කොළඹ කොටස් වෙළෙඳපොළ සියලු කොටස් මිල දර්ශකය අද දිනයේ දී ඒකක 75.48 ක ඉහළ යාමක් වාර්තා කළේය. පෙරේදා (18) දිනයේ දී ඉතිහාසයේ ඉහළම අගයය (7,922.66) ට සියලු කොටස් මිල දර්ශකය පැමිණීමෙන් පසු ඊයේ (19) දිනයේ දී ඒකක 113.69 කින් සියලු කොටස් මිල දර්ශකය පහළ ගියේය.

මේ අතර අද දිනයේ ගනුදෙනු ආරම්භ වී කෙටි කාලයක් තුළ දී ඒකක 7,676.73 ක් දක්වා සියලු කොටස් මිල දර්ශකය පහළ ගිය ද දිනය අවසානයේ දී එය ඒකක 7,884.45 ක් ලෙසින් වාර්තා වීම විශේෂත්වයකි.

පසුගිය දින කිහිපය තුළ දී සීඝ්‍ර මිල වර්ධනයක් වාර්තා කළ LOLC, බ්‍රවුන්ස් ඉන්වෙස්ට්මන්ට්ස් හා කොමර්ෂල් ලීසිං සහ විශාලතම ලැයිස්තුගත සමාගම වන ජෝන් කීල්ස් හෝල්ඩිංග්ස් යන සමාගම්වල කොටස් මිල ගණන් පහළ යාම සියලු කොටස් මිල දර්ශකයට සෘණාත්මක දායකත්වයක් ලබා දුන්නද හේලීස්, වැලිබල් වන්, LB ෆිනෑන්ස් හා එක්ස්පෝලංකා ඇතුළු සමාගම් 124 කින් ලැබුණු ධනාත්මක දායකත්වය අද දිනයේ දී සියලු කොටස් මිල දර්ශකයේ ඉහළ යාමට බලපාන ලදී.

අද දින සමස්ත ගනුදෙනු පිරිවැටුම රු. බිලියන 9.37 ක් වේ. මේ සඳහා ජෝන් කීල්ස් හෝල්ඩිංග්ස් හි සාමාන්‍ය වෙළෙඳපොළ ගනුදෙනු හරහා වාර්තා වූ රු. බිලියන 1.05 ක හා ගිවිසා ගනු ලැබූ ගනුදෙනු 4 ක් හරහා සිදුවූ රු. මිලියන 181.70 ක ගනුදෙනු වැඩි දායකත්වයක් ලබා දුනි. මීට අමතරව එක්ස්පෝලංකා (රු. මිලියන 666), සෙලාන් - නිෂ්ඡන්ද කොටස් (රු. මිලියන 666), හේලීස් (රු. මිලියන 586), HNB (රු. මිලියන 549) හා බ්‍රවුන්ස් ඉන්වෙස්ට්මන්ට්ස් (රු. මිලියන 548) දෛනික පිරිවැටුමට වැඩි දායකත්වයක් ලබා දුන් සමාගම් අතර පෙරමුණ ගෙන තිබේ.

ඊයේ දිනයේ දී මෙන් අද දිනයේ දීද බැංකු සමාගම්වල කොටස් වෙත ඉහළ උනන්දුවක් දක්නට ලැබුණු අතර එහිදී පෙර දිනයට සාපේක්ෂව සෙලාන් බැංකුවේ නිෂ්ඡන්ද කොටසක මිල 20% කින් හා සෙලාන් සාමාන්‍ය කොටසක මිල 11% කින් ඉහළ යාම කැපී පෙනුණි.