මැදපෙරදිග අර්බුදය සහ හෝමූස් සමුද්‍ර සන්ධිය (Strait of Hormuz) හරහා සිදුවන නාවික වෙළඳ බාධා හේතුවෙන් 2026 වසරේදී ගෝලීය ගල්අඟුරු ඉල්ලුම සියයට 1.2 කින් ඉහළ ගොස් ටොන් බිලියන 8.94 ක වාර්තාගත මට්ටමකට ළඟා වනු ඇතැයි ජාත්‍යන්තර බලශක්ති නියෝජිතායතනය (IEA) පුරෝකථනය කරයි.

හෝමූස් සමුද්‍ර සන්ධිය ඔස්සේ සිදුවන ද්‍රවීකෘත ස්වාභාවික වායු (LNG) ප්‍රවාහනය අඩාල වීම නිසා ස්වාභාවික වායු මිල ගණන් ඉහළ ගොස් ඇති අතර, ඒ හේතුවෙන් බොහෝ රටවල් විදුලිබල උත්පාදනය සඳහා වායු වෙනුවට නැවතත් ගල්අඟුරු භාවිතයට යොමු වී ඇත. මීට අමතරව, බලපෑම් එල්ල කරන එල් නිනෝ (El Niño) කාලගුණික තත්ත්වය හේතුවෙන් උෂ්ණත්වය ඉහළ යාම සහ ජල විදුලි උත්පාදනය පහත වැටීම නිසා ආසියානු කලාපයේ විදුලි ඉල්ලුම තවත් වැඩි වී තිබේ.

ලොව විශාලතම ගල්අඟුරු පාරිභෝගිකයන් වන චීනයේ ගල්අඟුරු ඉල්ලුම ටොන් බිලියන 5 දක්වාත්, ඉන්දියාවේ ඉල්ලුම ටොන් බිලියන 1.353 දක්වාත් ඉහළ යනු ඇතැයි අපේක්ෂා කෙරේ. එසේම, ඉතාලිය සහ ජර්මනිය වැනි යුරෝපීය රටවල් ද බලශක්ති හිඟයට මුහුණ දීම සඳහා ගල්අඟුරු බලාගාර වසා දැමීම කල් දැමීමට හෝ නැවත ආරම්භ කිරීමට පියවර ගනිමින් සිටී. කෙසේ වෙතත්, ඇමරිකා එක්සත් ජනපදයේ ලාභදායී දේශීය ස්වාභාවික වායු සහ සූර්ය හා සුළං බලශක්ති වර්ධනය නිසා එරට ගල්අඟුරු ඉල්ලුම සියයට 7 කින් පමණ පහත වැටෙනු ඇතැයි පැවසේ.

(OilPrice.com ඇසුරිනි.)