පසුගිය දින කිහිපය තුළ එක්සත් ජනපද ඩොලරයක් වෙනුවෙන් වූ රුපියල් අගයෙහි ඉහළ යාමක් වාර්තා වූයේ භාණ්ඩ ආනයනය සඳහා විදේශ විනිමය සම්බන්ධයෙන් විශාල ඉල්ලුමක් පැවතීම බව ශ්‍රී ලංකා මහ බැංකුව පවසයි.

අද (19) පැවති මාධ්‍ය හමුවක දී මේ සම්බන්ධයෙන් අදහස් දක්වමින් ශ්‍රී ලංකා මහ බැංකුවේ නියෝජ්‍ය අධිපති ධම්මික නානායක්කාර මහතා කියා සිටියේ, මේ සම්බන්ධයෙන් බැංකු සමඟ කටයුතු කරමින් සිටින බවත්, ඉදිරියේ දී මෙසේ ඇති වී තිබෙන පීඩනය යම් මට්ටමකින් සමනය වනු ඇතැයි බලාපොරොත්තු වන බවත්ය.

“ශ්‍රී ලංකා මහ බැංකුව මේ සම්බන්ධයෙන් පියවර කිහිපයක් ගැනීමට බලාපොරොත්තු වෙනවා. දැනටමත් බැංකු සමඟ ඒ සම්බන්ධයෙන් අදහස් හුවමාරු කර ගනිමින් සිටිනවා. විශේෂයෙන් අපි දැක්කා පසුගිය දින කිහිපය තුළ රට තුළට ආනයනය කරන භාණ්ඩ සඳහා විදේශ විනිමය සම්බන්ධයෙන් විශාල ඉල්ලුමක් පැවතුණා. ඒ භාණ්ඩ ආනයනය සඳහා වූ විදේශ විනිමය අවශ්‍යතාවය මත තමයි බොහෝ විට විනිමය සම්බන්ධයෙන් පීඩනයක් ඇති වී තිබුණේ. ප්‍රේෂණ හරහා රටට එන මුදල් ප්‍රමාණයේ යම් වැඩිවීමක් සිදුව තිබෙනවා. නමුත් එදිනෙදා රට තුළට ගලා එන ප්‍රවාහයට වඩා ආනයන සම්බන්ධයෙන් ඇතිවන ඉල්ලුමේ ඉහළ යාමක් නිසා තමයි මේ ආකාරයේ පීඩනයක් අපි දැක්කේ. මෙය යම්කිසි තාවකාලික තත්ත්වයක් කියලා අපි හිතනවා. ඊට අමතරව රජයට යම්කිසි විශාල ප්‍රමාණයේ මුදල් ප්‍රවාහයන් ලබා ගැනීමට ඇති තත්ත්වය සැලකිල්ලට ගන්නා විට මේ තිබෙන පීඩනය යම් මට්ටමකින් සමනය වනු ඇතැයි අපි බලාපොරොත්තු වෙනවා.“

ශ්‍රී ලංකා මහ බැංකුවේ දෛනික විනිමය අනුපාතික සටහනට අනුව අද (19) දිනයේ දී එක්සත් ජනපද ඩොලරයක ගැණුම් මිල රු. 190.89 ක් හා විකුණුම් මිල රු. 196.05 ක් ලෙසින් සටහන් විය.