ජෝන් කීල්ස් සමාගම ඇතුළු පාර්ශවයන් තුනක් සතුවූ කොටස් මිලදී ගනිමින් ආසිරි හොස්පිට්ල්ස් හොල්ඩින්ග්ස් සමාගම විසින් සෙන්ට්‍රල් හොස්පිට්ල්ස් සමාගමේ තමන් සතුවූ කොටස් ප්‍රමාණය සියයට 18.26 ක සිට සියයට 55.6 ක් දක්වා වැඩිකර ගනී.

මේ අනුව, ආසිරි විසින් සෙන්ට්‍රල් හොස්පිට්ල්ස් හි, ජෝන් කීල්ස් සමාගම සතුවූ සියයට 24.06 ක කොටස් මිලදීගෙන තිබෙන්නේ රුපියල් බිලියන 1.59 ක මුදලකටයි.

මෙම අලෙවිය මගින් ජෝන් කීල්ස් සමූහය විසින් රුපියල් මිලියන 662 ක ප්‍රාග්ධන ලාභයක් උපයාගෙන තිබේ.

මීට අමතරව, යුනියන් ඇෂුවරන්ස් සමාගම සියයට 2.73 ක කොටස් විකුණා තිබෙන අතර Aureos South Asia අරමුදල විසින් සියයට 10 ක කොටස් ආසිරි වෙත විකුණා ඇත.

මෙම ගනුදෙනුවේ සමස්ත වටිනාකම රුපියල් බිලියන 2.4 ක් වන අතර ආසිරි හොස්පිට්ල්ස් හෝල්ඩින්ග්ස් අයත් වන්නේ සොෆ්ට්ලොජික් සමූහයටයි.