කොමර්ෂල් බැංකුවේ දිරිශක්ති තිරසාර ව්‍යවසායකත්ව සංවර්ධන වැඩසටහනේ නවතම ප‍්‍රතිලාභීන් වූ කලවාන ප‍්‍රදේශයේ කුඩා තේ වතු හිමියන් සහ තේ වගාකරුවන් සඳහා බැංකුව විසින් තේ පර්යේෂණ ආයතනය (TRI) සහ කුඩා තේ වතු සංවර්ධන අධිකාරිය (TSHDA) සමඟ එක්ව සම්මන්ත‍්‍රණයක් පවත්වන ලදී. රුක් රෝපණ කටයුත්තකින් ආරම්භ වූ කලවාන රඹුක විහාරස්ථානයේ පැවති මෙම අවස්ථාවට 100කට අධික පිරිසක් සහභාගි විය.

පාංශු පුනරුත්ථාපනය සහ නැවත වගා කිරීම, තේ වගාවේ යන්ත‍්‍රසූත‍්‍ර භාවිතය සහ ආසියානු සංවර්ධන බැංකුව සමඟ බැංකුව විසින් කුඩා තේ වතු හිමියන් සඳහා ක‍්‍රියාත්මක කරන ණය යෝජනා ක‍්‍රමය වැනි විෂයන් මෙහිදී ඉදිරිපත් කරන ලදී. සහභාගිවන්නන් TRI සහ TSHDA හි නිලධාරීන් විසින් පවත්වන ලද තාක්ෂණික හා නිපුණතා සංවර්ධන සැසියකට ද සහභාගි විය. TRI විසින් පවත්වනු ලබන ජංගම බෝග සායනයක් මගින් තේ වගා කරුවන්ට පසෙහි PH සහ EC පරීක්ෂාව, පාංශු කාබන් සහ පෝෂක පරීක්ෂාව, පළිබෝධ හඳුනාගැනීම, මූල පිෂ්ට පරීක්ෂාව සහ නෙමටෝඩා පරීක්ෂාව සඳහා පස සහ පත‍්‍ර සාම්පල එකතු කිරීම වැනි සේවාවන් ලබා දෙන ලදි. කොමර්ෂල් බැංකුවේ ප‍්‍රකාශකයෙකු සඳහන් කළේ ඌව සබරගමුව කලාපය ඇතුළු කඳුකරයේ තේ වගා කරන ප‍්‍රජාවන්ගේ ප‍්‍රයෝජනය සඳහා මෙවැනි වැඩසටහන් අඛණ්ඩව ක‍්‍රියාත්මක කිරීමට අදහස් කරන බවයි.

වැඩසටහනේ ප‍්‍රධාන සංවිධායකවරුන් සහ ඊට සහභාගී වූ නිලධාරීන් වූයේ බැංකුවේ ඌව සබරගමුව ප‍්‍රාදේශීය කළමණාකරු චමින්ද කළුගමගේ මහතා සහ කලවාන ශාඛාවේ කළමණාකරු වජිර රත්නායක මහතාය.

TSHDA හි රත්නපුර සහකාර ප‍්‍රාදේශීය කළමණාකරු නන්දන විජේසිංහ මහතා, කලාප තේ සංවර්ධන නිලධාරී සිසිර පෙරේරා මහතා, TRI හි ජ්‍යෙෂ්ඨ උපදේශක ජනක මහින්දපාල මහතා සහ TRI හි ජ්‍යෙෂ්ඨ පර්යේෂණ නිලධාරී ආචාර්ය සම්පත් පතිරණගේ මහත්වරුන් විසින් තාක්ෂණික දැනුම ලබා දෙන ලදි. මෙම වැඩසටහන සඳහා බැංකුවේ රත්නපුර කෘෂිකර්ම සහ ක්‍ෂුද්‍ර මූල්‍ය ඒකකයේ සම්බන්ධීකාරක බුද්ධික මදුරප්පෙරුම මහතා සහයෝගය දැක්වීය.

සේයාරුවෙන් දැක්වෙන්නේ මෙම වැඩසටහනේ විශේෂ අවස්ථා කිහිපයකි.