සුඛෝපභෝගී මිල අධික වාහන ලංකාවට ගෙන්වන සුමල් පෙරේරා අයවැය ගැන මෙසේ කියයි

November, 20, 2020

ආර්ථිකයේ යහපත උදෙසා ඇතැම් ව්‍යාපාර සමබන්ධයෙන් තෝරා ගැනීමක් සිදුකළ යුතු තැනකට පැමිණ ඇති බවත්, වසර 5ක් පුරාවට වරින් වර වෙනස් නොවන ප්‍රතිපත්තියක් පවත්වාගෙන යාම ව්‍යාපාරිකයෙකු ලෙස තමන් හට ප්‍රමාණවත් බවත් ඇක්සෙස් ඉංජිනියරින් පීඑල්සී හි සභාපති සුමල් පෙරේරා මහතා පවසයි. අද (20) පෙරවරුවේ කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේ පැවති අයවැය සම්මන්ත්‍රණයකට එක්වෙමින් ඒ මහතා මේ බව අවධාරණය කළේය.

මෙහිදී අදහස් දැක්වූ ඇක්සෙස් ඉංජිනියරින් පීඑල්සී හි සභාපති සුමල් පෙරේරා මහතා,

“මම අද මෙතනට පැමිණියේ බොහොම ධනාත්මක මුහුණුවරකින්. පෞද්ගලික අංශයට මෙම අයවැයෙන් ලැබී ඇති දෑ ගැන සාර්ව ලෙස සලකා බැලුවොත් පැහැදිලිවම එය අපේ අනාගතයයි. අපේ පැත්තෙන් බැලුවොතින් වසරින් වසර, අයවැයෙන් අයවැයට, මුදල් ඇමතිගෙන් මුදල් ඇමතිට වෙනස්වන ප්‍රතිපත්ති සහිත අයවැයක් වෙනුවට වසර 5ක් පුරාවට ප්‍රතිපත්තිවල වෙනසක් සිදුනොවන බවට මෙවර අපිට යම්කිසි සහතිකයක් ලබා දී තිබෙනවා. මගේ පැත්තෙන් එය හොඳටම ප්‍රමාණවත්. ඉතිරි දේවල් පුද්ගලික අංශය කළමානකරණය කර ගනීවි.“

“මම අද මෙතනට එන්න පෙර මගේ ව්‍යාපාර ඒකක ප්‍රධානියෙක් ඇහුවා ඇයි ඔබ මෝටර් රථ ආනයනය ගැන කතා නොකරන්නේ කියලා. ජගුවාර් - ලෑන්ඩ් රෝවර් සහ ඉසූසු මෙරට නියෝජිතයා අපි. මම කිව්වා රුපියල ගැන. 250ට ගියොත් මම මොනවද කියන්නේ කියලා. යම් යම් කර්මාන්ත අංශ අත්විඳින පුද්ගලික වේදනාව මට තේරෙනවා. නමුත් එය ආර්ථිකයේ යහපත සම්බන්ධයෙන් සිදුකළ යුතු තෝරාගැනීමක්. පසුගිය අවුරුදු 15 - 20 පුරාවට අපේ විදේශ සංචිත පහළ යමින් තිබෙන රටක අපි ජීවත් වෙන්නේ. දැන් අපි අමාරු තැනකට ඇවිල්ලා තිබෙනවා. ආර්ථිකය නැවත යථා තත්ත්වය ගන්න අමාරු තීරණ අපට ගන්න සිදුවෙලා.“

“මම සුභපතන්න කැමති නිවාඩ් කබ්රාල් මහත්මයාට. ඔහු මම වගේම ගණකාධිකාරීවරයෙක්. නමුත් මේ අයවැය පදනම් වෙලා තියෙන්නේ ආර්ථික ප්‍රතිපත්ති මත. ගණකාධිකරණ ප්‍රතිපත්ති මත නොවෙයි. ජාතික අයවැයක් ආර්ථික ප්‍රතිපත්ති මත පදනම් විය යුතු මෙන්ම එහි සංගතභාවයක් තිබිය යුතුයි.“

“අපි හැමෝටම වෙනස් මත තිබෙන්න පුළුවන්. මම කියන්නේ ව්‍යාපාර කිරීම පුද්ගලික අංශය විසින් සිදුකරන්න ඕනේ. රජය සහ අමාත්‍යාංශ ඊට සහාය දිය යුතුයි පුද්ගලික අංශයට ව්‍යාපාර කරන්න. නමුත් රජය ව්‍යාපාර කරන්න ගියොත් සමහරක් ව්‍යාපාර අංශවලට බලපෑමක් ඇති වෙන්න පුළුවන්.“