේ ඉදිකිරීම්, නිර්මාණ පර්යේෂණ හා විශේෂඥතාවයේ ඵලයක් ලෙස ද හැඳින්විය හැක. මෙම සුපිරි නිවාස සංකීර්ණය සතු විශේෂ නිෂ්පාදන සමූහය හා මිල ගණන් දෙස බැලීමේදී ඉහළ නිවාස කුලී ආදායමක් මෙන්ම ප්‍රාග්ධන ඉපැයුමක්  ද ලබාගැනීමේ අවස්ථාව ආයෝජකයින්ට විවෘත වී තිබේ.

 

සේයා රූ - කැපිටල් ඩිවලොපර්ස් හි අනුබද්ධ ආයතනයක් වන කැපිටල් ටවර්ස්හි කළමනාකාර අධ්‍යක්ෂ රෝහණ වන්නිගම මහතා