ශ්‍රී ලංකාවට 1977 දී විවෘත ආර්ථික ප්‍රතිපත්තිය හඳුන්වා දීමෙන් පසු ඉතිහාසයේ පළමු වතාවට 2020 ජූනි මාසයේ දී මෙරට අපනයන ආදායම, ආනයන වියදම ඉක්මවා ගොස් ඇති බව සම කැබිනට් ප්‍රකාශක අමාත්‍ය රමේෂ් පතිරණ මහතා පවසයි. ඊයේ (09) කැබිනට් තීරණ දැනුම් දීමේ මාධ්‍ය හමුවේ දී අමාත්‍යවරයා මේ බව අනාවරණය කරන ලදී.

මෙහිදී අදහස් දැක් වූ අමාත්‍ය රමේෂ් පතිරණ මහතා,

“ඊයේ අතිගරු ජනාධිපතිතුමන් ලංකාවේ ආර්ථිකය පිළිබඳව කැබිනට් මණ්ඩලය දැනුවත් කළා. එහිදී සුවිශේෂී තත්ත්වයක් එතුමන් සඳහන් කළා. දශක ගණනාවකට පසු, 1977 විවෘත ආර්ථිකය මෙරටට හඳුන්වා දීමෙන් පසුව, 2020 ජූනි මාසයේ දී ප්‍රථම වතාවට ලංකාවේ අපනයන ආදායම ආනයන වියදමට වඩා වැඩි වෙලා තිබෙනවා.“

“අපනයන ආදායම පසුගිය ජූනි මාසයේ දී ඇමරිකානු ඩොලර් මිලියන 1020 ක් දක්වා වැඩි වෙලා තිබෙනවා. එහි විශේෂත්වය තමයි, අපි ඉතාම කෙටිකාලයක් තුළ දී කොවිඩ් අර්බුදයෙන් පසුව නැවත අපේ රට නඟා සිටුවන බවට, නැගී සිටින බවට ඉතා හොඳ සාධකයක් ලැබිලා තිබෙනවා. ඒ යටතේ අපේ අපනයන ආදායම 2020 ජූනි මාසයේ දී ඩොලර් මිලියන 1020 දක්වා වැඩිවෙලා තිබෙනවා. එය පෙර වසරවලට සාපේක්ෂව සැලකීමේ දී 2019 දී 1084 ක් සහ 2018 දී 1024 ක්. එම නිසා අපේ අපනයන ආදායම පෙර වසරවල තත්ත්වයටම මේ ජූනි මාසයේ දී පත්වෙලා තිබෙනවා.“

“ඒත් එක්කම ආනයන සීමා කිරීමේ තත්ත්වයත් යටතේ අපේ ආනයන වියදම් 2020 ජූනි මාසයේ දී ඩොලර් මිලියන 961 දක්වා අඩුවෙලා තිබෙනවා. එම නිසා ඉතිහාසයේ ප්‍රථම වතාවට අපට ඉතාම සතුටුදායක කාරණයක් ආනයන වියදම් ක්‍රමානුකූලව අඩුවෙනවා. ඒ වගේම අපේ අපනයන ආදායම ක්‍රමානුකූලව යථා තත්ත්වයට පත්වෙලා තිබෙනවා.“