ශ‍්‍රී ලංකාවේ විශාලතම පුද්ගලික වාණිජ බැංකුව වන කොමර්ෂල් බැංකුවේ කොටස් හිමිකාරීත්ව ලැයිස්තුවේ 14 වැනියා ලෙසින් මෙරට ප්‍රකෝටිපති ව්‍යාපාරික ධම්මික පෙරේරා මහතාගේ නම සඳහන් වේ. 2021 ජූනි 30 න් අවසන් කාර්තුවට අදාළ මූල්‍ය ප්‍රතිඵල ප්‍රකාශයට පත්කිරීමත් සමඟ මේ බව අනාවරණය වී තිබේ.

2021 මාර්තු 31 කාර්තුව අවසානයේ දී නිකුත් වූ මූල්‍ය ප්‍රකාශනයට අනුව කොටස්කරුවන්ගේ ලැයිස්තුවෙහි ධම්මික පෙරේරා මහතාගේ නම සඳහන්ව නොතිබුණු අතර මේ අනුව පසුගිය කාර්තුව තුළ දී නව කොටස් මිල දී ගැනීම් හරහා ඔහු කොමර්ෂල් බැංකුවේ ප්‍රමුඛ ‌කොටස්හිමියන්ගේ ලැයිස්තුවට පැමිණ ඇත.

කොමර්ෂල් බැංකුවේ ඡන්ද බලයහිමි සාමාන්‍ය කොටස් ප්‍රාග්ධනයෙන් 1.45% ක් හෙවත් කොටස් මිලියන 16.29 (16,293,896) ක් ධම්මික පෙරේරා ගේ නමට ඉදිරියෙන් සටහන්ව තිබේ.

කොමර්ෂල් බැංකුවේ කොටස් හිමියන්ගේ ලැයිස්තුවේ පළමු ස්ථානයේ සිටින්නේ DFCC  බැංකුවයි. ඒ ‌සමස්ත කොටස් ප්‍රාග්ධනයෙන් 12.02%කට හිමිකම් කියමිනි. දෙවන ස්ථානයේ ඉන්ද්‍රා ට්‍රේඩර්ස් අධිපති ඉන්ද්‍රා සිල්වා මහතාගේ නම සඳහන් වන්නේ 9.88% ක කොටස් හිමිකාරීත්වයක් සහිතවය. කොමර්ෂල් බැංකුවේ තෙවැනියට විශාලතම කොටස් හිමියා වන්නේ 8.62% ක කොටස් හිමිකමක් දරණ සේවක අර්ථසාධක අරමුදලයි.

මෙම සම්පූර්ණ ලැයිස්තුව පහතින් දැක්වේ.

මේ අනුව ධම්මික පෙරේරා මහතා මෙරට සෘජු කොටස් හිමිකාරීත්වයකට හිමිකම් කියනු ලබන 4 වැනි වාණිජ බැංකුව බවට කොමර්ෂල් බැංකුව පත් වනු ඇත.

සම්පත් බැංකුවේ කොටස් ප්‍රාග්ධනයෙන් 14.95% කට හිමිකම් කියනු ලබන වැලිබල් වන් පීඒලසී හි සභාපති/ කළමනාකාර අධ්‍යක්ෂවරයා වන ධම්මික පෙරේරා මහතා වැලිබල් වන් හි 66.53% ක කොටස් හිමිකාරීත්වයක් දරනු ලබයි. ඒසේම පෑන්ඒෂියා බැංකුවේ 29.99% ක කොටස් හිමිකමක් සමඟින් ඒහි අංක 1 කොටස් හිමියා වන්නේ ද ධම්මික පෙරේරා යි. තවද සෙලාන් බැංකුවේ ‌කොටස් ප්‍රාග්ධනයෙන් 9.49%කට සෘජුව හිමිකම් කියන ධම්මික පෙරේරා ඒම ලැයිස්තුවේ 4 වන ස්ථානයේ සිටී.